ၽွၼ်းလီလွင်ႈတႅမ်ႈလိၵ်ႈ

ၽွၼ်းလီလွင်ႈတႅမ်ႈလိၵ်ႈၼႆႉ

မီးၼမ်ယႂ်ႇၵႂၢင်ႈပုၼ်ႈတႃႇၵေႃႉတႅမ်ႈလႄႈ

ၵေႃႉလူဢၢၼ်ႇတင်းၼမ်တင်းလၢႆယဝ်ႉ

ယွၼ်ႉတႅမ်ႈဝႆႉလႄႈမၼ်းပဵၼ်ၽိုၼ်

ဢိင်တႃႇၵူၼ်းတင်းၼမ်တေလႆႈတၢင်းႁူႉ

ၼႂ်းမၼ်းၼၼ်ႉယဝ်ႉ ။

      သင်ဝႃႈႁဝ်းတႅမ်ႈဝႆႉ တၢင်းႁူႉမႂ်ႇၼႆၵေႃႈ

မိူၼ်ၵၼ်တင်းႁဝ်း လႆႈၸႅၵ်ႇၽႄပၼ်

တၢင်းႁူႉမႂ်ႇ ထိုင်ၸူးၽူႈလူလိၵ်ႈသေ

သင်ဝႃႈ ႁဝ်းတႅမ်ႈဢွၵ်ႇပၢႆးဝူၼ်ႉ ဢၼ်ၵဝ်ႇ

ၵႄႇ မိူၼ်ၵၼ်တင်းႁဝ်းတိုၵ်းသူၼ်း ႁႂ်ႈၵူၼ်း

တင်းၼမ်ၶုၵ်ႉၶူၼ်ႉသေ လဵပ်ႈႁဵၼ်းၼၼ်ႉယဝ်ႉ။

     ၵၢၼ်တႅမ်ႈလိၵ်ႈၼႆႉ ၽွၼ်းလီမၼ်း

ၵႂႃႇၵႆလိူဝ်သေ ၵၢၼ်လၢတ်ႈႁေႃးယဝ်ႉ ၊

ၵၢၼ်လၢတ်ႈၵၢၼ်ႁေႃးၼႆႉ မၼ်းႁဵတ်းႁႂ်ႈ

ၵူၼ်းတင်းၼမ်ပွင်ႇၸႂ်လႆႈၵမ်းသိုဝ်ႈသေတႃႉ

ပေႃးဢဝ်ၶၢဝ်းႁိုင်ဝႃႈၸိုင် ဢမ်ႇၵႂႃႇၵႆလႆႈ ။

      တူဝ်ယၢင်ႇမၼ်း  ~

ၸဝ်ႈၵဝ်ႇတႅမ်ႈလိၵ်ႈဝႆႉၼိုင်ႈႁူဝ် ၵူၼ်းလူမၼ်း

ၼိုင်ႈပီတေဢမ်ႇယွမ်းႁႃႈပၢၵ်ႇ ၊ ႁဵတ်းသင်သေ

ဝႃႈၼၼ်လႃႇၼႆ မိူဝ်ႈပပ်ႉလိၵ်ႈဢွၵ်ႇၵေႃႈ

ၵမ်ႈၼမ်ဢမ်ႇယွမ်း (2000) ပပ်ႉ၊ ၼႂ်းသွင်ႁဵင်

ၼၼ်ႉၵူၼ်းလူမၼ်းၵေႃႈ တေမီးယူႇၵူႈပီ ။

    ၵွပ်ႈၼၼ်လႄႈ တၢၵ်းႁူႉဢၼ်ၸဝ်ႈၵဝ်ႇ

ၵႆႉတႅမ်ႈဝႆႉၼႂ်းပပ်ႉၼၼ်ႉလႄႈသင် ၊ ၼႂ်းfb

ၼၼ်ႉလႄႈသင် မၼ်းတေမိူၼ်ၼင်ႇ ၸႅၵ်ႇ

ပၼ်တၢင်းႁူႉ ထိုင်ၶဝ်ၵူႈပီၼၼ်ႉယဝ်ႉ

ပေႃးပီယၢဝ်းၶၢဝ်းႁိုင်မႃးၵေႃႈ တေၸၢင်ႈ

ၼပ်ႉသွၼ်ႇဝႃႈ ၵူၼ်းလူလိၵ်ႈႁဝ်းၼၼ်ႉ

တေမီးႁူဝ်မိုၼ်ႇမၼ်းယဝ်ႉ ။

   ယူႇတီႈလဵဝ်သေ ႁႂ်ႈပေႃးမီးသုၼ်ႇ

ၸႅၵ်ႇပၼ်တၢင်းႁူႉၼၼ်ႉ  ဢမ်ႇသူႈမီး

တိုဝ်ႉတၢင်းမၼ်းလႆႈ ၊ ၵွပ်ႈၼၼ်..လႄႈ

ၵၢၼ်တႅမ်ႈၼႆႉ ၽွၼ်းလီမၼ်း ၵႂႃႇၶၢဝ်းႁိုင်

တိူဝ်းလိူဝ်သေ ၵၢၼ်လၢတ်ႈႁေႃးယဝ်ႉ ။

    ၵၢၼ်တႅမ်ႈလိၵ်ႈၼႆႉ မိူၼ်တင်းလပ်ႉပၢႆးဝူၼ်ႉ

ၶိုၵ်ႉလိုၵ်ႉၶိုၼ်ႈယႂ်ႇမႃးၼၼ်ႉယဝ်ႉ ၊ ပေႃးတႅမ်ႈၼမ်

မႃးၵေႃႈ တေမီးပၢႆးဝူၼ်ႉသုင်ၼၼ်ႉယဝ်ႉ ၊

      လွင်ႈတႅမ်ႈလိၵ်ႈၼႆႉ  ဢမ်ႇဢိင်ၼိူဝ်တၢင်းႁူႉ

လႄႈ လွင်ႈပွင်ႇၸႂ်ၵူၺ်း ၊ ဢိင်ၼိူဝ်လွင်ႈဢၼ်

မေႃဢဝ်ထႅဝ် ၶၵ်ႉလိၵ်ႈသေ လၢတ်ႈၼႄႁႂ်ႈၵူၼ်း

လူလိၵ်ႈၶဝ် ႁႂ်ႈပေႃးပွင်ႇလႅင်းလီ ဢမ်ႇမီးလွင်ႈ

ထၢင်ႇထိူမ်သင်ၼၼ်ႉထႅင်ႈယဝ်ႉ ။

      ထႅင်ႈပိူင်ၼိုင်ႈၵေႃႈ  ၵၢၼ်တႅမ်ႈလိၵ်ႈၼႆႉ

ၼႄဝႃႈပၢႆးဝူၼ်ႉႁဝ်းၼႆႉ ယႂ်ႇၼမ်သုင်ၵႃႈႁိုဝ်

ပွင်ႇၸႂ်ၼမ်လႄႈ လူင်ႉလႅင်းလီၵႃႈႁိုဝ် ၼႆၼၼ်ႉ

ယဝ်ႉ ၊ ဢၼ်ႁဝ်းမီးတၢင်းယၢမ်ႈ ၵႆႉတႅမ်ႈလိၵ်ႈ

ပိတ်းပွတ်း ဢၼ်ဢွၵ်ႇမႃးၼႂ်းၸႂ်သေ သိမ်း

ပႅင်းဝႆႉၼၼ်ႉၵေႃႈ မၼ်းတေမႃးပဵၼ်လွင်ႈၸွႆႈ

ထႅမ် ၵၢၼ်တႅမ်ႈလိၵ်ႈႁဝ်းၼၼ်ႉ ယႂ်ႇယႂ်ႇၼမ်

ၼမ်ယူႇ ။

    ၵွပ်ႈၼၼ်  ၼင်ႇႁိုဝ်ႁဝ်းပေႃးတေၵဵပ်းလႆႈ

ၶေႃႈမုၼ်း တႃႇတေပဵၼ်မူႇလိၵ်ႈၼိုင်ႈႁူဝ်( ဢမ်ႇ

ၼၼ် ) လိၵ်ႈၼိုင်ႈတွၼ်ႈ တေႃႇပေႃးပဵၼ်မႃး

ၼိုင်ႈပပ်ႉတႄႇၵႂႃႇ ၸိူဝ်းၼၼ်ႉ ပေႃးဢမ်ႇပႃး ပပ်ႉ

မၢႆတွင်းၸပ်းတူဝ်ဝႆႉသေ တႅမ်ႈမၢႆဝႆႉၵမ်းသိုဝ်ႈၸိုင်

တေၸၢင်ႈလိုမ်းၵႂႃႇငၢႆႈငၢႆႈယဝ်ႉ ။

      မၢင်ပွၵ်ႈၼႆႉယွၼ်ႉပိူဝ်ႈဢမ်ႇမီးတၢင်းယၢမ်ႈ

ၵႆႉတႅမ်ႈၵႆႉမၢႆလႄႈ ဢၼ်ပိူၼ်ႈလၢတ်ႈၼႄ မိူဝ်ႈ

ၵၢင်ၼႂ်ၼၼ်ႉ ၵၢင်ဝၼ်းမႃးၵေႃႈ လိုမ်းပႅတ်ႈသေ

မိူၼ်ၼင်ႇၼွၼ်းၾၼ် ၼၼ်ႉၵူၺ်းယဝ်ႉ ။

      မိူဝ်ႈၽွင်းလူလိၵ်ႈၵေႃႈ တေႃႈၼင်ႇၼၼ်

မၢင်ပွၵ်ႈၵႂႃႇလူႁၼ်မႅၼ်ႈ ပၢႆးဝူၼ်ႉဢၼ်ၶိုၵ်ႉတွၼ်း

ၼႂ်းပပ်ႉၼၼ်ႉသေတႃႉၵေႃႈ ၵွပ်ႈဢမ်ႇမၢႆတွင်းဝႆႉ

လႄႈ လူလိၵ်ႈၼမ်ယူႇၵေႃႈ ဢမ်ႇႁၼ်ၽွၼ်းလီ

မၼ်းၵႃႈႁိုဝ် ၊ ဢၼ်ၵိုင်ႇလီပဵၼ်တႄႉ ႁဝ်းတေလႆႈ

တႅမ်ႈဢၼ်ႁဝ်းဝူၼ်ႉဢွၵ်ႇ ဢၼ်ႁဝ်းလူမႅၼ်ႈ

ၼၼ်ႉၵွၼ်ႇ ၸင်ႇတေၸၢင်ႈၶိုၼ်းလၢတ်ႈၼႄ

ပိူၼ်ႈလႆႈယဝ်ႉ ။

     ယဝ်ႉၵေႃႈ ဢၼ်ၶႂ်ႈလၢတ်ႈထႅင်ႈတႄႉ ၵၢၼ်

တႅမ်ႈလိၵ်ႈပိုတ်ႇ( လိၵ်ႈပွင် ) ၼႆႉပေႃးဝႃႈဢမ်ႇ

ပေႉလီလီၸိုင် သင်ပဵၼ်လႆႈတႅမ်ႈ လိၵ်ႈပွင်ႈၵႂၢမ်း

ပွတ်း ဢၼ်မီးတီႈပွင်ႇ လိုၵ်ႉယမ် ၼၼ်ႉ လီ

တီႈသုတ်းယဝ်ႉ ။ 

     ပေႃးတေမႃးႁုပ်ႈဢဝ် တီႈသိုဝ်ႈ ပွတ်းပွတ်း

ယမ်ယမ်ၼႆ တေလႆႈႁၼ်ဝႃႈ ၽွၼ်းလီၵၢၼ်

တႅမ်ႈလိၵ်ႈၼႆႉ ၊ ၼိုင်ႈ ႁဵတ်းႁႂ်ႈပၢႆးဝူၼ်ႉႁဝ်းၶိုၵ်ႉလိုၵ်ႉ

လႄႈမီးပၢႆးဝူၼ်ႉသုင်မႃး၊ သွင်  ပဵၼ်ၵၢၼ်ထတ်း

သၢင်ၼမ်ႉၵတ်ႉပၢႆးဝူၼ်ႉႁဝ်းယႂ်ႇသုင်မွၵ်ႈလႂ် လႄႈ

ပွင်ႇၸႂ် လူင်ႉလႅင်းမွၵ်ႈၵႃႈႁိုဝ် ၊ သၢမ် ပဵၼ်တီႈၵဵပ်း

ႁွမ် ၶေႃႈမုၼ်းၶိုၵ်ႉၶႅမ်ႉတွၼ်ႈတႃႇတေပဵၼ်မႃး

ပပ်ႉၼိုင်ႈပပ်ႉ ၊ သီႇ ႁဵတ်းႁႂ်ႈ လွင်ႈမၢႆတွင်းႁဝ်း 

တဵမ်ထူၼ်ႈလီ တႄႇၵႂႃႇ မီးတင်းၼမ်တင်းလၢႆ

ယဝ်ႉ ။

       ဢိင်ၼိူဝ် မူႇလိၵ်ႈဢၼ်လႆႈ ၵဵပ်းႁွမ်တွမ်

မႃးၼႆႉ ယွၼ်ႉဝူၼ်ႉႁၼ်ဝႃႈ တေပဵၼ်တၢင်းႁူႉ

ပွတ်းဢွၼ်ႇတွၼ်ႈၼိုင်ႈ ၼႂ်းၵၢၼ်တႅမ်ႈလိၵ်ႈ

ၼၼ်ႉၼႆသေ ၸင်ႇလႆႈၵဵပ်းထွၼ်မႃး ၼႂ်းပပ်ႉ

ဢၼ်မီးၸိုဝ်ႈဝႃႈ ...

#ပပ်ႉမၢႆတွင်းပွႆးယွင်ႈၵုင်ႇယေႃးမုၼ်

ၸဝ်ႈၶူးဢၼ်ႁပ်ႉလႆႈၸုမ်ႈၶူးၼွၵ်ႈမိူင်း 

ဢၼ်မီးတီႈၼႃႈလိၵ်ႈ 111 တေႃႇ 113ၼၼ်ႉ

သေတႅမ်ႈတၢင်ႇမႃးယူႇယဝ်ႉ။

         ၵမ်းလိုၼ်းသုတ်း ယွၼ်းႁႂ်ႈၽူႈလူၶဝ်

ၽိုၵ်းတႅမ်ႈလိၵ်ႈ ၼင်ႇၵႃႈပၢႆးဝူၼ်ႉႁဝ်းၶိုတ်းလႆႈ

ၼၼ်ႉလႄႈသင် ၽိုၵ်းတႅမ်ႈမၢႆတွင်း လွင်ႈတူဝ်

ထူပ်းႁဝ်းၵူႈဝၼ်းဝၼ်း ဢမ်ႇၼၼ် ၼႂ်းပပ်ႉ

လိၵ်ႈဢၼ်ႁဝ်းလူႁၼ်ၶေႃႈမုၼ်းၶိုၵ်ႉၶႅမ်ႉၼၼ်ႉ

လႄႈသင် ၊ တႄႉၵႂႃႇသင်ဝႃႈႁဝ်းၽိုၵ်းတႅမ်ႈ ၽိုၵ်း

မၢႆၼႆၸိုင် တေၸၢင်ႈႁဵတ်းႁႂ်ႈ ပၢႆးဝူၼ်ႉႁဝ်း သုင်

မႃးလႄႈ ၵၢၼ်တႅမ်ႈလိၵ်ႈႁဝ်းၼၼ်ႉၵေႃႈတေၵႄႇ

ထူၼ်ႈမႃး ၼၼ်ႉယဝ်ႉ ။

ၼပ်ႉယမ်ယႂ်ၼမ်သေ

ၵဵပ်းႁွမ် >>>>>  ၵမ်ႉၶိူဝ်း