လၢတ်ႈႁႂ်ႈမီးၵႃႈၶၼ်
ၶေႃႈၵႂၢမ်းဢၼ်မီးၵႃႈၶၼ်ၼၼ်ႉ
ၵူႉသူဝ်ႇၵေႃႈလႆႈ၊ ၶေႃႈၵႂၢမ်းဢၼ်မီး
ၵႃႈၶၼ်ၼၼ်ႉ တႃႇၸဝ်ႈၵဝ်ႇၵေႃႈ
လႆႈၽွၼ်းလီတႃႇၵူၼ်းတၢင်ႇၵေႃႉ
ၵေႃႈလႆႈၽွၼ်းလီ။
ၵေႃႉလၢတ်ႈလႄႈ တင်းၵေႃႉထွမ်ႇ
လႆႈၵူႉသူဝ်ႇၼင်ႇၵၼ်ဢၼ်မီးၽွၼ်းလီ
ၼၼ်ႉ ပဵၼ်လွၵ်းလၢႆးလႆႈ ၵူႉသူဝ်ႇ
ဢၼ်ၼိုင်ႈယဝ်ႉ။
ၶေႃႈၵႂၢမ်းဢၼ်မီးၵႃႈၶၼ်
ဢၼ်ဝႃႈၼၼ်ႉ ထိုင်ၶၢဝ်းယၢမ်းလႄႈ
ၸင်ႇလၢတ်ႈၼႆႉ လီသေပိူၼ်ႈယဝ်ႉ။
ပေႃးဢမ်ႇၸႂ်ႈ
ၶၢဝ်းယၢမ်းဢၼ်ထုၵ်ႇလၢတ်ႈလႄႈ
လၢတ်ႈပေႃးၼႆ ပဵၼ်ၵႂၢမ်းဢၼ်
ဢမ်ႇမီးၵႃႈၶၼ်ၵႂႃႇပႅတ်ႈ။
မၢင်ပွၵ်ႈမၢင်လႂ် ဢမ်ႇထုၵ်ႇလီ
လၢတ်ႈလႄႈ လၢတ်ႈၵႂႃႇ ၶိုၼ်းၸၢင်ႈ
ပဵၼ်တၢင်းၽိတ်းၸဝ်ႈၵဝ်ႇၵွၼ်ႇယဝ်ႉ။
ၵွပ်ႈၼၼ် ၵႂၢမ်းဢၼ်မီးၵႃႈၶၼ်
ဝႃႈၼႆသေတႃႉ ထုၵ်ႇလီတူၺ်း
ၶၢဝ်းယၢမ်း၊ တီႈလၢတ်ႈ၊ သၢႆငၢႆ
ငဝ်းလၢႆး သေၸင်ႇလီလၢတ်ႈယဝ်ႉ။
ၵူၼ်းႁဝ်းၼႆႉ ၶၢတ်ႈဢၵေးၵၼ်
ဢီသင်ပေႃးၼႆၸိုင် ၶၢတ်ႈဢၵေး
လၢႆးလၢတ်ႈလၢႆးၸႃၼႆႉ ၼမ်လိူဝ်သေ
ၶၢတ်ႈ ဢၵေးတၢင်းၼုင်ႈတၢင်းဝႆယဝ်ႉ။
ထွမ်ႇၶဝ်လၢတ်ႈသေ
ႁူႉၸၼ်ႉထၢၼ်ႈၶဝ်ယဝ်ႉ၊ ယဝ်ႉၵေႃႈ ႁူႉ
ၼမ်ႉၸႂ် တႅမ်ႇ သုင်ၶဝ်ၼၼ်ႉယဝ်ႉ။
ၶဝ်လၢတ်ႈၼၼ်ႉမီးၵႃႈၶၼ်ယူႇႁႃႉ၊
ဢမ်ႇမီးၵႃႈၶၼ်ႁႃႉ ဢၼ်ဝႃႈၼၼ်ႉ
ထွမ်ႇဢၼ်ၶဝ်လၢတ်ႈၼၼ်ႉၵေႃႈ
ႁူႉလီယူႇယဝ်ႉ။
ယိပ်းၸႂ်ႉၶေႃႈၵႂၢမ်းဢၼ်မီးၵႃႈၶၼ်
ဢၼ်ဝႃႈၼၼ်ႉ ၵေႃႈ ပေႃးမေႃၸႂ်ႉတိုဝ်း
ပေႃးမေႃလၢတ်ႈၵွၼ်ႇ ၸွင်ႇတေမီး ၵႃႈၶၼ်၊
တႃႇတေၸႂ်ႉတိုဝ်းလႆႈ ၶေႃႈၵႂၢမ်းဢၼ်မီး
ၵႃႈၶၼ် ၼၼ်ႉၵေႃႈ လူဝ်ႇလႆႈမီးပၺ်ႇၺႃႇ
တၢင်းႁူႉတၢင်းႁၼ် ၶၢမ်ႇပိုၼ်ႉမၼ်းၵွၼ်ႇ
ၸွင်ႇတေၸႂ်ႉတိုဝ်းလႆႈ။
ပေႃးလၢတ်ႈ ၼႃႇဢႃးလႃးၵေႃႈ
(ၵမ်းၵမ်းလၢတ်ႈ) ပိူၼ်ႈတေဢမ်ႇထၢင်ႇ
ယႂ်ႇသေ ၸၢင်ႈပဵၼ်ဢၼ်ထၢင်ႇလဵၵ်ႉၵႂႃႇ
ၵေႃႈၸၢင်ႈပဵၼ်လႆႈ ယဝ်ႉ။
ၵူၼ်းႁဝ်းၵေႃႉၼိုင်ႈလႄႈ
ၵေႃႉၼိုင်ႈၼၼ်ႉ မိုတ်ႈၵိုဝ်း ၸမ်ၸႂ်ၵၼ်ၵႂႃႇ
သေလၢမ်းတူၺ်းၸၼ်ႉထၢၼ်ႈ ၵၼ်ၵႂႃႇ
ၼၼ်ႉၵေႃႈ ဢိင်ၼိူဝ် ၶေႃႈၵႂၢမ်းလၢတ်ႈ
ၸဝ်ႈၵဝ်ႇၼၼ်ႉယဝ်ႉ။
ပေႃးဢမ်ႇထၢင်ႇယႂ်ႇၵႂၢမ်းလၢတ်ႈၵေႃႈ
ၵူၼ်းၵေႃႈ ဢမ်ႇထၢင်ႇယႂ်ႇမိူၼ်ၵၼ်ၼၼ်ႉယဝ်ႉ။
ၵမ်ႈၽွင်ႈ မီးၶူဝ်ၶွင် ငိုၼ်းၶမ်းၼမ်ယူႇၵေႃႈ
ယွၼ်ႉဢမ်ႇမေႃလၢတ်ႈ လႄႈ ဢဝ်ပိူၼ်ႈ
ထၢင်ႇလဵၵ်ႉၵႂႃႇၵေႃႈမီးယဝ်ႉ။
မိူဝ်ႈႁဝ်းတိုၵ်ႉလၢတ်ႈယူႇၼၼ်ႉ
တၢင်းဝူၼ်ႉ တၢင်းၶႆႈၸႂ် ဢၼ်ၼႆႉလမ်ႇလွင်ႈ
လႄႈ လူဝ်ႇတေႉတေႉ။
ပေႃးဝူၼ်ႉလႆႈလီ တၢင်းၶႆႈၸႂ်လီၵေႃႈ
ဢၼ်မၼ်းလၢတ်ႈဢွၵ်ႇမႃးၼၼ်ႉၵေႃႈ
ပဵၼ်ၶေႃႈၵႂၢမ်းလီၼၼ်ႉယဝ်ႉ။
ပေႃး လၢတ်ႈၵႂႃႇလႄႈ ဢမ်ႇႁူႉၸၵ်းတီႈပွင်ႇ
ၵႂၢမ်းၸဝ်ႈၵဝ်ႇ ႁွတ်ႈၽႅဝ်လႂ်ယဝ်ႉၵေႃႈ
ဢမ်ႇႁူႉယဝ်ႉပေႃးၼႆ ပဵၼ်ၶေႃႈၵႂၢမ်း
ဢၼ်ပႅတ်ႈလၢႆ ဢမ်ႇမီးၵႃႈၶၼ်သင်ၼၼ်ႉယဝ်ႉ။
ပေႃးလၢတ်ႈ ဢမ်ႇမီးပၵ်းမီးပိူင်
လၢတ်ႈဢမ်ႇႁူႉၶွပ်ႇ ဢမ်ႇႁူႉလႅၼ်သေ
လၢတ်ႈၵမ်ႉမၼ်းပွင်ႇၵႂႃႇပေႃးၼႆ
ၼႂ်းၵႂၢမ်းလၢတ်ႈၸဝ်ႈၵဝ်ႇၼၼ်ႉ
တေပဵၼ်ၵႂၢမ်းဢၼ် ၽိတ်းၽိတ်း
ၾူၼ်ၾူၼ်လၢႆလၢႆယဝ်ႉ။
ပေႃးဢမ်ႇသၢင်ႇတေႃႇ
ၸၢင်ႈပဵၼ်ပၼ်ႁႃၶိုၼ်း ၼႂ်းၵႂၢမ်း
ၸဝ်ႈၵဝ်ႇလၢတ်ႈၼၼ်ႉၵွၼ်ႇ။
ၵႂၢမ်းၼိုင်ႈၶေႃႈ
တႃႇတေလၢတ်ႈႁႂ်ႈမီးၵႃႈၶၼ်ဢၼ်ဝႃႈ
ၼၼ်ႉၵေႃႈ ဢိင်ၼိူင် တင်းယၢမ်ႈၸဝ်ႈၵဝ်ႇ၊
လွင်ႈတူဝ် ထူပ်းၸဝ်ႈၵဝ်ႇ၊ တင်းႁူႉ
တင်းႁၼ်ၸဝ်ႈၵဝ်ႇ၊ ၵပ်းၵၢႆႇလူၺ်ႈလွင်ႈ
ၵပ်းသိုပ်ႇၸိူဝ်းႁိမ်းႁွမ်း ၸိူဝ်းၼႆႉ
တိုၼ်းပႃးဝႆႉ ယူႇယဝ်ႉ။
ပေႃးလၢတ်ႈ
ဢမ်ႇႁူႉၵူၼ်ႈဢမ်ႇႁူႉႁူဝ်ၵေႃႈ
ၸၢင်ႈဢဝ်လွင်ႈၼပ်ႉယမ်ပိူၼ်ႈမီးၼိူဝ်
ၸဝ်ႈၵဝ်ႇၼၼ်ႉ ဢဝ်မွတ်ႇႁၢႆလၢႆၵႂႃႇပႅတ်ႈယဝ်ႉ။
ပေႃးဝႃႈၶႂ်ႈလၢတ်ႈလႆႈ
ၶေႃႈၵႂၢမ်းဢၼ်မီးၵႃႈၶၼ် ဢၼ်မီး
ၽွၼ်းလီပေႃးၼႆ လူဝ်ႇလႆႈမီး လူဝ်ႇလႆႈႁႃ
တၢင်းႁူႉတၢင်းႁၼ် ဢၼ်ၸၼ်ႉသုင်၊
ၶေႃႈၵႂၢမ်းဝေႃးႁႃႇရ ဢၼ်ၸၼ်ႉသုင်သေ
ဢၼ်လူဝ်ႇလႆႈၵေႃႈ ႁႂ်ႈဢၢၼ်ႇလႆႈ
ၸပ်းသူပ်းဝႆႉယူႇယဝ်ႉ။
ႁူႉလႆႈၶေႃႈၵႂၢမ်း
ဢၼ်မီးၵႃႈၶၼ်ၵႃႈႁိုဝ်ၵေႃႈ ၼႂ်းၸႂ်
ၸဝ်ႈၵဝ်ႇၼၼ်ႉလူဝ်ႇလႆႈမီးပႃး
ၸေႇတၼႃႇလီၸွမ်းယဝ်ႉ။
ၸေတၼႃႇလႄႈၶေႃႈၵႂၢမ်း
ဢၼ်မီးၵႃႈၶၼ် ၶေႃႈၵႂၢမ်းၸၼ်ႉသုင်ၼၼ်ႉ
ဢဝ်မႃးပွင်းလေႃးၵၼ်ပေႃးၼႆၸိုင်
ၶႅၼ်းမီးၼမ်ႉၼၵ်း ၶႅၼ်းမီးၵႃႈၶၼ်
ၶႅၼ်းမီးၽွၼ်းလီ တိူဝ်းလိူဝ်မႃးယူႇယဝ်ႉ။
ၵူၼ်းႁဝ်းၼႆႉ ဢဝ်လိၵ်ႈၵႂၢမ်းသေ
ၵပ်းသိုပ်ႇၵၼ်ၼၼ်ႉ ယဝ်ႉ။
ဢမ်ႇလႆႈပၼ်ၵႃႈပၼ်ၶၼ်
ဢၼ်လႆႈလၢတ်ႈလၢႆလၢႆ သေလၢတ်ႈဢွၵ်ႇ
မႃးၼၼ်ႉယဝ်ႉ ဢၼ်ဢဝ်ၵပ်းသိုပ်ႇၵၼ်။
ၵႂၢမ်းဢၼ်လႆႈလၢတ်ႈလၢႆလၢႆၼၼ်ႉ
ပေႃးမီးၽွၼ်း လီ ပေႃးမီးၵႃႈၶၼ်ၵွၼ်ႇ
ၸွင်ႇၵွႆႈပဵၼ်ၵႂၢမ်းလီ ၵႂၢမ်းၵူႉသူဝ်ႇ ယဝ်ႉ။
ၽြႃးပဵၼ်ၸဝ်ႈႁဝ်း ႁေႃးဝႆႉ
ၼႂ်းသၵႃထႃဝၵ်ႉၵ လၢႆးလၢတ်ႈၶေႃႈၵႂၢမ်း
ဢၼ်မီးၵႃႈၶၼ်ၼၼ်ႉ မီးဝႆႉယူႇ
ဢင်ႇၵႃႇ (သီႇ) ပိူင်
႑။ လၢတ်ႈႁႂ်ႈပဵၼ်ဢၼ်လီ။
႒။ လၢတ်ႈႁႂ်ႈထုၵ်ႇၸႂ် မႅၼ်ႈၸႂ်၊ လၢတ်ႈႁႂ်ႈလီႁၵ်ႉ။
႓။ လၢတ်ႈႁႂ်ႈပဵၼ် ဢၼ်မၢၼ်ႇမႅၼ်ႈ ၸိုဝ်ႈၸႂ်ႈ။
႔။ လၢတ်ႈၸွမ်းပိူင်ပဵၼ်သၽႃႇဝ ဢၼ်ပဵၼ်/မီးလႄႈ
ႁႂ်ႈပဵၼ်ဢၼ်လီမၢႆတွင်းဢဝ် ၼႆၼၼ်ႉယဝ်ႉ။
လၢတ်ႈႁႂ်ႈၶေႃႈၵႂၢမ်းမီးၵႃႈၶၼ်။
ၵႂၢမ်းၼႆႉလႆႈလၢတ်ႈလၢႆလၢႆ ဢမ်ႇလႆႈပၼ်ၵႃႈ
ပၼ်ၶၼ်ဝႃႈၼႆသေတႃႉ ပေႃး လၢတ်ႈႁႂ်ႈပဵၼ်
ၵႂၢမ်းဢၼ်မီးၵႃႈၶၼ်ၵွၼ်ႇ ၸွင်ႇတေလႆႈ
ၵူဝ်ႉသူဝ်ႇယဝ်ႉ။ လၢတ်ႈၵႂၢမ်းႁႂ်ႈမီးၵႃႈၶၼ်
ဢၼ်ဝႃႈၼၼ်ႉ ၵေႃႈ ပဵၼ်လွၵ်းလၢႆးလၢတ်ႈ
ႁႂ်ႈလႆႈၵူႉသူဝ်ႇဢၼ်ၼိုင်ႈယဝ်ႉ။
ၼပ်ႉယမ်ၽူႈလူလိၵ်ႈႁဝ်းၶဝ် ယႂ်ႇၼမ်သေ---
#ပၢႆးဝူၼ်ႉၶပ်း
