လွင်ႈတၢင်းၼႅင်ၸႂ်

ယၢမ်းႁူဝ်ၶမ်ႈ မိူဝ်ႈၸၢႆးသႅင်ႁၵ်ႉပွၵ်ႈမိူဝ်းႁိူၼ်းၼၼ်ႉ လႆႈငိၼ်း မႄႈလႄႈတင်းမေး လၢတ်ႈတေႃႇၵၼ် -

လုၵ်ႈယိင်းဢူၺ် တၢင်းပဵၼ်မႄႈလႄႈ ၽၵ်းဢၼ်ၼႆႉ မၼ်းဢမ်ႇထုၵ်ႇၵၼ်ၼႃ ဢမ်ႇမီးၽၵ်းတၢင်ႇမီႇယဝ်ႉႁႃႉ?

" ၼႄႈ ..... ၼႄႈ ၼၢႆးထဝ်ႈ တၢင်းလုၵ်ႈၸၢႆးမႂ်းႁႃငိုၼ်းသေ လႆႈၵိၼ်ၽၵ်းဢၼ်ၼႆႉၵေႃႈၵၢမ်ႇလီၼႃႇယဝ်ႉ "

ယၢမ်းၸၢႆးသႅင်ႁၵ်ႉ လႆႈငိၼ်းၶေႃႈၵႂၢမ်း ၵေႃႉပဵၼ်မေးလၢတ်ႈၼင်ႇၼၼ် ပဵၼ်ဢၼ်ၸႂ်လမ်ၼႃႇသေ လၢတ်ႈၶိုၼ်းတီႈၵေႃႉပဵၼ်မေးၼၢင်းမၼ်းၼင်ႇၼႆ -

" သူၼႆႉၵေႃႈ သုတ်းတီႈမေႃယႃသင်ႇမႃးဝႃႈ ယႃႇႁႂ်ႈမႄႈၵိၼ်ၽၵ်းဢၼ်ၼႆႉၼႆ မၼ်းဢမ်ႇထုၵ်ႇတင်းမႄႈၼႆ လွင်ႈၼႆႉသူၵေႃႈလီပွင်ႇၸႂ်ဢိူဝ်ႈ ..... "

" ပေႃးထၢၼ်ႈဝႃႈၼၼ် သူဢမ်ႇႁဵတ်းၵူၼ်းမႃးႁုင်လဵင်ႉမႄႈသူလႃႇ "

ၵေႃႉပဵၼ်မေးမၼ်းၵေႃႈ ၸႂ်လမ်သေ ၶဝ်ႈၵႂႃႇၼႂ်းႁွင်ႈၼွၼ်းယဝ်ႉ ပိၵ်ႉၽၵ်းတူႁႅင်းꧦယူႇယဝ်ႉ။ ယၢမ်းၸၢႆးသႅင်ႁၵ်ႉ ဝၢႆႇယၵ်ႉတူၺ်းမႄႈမၼ်းၼၼ်ႉ လႆႈႁၼ်ၼမ်ႉတႃဢွၼ်ႇ ဢိူမ်ႈႁူၺ်ႇဝႆႉယူႇလႄႈ ....

" မႄႈဢူၺ် ယႃႇပေႁႆႈယဝ်ႉ ၽၵ်းဢၼ်ၼႆႉၵေႃႈ မႄႈယႃႇပေၵိၼ်ယဝ်ႉ လုၵ်ႈၸၢႆးတေၵႂႃႇသိုဝ်ႉၶဝ်ႈသွႆးမႃးတႃႇမႄႈဢေႃႈ "

" ယႃႇယဝ်ႉလုၵ်ႈၸၢႆး လုၵ်ႈၸၢႆးၵေႃႈႁိူဝ်ႉမႃးတင်းဝၼ်းယဝ်ႉ လိုဝ်ႈသေၵွၼ်ႇလႄႈ "

" ဢမ်ႇပဵၼ်သင်ၶႃႈမႄႈ လုၵ်ႈၸၢႆးဢမ်ႇႁိူဝ်ႉၶႃႈ လုၵ်ႈၸၢႆးတေသိုဝ်ႉၶဝ်ႈသွႆးမႃးပၼ်မႄႈၵိၼ်ယဝ်ႉ လုၵ်ႈၸၢႆးမီးၵႂၢမ်းၶႂ်ႈလၢတ်ႈမႄႈဢေႃႈ ... "

" ၸိူင်ႉၼၼ်ႁႃႉလုၵ်ႈၸၢႆး လၢတ်ႈဢွၼ်တၢင်းၵွၼ်ႇလႄႈ မီးလွင်ႈလူဝ်ႇလၢတ်ႈသင်လႃႇ "

" ၸိူင်ႉၼႆဢေႃႈမႄႈ ယူႇတီႈႁိူၼ်းၸိူင်ႉၼႆ တွၼ်ႈတႃႇမႄႈၵေႃႈလႆႈႁိူဝ်ႉၸႂ် ယဝ်ႉလုၵ်ႈပႂ်ႉမႄႈၵေႃႈ ၵုမ်ႇႁႃတၢင်းၽိတ်းမႄႈယူႇၵူႈယၢမ်း မႄႈၵေႃႈတေဢမ်ႇမီးတၢင်းသိူဝ်း ယွၼ်ႉၼၼ် တွၼ်ႈတႃႇမႄႈၼၼ်ႉ လုၵ်ႈၸၢႆးႁၢင်ႈႁႅၼ်းဝႆႉလွင်ႈၼိုင်ႈဢေႃႈ "

" ယႃႇပေလၢတ်ႈယဝ်ႉလုၵ်ႈၸၢႆး "

မႄႈမၼ်းၸၢႆးလၢတ်ႈၼင်ႇၼၼ်ယဝ်ႉ ၼမ်ႉတႃယွႆႉတူၵ်းသေ လေႃးတင်းသဵင်ႁႆႈသေ -

" ဢၼ်လုၵ်ႈၸၢႆးတေလၢတ်ႈၼၼ်ႉ မႄႈႁူႉယဝ်ႉ လုၵ်ႈတေဢဝ်မႄႈ ၵႂႃႇဝႆႉတီႈႁူင်းသဝ်းၵူၼ်းထဝ်ႈ ဢမ်ႇၸႂ်ႈႁႃႉ ၵူၺ်းၵႃႈလုၵ်ႈၸၢႆးဢူၺ် မႄႈဢမ်ႇၶႂ်ႈႁႂ်ႈလုၵ်ႈၸၢႆးႁၢႆႁူ ႁၢႆတႃမႄႈ ထိုင်တီႈဝႃႈတႃမႄႈတေမွတ်ႇၵႂႃႇ ဢမ်ႇႁၼ်သင်ယဝ်ႉၵေႃႈ မႄႈတိုၵ်ႉၶႂ်ႈငိၼ်းသဵင်လုၵ်ႈၸၢႆးယူႇ ၵူၺ်းၵႃႈ သင်ဢမ်ႇမိူၼ်ၸႂ်လုၵ်ႈၸၢႆးၸိုင် လုၵ်ႈၸၢႆးဝႆႉလႂ်ၵေႃႈ မႄႈၵႃႈလႆႈၵႂႃႇယူႇတီႈၼၼ်ႈၵူၺ်းဢိူဝ်ႈလုၵ်ႈဢူၺ် "

ယၢမ်းၸၢႆးသႅင်ႁၵ်ႉလႆႈငိၼ်းၶေႃႈၵႂၢမ်းမႄႈမၼ်းၸၢႆးၼင်ႇၼၼ် ၼမ်ႉတႃမၼ်းၵေႃႈယွႆႉတူၵ်းမႃးသေ -

' ႁိုမ်း ..... ၵေႃႉပဵၼ်မေးၵေႃႈ ၵုမ်ႇႁႃတၢင်းၽိတ်းမႄႈယူႇတႃႇသေႇ ပေႃးဢမ်ႇဢဝ်မႄႈၵႂႃႇဝႆႉတီႈႁူင်းသဝ်းၵူၼ်းထဝ်ႈၸိုင် ၵဝ်တေဢမ်ႇမီးတၢင်းသိူဝ်းလႆႈ .... '

" ယႃႇပေႁႆႈယဝ်ႉၶႃႈမႄႈ တႃႇမႄႈၼၼ်ႉ လုၵ်ႈၸၢႆးတေႁဵတ်းပၼ်ႁႂ်ႈလီတီႈသုတ်းၵူၺ်းၶႃႈ ယၢမ်းလဵဝ်တႄႉ လုၵ်ႈၸၢႆးတေၵႂႃႇသိုဝ်ႉၶဝ်ႈသွႆးမႃးပၼ်မႄႈၵွၼ်ႇၼႃ "

" ယႃႇၵႂႃႇသိုဝ်ႉယဝ်ႉလုၵ်ႈၸၢႆး မႄႈဢမ်ႇၶႂ်ႈၵိၼ်ယဝ်ႉ လုၵ်ႈၸၢႆးၵႂႃႇလိုဝ်ႈၵွၼ်ႇလႄႈ မႄႈၵေႃႈတေၵဵပ်းၶူဝ်းဢၼ်မီးၸိူဝ်းၼၼ်ႉဝႆႉၵွၼ်ႇ "

ၸၢႆးသႅင်ႁၵ်ႉ ပႆၽၢတ်ႇမႄႈမၼ်းၸၢႆးမႃးထိုင်ႁိမ်းၽၵ်းတူသေယဝ်ႉ ၶိုၼ်းဝၢႆႇယၵ်ႉတူၺ်း ၵေႃႉပဵၼ်မႄႈမၼ်းၸၢႆးသေ လႆႈႁၼ်မႄႈမၼ်းၸၢႆးတူၺ်းမၼ်း တင်းၸႂ်ဢမ်ႇလီၼင်ႇၼၼ် မၼ်းယွၼ်းတၢင်းၽိတ်းမႄႈမၼ်း တီႈၼႂ်းၸႂ်ယူႇ ....

' ၶႂၢင်ႉပၼ်လုၵ်ႈသေၵမ်းၶႃႈမႄႈဢူၺ် .... '

ယူႇၵမ်းၼိုင်ႈမၼ်း ၽွင်းမၼ်းၸၢႆးဢွၵ်ႇၼႂ်းႁွင်ႈမႃးၶိုၼ်းၼၼ်ႉ လႆႈႁၼ်မႄႈမၼ်းၸၢႆး ႁွပ်ႇတင်းၶူဝ်းၵဝ်ႇမွင်သွင်ၸုမ်ႇသေ ပႂ်ႉမၼ်းၸၢႆးဝႆႉယူႇ -

" မႄႈတူဝ်ႈတၼ်းယဝ်ႉႁႃႉ မႄႈႁၢင်ႈႁႅၼ်းယဝ်ႉမူတ်းယဝ်ႉၼႄႇ .... "

" ႁႅၼ်းယဝ်ႉꧦလုၵ်ႈၸၢႆး မႄႈဢမ်ႇမီးၶူဝ်းလၢၵ်ႇလၢႆးသင်လူး "

" ပေႃးၼၼ်ၵေႃႈ ႁဝ်းၵႂႃႇယဝ်ႉၼေႃႈမႄႈ "

ယၢမ်းၸၢႆးသႅင်ႁၵ်ႉ မႃးသူင်ႇမႄႈမၼ်းၼၼ်ႉ တေႃႇပေႃးသုတ်းသၢႆတၢင်း မႄႈမၼ်းၸၢႆးဢမ်ႇလၢတ်ႈၵႂၢမ်းသေၶေႃႈ ၵေႃႉပဵၼ်မႄႈမၼ်းတႄႉ ယွၼ်ႉတႃႇလုၵ်ႈမၼ်းတေမီးလွင်ႈ ၸႂ်ၵတ်းယဵၼ်ၼၼ်ႉ တုၵ်ႉၶႃႉၸႂ်တၢၼ်ႇလႂ်ၵေႃႈ တၢင်းယုမ်ႉၶွင်မႄႈ ဢမ်ႇထၢတ်ႇဢမ်ႇဝၢႆး ၵူၺ်းၵႃႈၼႂ်းၸႂ်တႄႉ -

' လုၵ်ႈၸၢႆးဢူၺ် ၼႂ်းၸႂ်မႄႈၼႆႉ ႁွၼ်ႉမႆႈတၢၼ်ႇလႂ်ဢၼ်ဝႃႈၼၼ်ႉ လုၵ်ႈတႄႉတေဢမ်ႇႁူႉ ႁူင်းသဝ်းၵူၼ်းထဝ်ႈဢၼ်ပိူၼ်ႈလၢတ်ႈၵၼ်ၼၼ်ႉ တွၼ်ႈတႃႇမႄႈၶဝ်တႄႉ မိူၼ်တၢင်းတီႈဢၼ်ၵူၼ်းပၢႆႈၽေးၶဝ် ယူႇသဝ်းၼၼ်ႉဢိူဝ်ႈ ဢမ်ႇမီးမႄႈၵေႃႉလႂ် တေၶႂ်ႈၽၢတ်ႇယၢၼ်ၵၼ်တင်းလုၵ်ႈတူဝ်ၸဝ်ႈၵဝ်ႇလေႃႇ ဢၼ်မီးလုၵ်ႈၵိူတ်ႇဢွၵ်ႇတွင်ႉယူႇသေ မႃးယူႇတီႈႁူင်းသဝ်းၵူၼ်းထဝ်ႈၸိူဝ်းၼၼ်ႉ မႄႈဢီးလူၶဝ်ၼႃႇဢိူဝ်ႈ သင်မိူဝ်ႈလဵၵ်ႉၼၼ်ႉ သင်မႄႈဢဝ်ၵႂႃႇဝႆႉ ႁူင်းသဝ်းလုၵ်ႈဢွၼ်ႇၽၢၼ်ပေႃႈမႄႈၼႆ သင်လုၵ်ႈၵေႃႉယႂ်ႇမႃး လုၵ်ႈတေၸႂ်လမ်မႄႈတႄႉယဝ်ႉၼေႃ မီးပေႃႈမႄႈယူႇသေ ႁဵတ်းသင်လႄႈမႃးဝႆႉႁူင်းသဝ်းလုၵ်ႈဢွၼ်ႇၽၢၼ်ပေႃႈမႄႈလႃႇၼႆသေ လုၵ်ႈတေၸႂ်လမ် ၸဵပ်းၸႂ်ၼိူဝ်မႄႈဢိူဝ်ႈ ဢၼ်ပဵၼ်ယူႇယၢမ်းလဵဝ်ၵေႃႈ ပဵၼ်ၼင်ႇၼႆယဝ်ႉလုၵ်ႈၸၢႆး မီးလုၵ်ႈဢွၵ်ႇတွင်ႉ ဢၼ်ဢဝ်ဢသၢၵ်ႈလႅၵ်ႈသေၵိူတ်ႇမႃးယူႇသေတႃႉ လုၵ်ႈဢဝ်မႄႈမႃးဝႆႉတီႈ ႁူင်းသဝ်းၵူၼ်းထဝ်ႈလႆႈယူႇၼေႃႈ မႄႈဢမ်ႇၸႂ်လမ်လုၵ်ႈၵူၺ်းၼႃ သင်လုၵ်ႈၸၢႆးတေၵတ်းယဵၼ်ၸႂ်ၸိုင် မႄႈၵေႃႈပဵင်းပေႃးၸႂ်ယဝ်ႉ '

ဢဝ်လွင်ႈတၢင်းဝူၼ်ႉသေယဝ်ႉ ၶဝ်ႈမႃးၼႂ်းႁူင်းသဝ်းၵူၼ်းထဝ်ႈယူႇ ၽွင်းၸၢႆးသႅင်ႁၵ်ႉၵေႃႈ ၸွမ်းသူင်ႇႁွင်ႈဢၼ်မႄႈမၼ်းတေလႆႈယူႇသဝ်းၼၼ်ႉ မၼ်းလႆႈႁၼ် ၵမ်ႈၽွင်ႈၵေႃႈတူၺ်း ꩪီးဝီးယူႇ ၵမ်ႈၽွင်ႈၵေႃႈတူၺ်းတင်းသၢႆတႃဢၼ်ၸႂ်လဵၵ်ႉယူႇ ၵေႃႉလႂ်ၵေႃႈ ဢမ်ႇႁၼ်မီးတၢင်းသိူဝ်းသေၵေႃႉ ၸၢႆးသႅင်ႁၵ်ႉၵေႃႈ ၶပ်ႉၶိုင်ပၼ်တီႈယူႇ ၼႂ်းႁွင်ႈမႄႈမၼ်းၶႅမ်ႉလႅပ်ႈယဝ်ႉၵေႃႈ သင်ႇလၢတ်ႈမႄႈမၼ်းသေ -

" မႄႈဢူၺ် လုၵ်ႈတေၵႂႃႇၵွၼ်ႇၼႃ မႄႈလူဝ်ႇသင်ၵေႃႈ ၵပ်းသိုပ်ႇၸူးလုၵ်ႈၸၢႆးလႄႈၼႃႈ လုၵ်ႈၵေႃႈ တေၵႆႉꧦမႃးၸႂ်းမႄႈႁဝ်းယူႇဢေႃႈ "

" လီယဝ်ႉလုၵ်ႈၸၢႆး သင်မိူဝ်းၵေႃႈ ၾၢင်ႉလူတ်ႉၵႃး ဢိတ်းၼိုင်ႈၼႃႈ "

ၸၢႆးသႅင်ႁၵ်ႉၵေႃႈ ငွၵ်းႁူဝ်ၼေမႄႈမၼ်းၸၢႆးၶိုၼ်းသေ ၽၢတ်ႇဢွၵ်ႇမႃးယူႇယဝ်ႉ။

ထိုင်ႁိူၼ်းယဝ်ႉ လႆႈႁၼ်ၵေႃႉပဵၼ်မေးၼၢင်းမၼ်းၸၢႆးလႄႈ မႄႈမေးမၼ်း ပတ်းၽဵဝ်ႈၶွင်ႉၼွၼ်း မႄႈမၼ်းၸၢႆးသေ ဢဝ်ၶူဝ်းၶွင်မႄႈမၼ်းၸၢႆး သႂ်ႇၼႂ်းပုင်းၵူၺ်ယိူဝ်ႇယူႇယၢမ်းၼၼ် မၼ်းၸၢႆးၸင်ႇႁွင်ႉထၢမ်လင်ꧦ....

" ၼႆႉပဵၼ်လွင်ႈသင် "

" မိူၼ်ၼင်ႇသူႁၼ်ယူႇၼႆႉယဝ်ႉ ႁဝ်းပတ်းၽႅဝ်ႈၶွင်ႉမႄႈသူသေ တေႁွင်ႉမႄႈႁဝ်းမႃးယူႇပဵၼ်ၵေႃႉၼၼ်ႉၼႃႇ "

" ဢေႃ ..... ၸိူင်ႉၼႆႁႃႉ တိုၵ်ႉတႃႇမႄႈၵဝ်သမ်ႉ မႂ်းဢမ်ႇၶႂ်ႈပၼ်ယူႇၼႂ်းႁိူၼ်း တိုၵ်ႉတႃႇမႄႈမႂ်းသမ်ႉ ႁွင်ႉမႃးပဵၼ်ၵေႃႉၼႆၼေႃႈ ..... တွၵ်ႉ! မႂ်းယႃႇပေတိူဝ်ႉၶူဝ်းၶွင်မႄႈၵဝ်သေဢိတ်း ပၢႆမိုဝ်းမႂ်းၵူၺ်းၵေႃႈ ယႃႇပေတိူဝ်ႉ ဢၼ်ယူႇမိူဝ်ႈလဵဝ်ၼႆႉ ဢမ်ႇၸႂ်ႈႁိူၼ်းမႂ်း ပဵမ်ႁိူၼ်းမႄႈၵဝ်ဢိူဝ်ႈ သင်မႂ်းဢမ်ႇတဵမ်ၸႂ်ၵေႃႈ လူင်းႁိူၼ်းၵႂႃႇယၢမ်းလဵဝ်ၼႆႉလႄႈ "

ယၢမ်းမၼ်းၶဝ်ႈတူၺ်းၼႂ်းႁွင်ႈမႄႈမၼ်းၼင်ႇၼၼ် လႆႈႁၼ်ဢီႈယႃ မႄႈမၼ်းၸၢႆးၼင်ႇၼၼ် -

' ၼႆႉပဵၼ်ဢႅပ်ႇဢီႈယႃ ဢၼ်မႄႈတႃးသေၼွၼ်းၵူႈၶမ်ႈ သင်မႄႈဢမ်ႇတႃးၸိုင် ထၢင်ႇတႄႉမႄႈၵေႃႈတေဢမ်ႇၼွၼ်းလပ်းလႆႈ ဢမ်ႇပဵၼ်ဢမ်ႇပဵၼ် ၵဝ်တေဢဝ်ၵႂႃႇသူင်ႇပၼ်မႄႈၵွၼ်ႇ '

မၼ်းၸၢႆး ၼႅတ်ႈလႅၼ်ႈၵႂႃႇ တီႈမႄႈမၼ်းယူႇ ယၢမ်းမၼ်းၽႅဝ်ၵႂႃႇ တီႈမႄႈမၼ်းၸၢႆးၼၼ်ႉ လႆႈႁၼ်မႄႈမၼ်းပႆႇၼွၼ်း ၼင်ႈသေပၼ်ၵုသူဝ်ႇ ၸဝ်ႈတႃႇၼႃႉၶဝ်ႈၽၵ်းၼၼ်ႉယူႇ ယၢမ်းမႄႈမၼ်း လႆႈႁၼ်မၼ်းၶိုၼ်းၼင်ႇၼၼ် ၼႅတ်ႈၸဵတ်ႉပႅတ်ႈၼမ်ႉတႃမၼ်းသေယဝ်ႉ-

" မႃးၶိုၼ်းႁဵတ်းသင်လႃႇလုၵ်ႈၸၢႆး "

ယၢမ်းၼၼ် မၼ်းၸၢႆးဢဝ်ဢႅပ်ႇဢီႈယႃ ယဵတ်ႈသႂ်ႇၼႂ်းမိုဝ်းၵေႃႉပဵၼ်မႄႈမၼ်းယူႇ

" ဢေႃလုၵ်ႈၸၢႆးဢူၺ် ၶွင်ၼင်ႇဢႅပ်းဢီႈယႃၼႆႉၵူၺ်း ပဵၼ်သင်မႃးၶိုၼ်း ႁိပ်ႈꧦၼႅတ်ႈꧦထိုင်တၢၼ်ႇၼၢႆႉလႃႇ ၼႂ်ၽုၵ်ႈၵွႆႈမႃးပၼ်ၵေႃႈလႆႈယူႇလူး မႃးၵၢင်ၶမ်ႈၸိူင်ႉၼႆ ၽေးၼမ်ဢိူဝ်ႈၸွင်ႇႁူႉ မႄႈမႆႈၸႂ်တႃႇလုၵ်ႈဢိူဝ်ႈ "

" လုၵ်ႈမႃးပၼ်ဢဵပ်ႇဢီႈယႃဢမ်ႇၸႂ်ၶႃႈမႄႈ လုၵ်ႈတေမႃးႁပ်ႉမႄႈမိူဝ်းႁိူၼ်းၶိုၼ်းဢေႃႈ လုၵ်ႈယွၼ်းတၢင်းၽိတ်းၶိုၼ်းယူႇၼႃမႄႈ "

" ဢေႃ ..... လုၵ်ႈၸၢႆးဢူၺ် မႄႈဢမ်ႇတွၼ်ႉတၢင်ႇတၢင်းၽိတ်းၼိူဝ်လုၵ်ႈၸၢႆးၼႃ ယွၼ်ႉႁၵ်ႉလုၵ်ႈၼႃႇသေ မႄႈၶၢမ်ႇဢဝ် ဢသၢၵ်ႈလႅၵ်ႈသေ ႁွင်ႉဢဝ်လုၵ်ႈၵဝ်မႃးၼႂ်းၶူင်းၵၢင်ၼႆႉယဝ်ႉလူး တၢင်ႇလွင်ႈတေမီးလွင်ႈတႃႇလၢတ်ႈသင်ထႅင်ႈယဝ်ႉလႃႇ "

" ႁဝ်းဢွၼ်ၵၼ် ပွၵ်ႈမိူဝ်းၶိုၼ်းၼေႃႈမႄႈ "

မႄႈမၼ်းၸၢႆးၵေႃႈ ၸဵတ်ႉပၼ်ၼမ်ႉတႃ ဢၼ်ယွႆႉၸွမ်းၵႅမ်ႈမၼ်းၸၢႆးၼၼ်ႉယဝ်ႉ ၶႃမႄႈလုၵ်ႈၵေႃႈ ဢွၼ်ပွၵ်ႈမႃးႁိူၼ်းၶဝ်ၶိုၼ်းယူႇယဝ်ႉ။

ပေႃႈမႄႈဢၼ်ဝႃႈၼႆႉ လုၵ်ႈလၢင်းၼမ်ၵႃႈႁိုဝ်ၵေႃႈယဝ်ႉ ၶဝ်ႁဵတ်းလဵင်ႉ ႁႂ်ႈဢိမ်ႇတွင်ႉလႄႈ ႁဵတ်းႁႂ်ႈၸၢတ်ႈပၢၼ် ႁၢင်ႈလီလႆႈၵူႈၵေႃႉဢိူဝ်ႈ လုၵ်ႈလၢင်းၼမ်ၵႃႈႁိူဝ်ၵေႃႈယဝ်ႉ တႃႇပေႃႈမႄႈသွင်ၸဝ်ႈၼၼ်ႉ ၸၢတ်ႈပၢၼ်ဢမ်ႇႁၢင်ႈလီၵေႃႈယဝ်ႉ ႁဵတ်လဵင်ႉ ႁႂ်ႈဢိမ်ႇတွင်ႉၵူၺ်းလႃႈ ...

လုၵ်ႈလၢင်းၵူႈၵေႃႉ ႁႂ်ႈမေႃႁၵ်ႉ ပေႃႈတင်းမႄႈၸဝ်ႈၵဝ်ႇသေၵမ်း ....

ၼပ်ႉယမ်ၵူႈၵေႃႉသေ

#ဝၼ်းၼုမ်ႇ - လႃႈသဵဝ်ႈ

https://www.facebook.com/2455667501133693/posts/3213604882006614/