ၽူႈဢွင်ႇမၢၼ်ၸိုဝ်ႈလိုဝ်းတူဝ်ႈလုမ်ႈၾႃႉ

|သင်ဝႃႈလဵပ်ႈႁဵၼ်းတူၺ်း ၸၢတ်ႈပၢၼ်ၽူႈၸိူဝ်းဢၼ်ဢွင်ႇမၢၼ်ၸိုဝ်ႈလိုဝ်းတူဝ်ႈလုမ်ႈၾႃႉ ၼႆၸိုင် လဵပ်ႈႁဵၼ်းတူၺ်း ၸၢတ်ႈပၢၼ်ၸိူဝ်းၶဝ်သီႇၵေႃႉၼႆႉသေ တေၸၢင်ႊၼပ်ႉသၢင်ႈႁူႉႁၼ်လႆႈဝႃႈ တႃႇတေပဵၼ်မႃး ၽူႈဢွင်ႇမၢၼ်ၼႂ်းၸူဝ်ႈပၢၼ်ၼၼ်ႉ တေလႆႈတင်ႈၸႂ်ႁဵတ်းသၢင်ႈၸွမ်း တၢင်းသူင် (ဝႃႇသၼႃႇ)တူဝ်ၵဝ်ႇတေႉ"ဝႃႈ"ၸဵမ်မိူဝ်ႈလဵၵ်ႉၼွႆႉၼၼ်ႉလႆႈႁၼ်ၸိူဝ်းၶဝ်ၼႆယူႇ။

—————————————————————

(႑) Tiger Woods (ထၢႆႉၵႃးဝုတ်ႉ(သ်))

Tiger Woodsၼႆႉ ပဵၼ်ၽူႈၵတ်ႉၶႅၼ်ႇလူင်ႉလႅၼ်ႇ ၽၢႆႇလဵၼ်ႈ (Golf) ဢၼ်ၸိုဝ်ႈလိုဝ်းတူဝ်ႈလုမ်ႈၾႃႉၼၼ်ႉၵေႃႉၼိူင်ႈယဝ်ႉ။ လၢႆးလဵၼ်ႈဢၼ်ၼႆႉၵေႃႈ ယွၼ်ႉမၼ်းၸၢႆးသေ လႆႈၸိုဝ်ႈလိုဝ်းၸွတ်ႇတူဝ်ႈလုမ်ႈၾႃႉမႃး ထိုင်တီႈႁဵတ်းႁႂ်ႈၵူၼ်းတင်းၼမ် တိူဝ်းသူၼ်ၸႂ်ၶႂ်ႈလဵၼ်ႈ(Golf)မႃးယူႇ။ 

Tiger Woodsၼႆႉ တေႇလဵၼ်ႈ(Golf)မႃး ၸဵမ်မိူဝ်ႈဢႃႇယူႉမၼ်းၸၢႆး တိုၵ်ႉလႆႈသွင်ၶူပ်ႇၼၼ်ႉသေ ပေႃႈမၼ်းၸၢႆးပဵၼ်ၵူၼ်းၵေႃႉသွၼ်ၼႄပၼ်မႃးၸဵမ်လဵၵ်ႉၼႆယဝ်ႉ။ 

ပေႃႈမၼ်းၸၢႆးၼႆႉ ပဵၼ်ၽူႈဢၼ်သူင်လဵၼ်ႈ(Golf)တေႉ"ဝႃႈ"ၵေႃႉၼိူင်ႈသေ လွင်ႈဢၼ်Tiger Woods လႆႈဢွင်ႇမၢၼ်ၸိုဝ်ႈလိုဝ်းမႃးၼၼ်ႉၵေႃႈ ပဵၼ်ယွၼ်ႉပေႃႈမၼ်းၼႆ မၼ်းၸၢႆးယၢမ်ႈလၢတ်ႈၸႅင်ႈၼႄမႃးယူႇမိူၼ်ၵၼ်။

ပေႃႈမၼ်းၸၢႆး တႄႇသွၼ်ပၼ်လၢႆးလဵၼ်ႈ(Golf) မိူဝ်ႈTiger Woodsတိုၵ်ႉလႆႈသွင်ၶူပ်ႇၼၼ်ႉသေ ယွၼ်ႉပိူဝ်ႈ မၼ်းၸၢႆးၵေႃႈ သူၼ်ၸႂ်လႄႈ တင်ႈၸႂ် ၶတ်းၸႂ်လဵၼ်ႈၸွမ်ႉတေႉ"ဝႃႈ"။ ထိုင်ဢႃႇယူႉTiger Woods လႆႈသၢဝ်းသွင်ပီႊၵူၺ်း သမ်ႉပေႃးပဵၼ် မႃးၽူႈလဵၼ်ႈ(Golf)ၵတ်ႉၶႅၼ်ႇၸိုဝ်ႈလိုဝ်း ၸွတ်ႇတူဝ်ႈလုမ်ႈၾႃႉယူႇ တေႃႇႁၢၼ်ႉၼႆႉယဝ်ႉ။

—————————————————————

(႒) Martina Hingis (မႃႇထီးၼႃႇ ႁိၼ်းၵိသ်ႉ)

Martina Hingisၼႆႉ ၵိူတ်ႇတီႈမိူင်း  (Czechoslovakia) ၶျႅၵ်ႇၵူဝ်ႇၸလူဝ်ႇၾႄးၵီးယႃးသေ မၼ်းၼၢင်းပဵၼ်ၵေႃႉဢၼ်လဵၼ်ႈ (Tennis)တိၼ်းၼိသ်ႉ ၵတ်ႉၶႅၼ်ႇၸိုဝ်ႈလိုဝ်းတူဝ်ႈလုမ်ႈၾႃႉၵေႃႉၼိူင်ႈ။ မိူင်း ၶျႅၵ်ႇၵူဝ်ႇၸလူဝ်ႇၾႄးၵီးယႃးၼႆႉ ပဵၼ်ၸိုဝ်ႈမိူင်းမိူဝ်ႈပူၼ်ႉမႃးၼၼ်ႉသေ တေႃႈလဵဝ်တႄႉ မိူင်းၼၼ်ႉ ၶိုၼ်းပိၼ်ႇႁွင်ႉဝႃႈ (Czech Republic) ၶျႅၵ်ႇရီႇပၢၵ်ႉပလိၵ်ႉ(ၸ်)ၼႆယဝ်ႉ။ 

မႃႇထီးၼႃႇၼႆႉ တေႇလဵၼ်ႈတိၼ်းၼိသ်ႉမႃး ၸဵမ်မိူဝ်ႈဢႃႇယူႉမၼ်းၼၢင်း တိုၵ်ႉလႆႈၼိူင်ႈၶူပ်ႇၼၼ်ႉသေ မႄႈမၼ်းၼၢင်းၵေႃႈ ယၢမ်ႈပဵၼ်ၽူႈလဵၼ်ႈတိၼ်းၼိသ်ႉၵတ်ႉၶႅၼ်ႇ တီႈမိူင်း(Czech Republic) ၶျႅၵ်ႇရီႇပၢၵ်ႉပလိၵ်ႉ(ၸ်)ၵေႃႉၼိူင်ႈၼႆယူႇ။ ၸဵမ်မိူဝ်ႈမႃႇထီးၼႃႇ တိုၵ်ႉမီးၼႂ်းတွင်ႉမႄႈမၼ်းၼၼ်ႉ မႄႈမၼ်းၼၢင်းမုင်ႈမွင်းယႂ်ႇယႂ်ႇလူင်လူင်ဝႆႉဝႃႈ ပေႃးလုၵ်ႈမၼ်းၼၢင်းၵိူတ်ႇမႃး တိုၼ်းတေၽိုၵ်းပၼ် ႁႂ်ႈပဵၼ်မႃး ၽူႈလဵၼ်ႈတိၼ်းၼိသ်ႉၵတ်ႉၶႅၼ်ႇၵေႃႉၼိူင်ႈၼႆယူႇယဝ်ႉ။

မိူင်း(Czech Republic)ၶျႄႇရီႇပၢၵ်ႉပလိၵ်ႉ(သ်)ၼႆႉ မီးၼႂ်းဢူႉရေႃးပသေ မိူဝ်ႈဢၼ်မိူင်းၶဝ် တိုၵ်ႉႁွင်ႉၸိုဝ်ႈၶျႅၵ်ႇၵူဝ်ႇၸလူဝ်ႇၾႄးၵီးယႃး (Czechoslovakia)ၼၼ်ႉ ပဵၼ်မိူင်းသူဝ်ႇသျႄႇလိတ်ႉဝႆႉယဝ်ႉ။ ၵွပ်ႈၼၼ် တွၼ်ႈတႃႇလုၵ်ႈယိင်းမၼ်းၼၢင်း တေပဵၼ်မႃးၽူႈလဵၼ်ႈတိၼ်းၼိသ်ႉၸိုဝ်ႈလိုဝ်းၼႂ်းလုမ်ႈၾႃႉၼၼ်ႉ ႁူႉဝႃႈတေယၢပ်ႇယဵၼ်းၼႃႇၼႆလႄႈ ၸင်ႇဢွၼ် ၶၢႆႉယူႇတီႈမိူင်းSwitzerland ၸွမ်းလူၺ်ႈဢဝ် သုၼ်ႇလႆႈသေႃႉသွၼ်ႈတူဝ်(Political asylum)သေ သိုပ်ႇပူၵ်းပွင်ၽိုၵ်းသွၼ်ပၼ် မႃႇထီးၼႃႇ ထိုင်ပေႃးပဵၼ်မႃး ၽူႈလဵၼ်ႈတိၼ်းၼိသ်ႉ(Tennis)ၵတ်ႉၶႅၼ်ႇၸိုဝ်ႈလိုဝ်းတူဝ်ႈလုမ်ႈၾႃႉ မိူဝ်ႈဢႃႇယူႉမၼ်းၼၢင်းလႆႈ သိပ်းႁႃႈၶူပ်ႇပၢႆၵဝ်ႈလိူၼ်ၼၼ်ႉယူႇယဝ်ႉ။

တီႈၼႂ်းပိုၼ်းၼၢင်းယိင်း ဢၼ်လဵၼ်ႈတိၼ်းၼိသ်ႉၵတ်ႉၶႅၼ်ႇၸိုဝ်ႈလိုဝ်းၼႂ်းလုမ်ႈၾႃႉၼၼ်ႉ မႃႇထီးၼႃႇ ၼႆႉ ပဵၼ်ၵေႃႉဢႃႇယူႉလဵၵ်ႉသေပိူၼ်ႈသုတ်းၼႆယဝ်ႉ။

—————————————————————

(႓)  Michael Jackson (မၢႆႇၶ်ၵႃႇၵျႅၵ်ႇသၼ်ႇ)

ပေႃးမႃးတူၺ်းၽၢႆႇပၢႆးမွၼ်းၼႆၸိုင် တေလႆႈႁၼ်ၵေႃႉဢၼ်လူႉသဵင်ႈၵႂႃႇ ယဝ်ႉ ၸိုဝ်ႈႁွင်ႉ Michael Jackson ယူႇ။ မၼ်းၸၢႆး ပဵၼ်ၽူႈဢၼ်လူင်ႉလႅၼ်ႇ ၽၢႆႇၽဵင်းၵႂၢမ်း(Pop)သေ လၢႆးၵႃႈ (Moon Walk) လၢႆးၵႃႈပႆၼိူဝ်လိူၼ်ၸိူဝ်းၼႆႉၵေႃႈ ၸိုဝ်ႈလိုဝ်းတေႃႇထိုင်တေႃႈလဵဝ်လႄႈ မီးၵူၼ်းၵႃႈယိူင်ႈယူႇ တေႃႇယၢမ်းၼႆႉယဝ်ႉ။ ဢၼ်ပဵၼ်ၽဵင်းၵႂၢမ်းမၼ်းၸၢႆးၵေႃႈ ဢမ်ႇႁွၼ်ႇသဝ်ႈဝဝ်းမႃးသေပွၵ်ႈ။

Michael Jacksonၼႆႉ ၶဝ်ႈႁူမ်ႈပႃးၸွမ်း ၼႂ်းၸုမ်းတွႆႇတိုင်ႈပေႃႈမၼ်းမႃး ၸဵမ်မိူဝ်ႈဢႃႇယူႉမၼ်းၸၢႆး တိုၵ်ႉလႆႈႁႃႈၶူပ်ႇၼၼ်ႉသေ လဵတ်းတိင်ႇႁွင်ႉၵႂၢမ်းမႃးၸဵမ်လဵၵ်ႉယူႇယဝ်ႉ။ ၼႂ်းၸုမ်းတွႆႇတိုင်ႈ ဢၼ်ၶဝ်ပီႈၼွင်ႉႁူမ်ႈၵၼ်ဝႆႉၼၼ်ႉၵေႃႈ မၼ်းၸၢႆးၶဝ်ႈပႃးသေ တွႆႇတိုင်ႈႁွင်ႉၽဵင်းမႃးယူႇတႃႇသေႇ။ ဢႃႇယူႉတိုၵ်ႉမီးႁႃႈၶူပ်ႇၵူၺ်းလႄႈ ပဵၼ်ၽွင်းၶႂ်ႈဢႅဝ်ႇလႄႇလဵၼ်ႈသေတႃႉ တႃႇလဵပ်ႈႁဵၼ်းၽိုၵ်းသွၼ်တွႆႇတိုင်ႈၼၼ်ႉ ပေႃႈမၼ်းၸၢႆး လႆႈတမ်းဝႆႉပၼ်မၢႆမီႈယဝ်ႉ။ ပေႃးပူၼ်ႉပႅၼ်မၢႆမီႈၸိုင် ပေႃႈမၼ်းၸၢႆး ဢဝ်သၢႆႁၢတ်ႉဢႅဝ်(သၢႆၵႅတ်း)သေ ပေႃႉႁႅမ်မၼ်းၸၢႆးမႃး။ 

ၽိူဝ်ႇထိုင်မိူဝ်ႈMichael Jackson ဢွင်ႇမၢၼ်မႃးယဝ်ႉၵေႃႈ မၼ်းၸၢႆးလၢတ်ႈဝႃႈ သင်ပေႃႈမၼ်းၸၢႆး ဢမ်ႇတဵၵ်းၸႂ်ႉႁႂ်ႈၽိုၵ်းႁဵၼ်းမႃးၸိုင် တေဢမ်ႇပဵၼ်မႃး ၽူႈဢွင်ႇမၢၼ် ၽၢႆႇပၢႆးမွၼ်းၼင်ႇၼႆလႆႈ ၼႆယဝ်ႉ။ ၵွပ်ႈၼၼ် တႃႇေတပဵၼ်မႃးၽူႈဢွင်ႇမၢၼ်ၸိုဝ်ႈလိုဝ်းတူဝ်ႈလုမ်ႈၾႃႉၼၼ်ႉ Michael Jacksonေၵႃႈ လႆႈၽိုၵ်းမႃး ၸဵမ်မိူဝ်ႈဢႃႇယူႉတိုၵ်ႉလႆႈႁႃႈၶူပ်ႇယဝ်ႉ။

—————————————————————

(႔) Mark Zuckerberg (မၢၵ်ႉ(ၶ်)ၸူႇၵႃႇပၢၵ်ႉ(ၶ်))

Mark Zuckerberg ပဵၼ်ၵေႃႉၶူင်ႊသၢင်ႈဢွၵ်ႇ Facebook ဢၼ်ႁဝ်းၶႃႈၸႂ်ႉတိုဝ်းယူႇယၢမ်းလဵဝ်ၼႆ ၵေႃႉဢမ်ႇႁူႉ လႅပ်ႈတေဢမ်ႇပေႃးမီးၽႂ်သႄႈ။ မၼ်းၸၢႆးၵေႃႈတေႃႈၼင်ႇၼၼ် ၶဝ်ႈၸႂ်သူၼ်ၸႂ်ၼိူဝ် ၽၢႆႇComputerမႃးၸဵမ်လဵၵ်ႉသေ တေႇလဵပ်ႈႁဵၼ်း လွင်ႈProgramမႃးၸဵမ်လဵၵ်ႉယဝ်ႉ။

 ပေႃႈMark Zuckerbergၼႆႉ ပဵၼ်ၵူၼ်းၶိူဝ်း #ၵျူး/#ဢိတ်ႉသရေး သေ ပဵၼ်မေႃယႃၽၢႆႇၶဵဝ်ႈသေတႃႉ ပႃးဝႃႇသၼႃႇလဵၼ်ႈၶွမ်းၸဵမ်လဵၵ်ႉၼင်ႇၵဝ်ႇ။ ယွၼ်ႉပဵၼ်ၸၢဝ်းၶိူဝ်းၵျူး ဢၼ်မီးၾိင်ႈပေႃႈမႄႈႁူမ်ႇငမ်းၼိူဝ်လုၵ်ႈလၢင်း မိူၼ်ၼင်ႇၸၢဝ်းၶိူဝ်းၼႂ်းမိူင်းမၢၼ်ႈၼႆႉလႄႈ ၵွပ်ႈၼၼ် ဢမ်ႇမီးသုၼ်ႇတႅပ်းတတ်းႁင်းၶေႃသေ လႆႈသွၼ်ႁဵၼ်းဢဝ် ပၢႆးမေႃယႃၶဵဝ်ႈ ဢၼ်ပေႃႈမႄႈမၼ်း တဵၵ်းၸႂ်ႉႁႂ်ႈပဵၼ်ၼၼ်ႉယူႇယဝ်ႉ။

 ပေႃႈMark Zuckerberg ပဵၼ်မႃးမေႃယႃၽၢႆႇၶဵဝ်ႈယဝ်ႉသေတႃႉ တိုၵ်ႉသိုပ်ႇလဵပ်ႈႁဵၼ်းလွင်ႈၶွမ်း တေႃႇထိုင်Mark Zuckerbergပေႃးလႆႈၸဵတ်းၶူပ်ႇသေ တၢင်တူဝ်မၼ်း ၵေႃႉတေႇပူၵ်းပွင်သွၼ်ပၼ် လၢႆးတႅမ်ႈComputer Programၸိူဝ်းၼႆႉယဝ်ႉ။ Mark Zuckerbergတိုၵ်ႉလႆႈသိပ်းဢဵတ်း သိပ်းသွင်ၶူပ်ႇၵူၺ်း သမ်ႉပေႃးလူင်ႉလႅၼ်ႇၽၢႆႇၶွမ်းယူႇယဝ်ႉ။ ယွၼ်ႉၼၼ်လႄႈ ပေႃႈမၼ်းၸင်ႇယိမ်ၶူးသွၼ်ၵေႃႉၼိူင်ႈသေႁႂ်ႈသွၼ်ၼႄပၼ် လၢႆးတႅမ်ႈProgramတီႈ Mark Zuckerberg။

မၼ်းၸၢႆး တေႇတႅမ်ႈProgram ၸဵမ်မိူဝ်ႈဢႃႇယူႉတိုၵ်ႉလႆႈႁူၵ်းၶူပ်ႇသေ တေႃႇထိုင် ဢႃႇယူႉမၼ်းၸၢႆး လႆႈသိပ်းသွင်ၶူပ်ႇၵေႃႈ တိုၵ်ႉသိုပ်ႇတႅမ်ႈယူႇတိၵ်းတိၵ်း။ပေႃးပဵၼ်လုၵ်ႈဢွၼ်ႇမိူင်းႁဝ်းၼႆ ဢႃႇယူႉမွၵ်ႈၼၼ်ႉ ၵမ်ႉၼမ်တေမိုင်ႉၶႂ်ႈဢႅဝ်ႇလႄႇလဵၼ်ႈလႄႈ သင်ၸႂ်ႉၶွမ်းၵေႃႈ တေမိုင်ႉလဵၼ်ႈ(Game)ၼႂ်းမၼ်းၵူၺ်း။ ၵူၺ်းၵႃႊ #Mark Zuckerbergတႄႉ ဢမ်ႇႁဵတ်းၼၼ် Gameဢၼ်ဢူၺ်းၵေႃႉမၼ်းၶႂ်ႈလဵၼ်ႈၼၼ်ႉ မၼ်းၸၢႆးၵေႃႉၸၼ်ပၼ် #Programႁင်းၵူၺ်းယဝ်ႉ။

 မၼ်းၸၢႆးၶိုၼ်ႈႁဵၼ်းထိုင်ၸၼ်ႉသုင်ယဝ်ႉေၵႃႈ လၢႆးၸၼ်တႅမ်ႈProgramမၼ်း သမ်ႉပေႃးၸၼ်ႉသုင်ၼႃႇယဝ်ႉ ယင်းပၢႆတိူဝ်းမေႃလိူဝ်သေ ၶူးသွၼ်ၼႂ်းႁူင်းႁဵၼ်းၸၼ်ႉသုင်လူးၵွၼ်ႇ။ ၵွပ်ႈၼၼ် မၼ်းၸၢႆးဢဝ်ၶၢဝ်းယၢမ်းပွတ်းဢွၼ်ႇတွၼ်ႈၼိူင်ႈသေ ၶဝ်ႈႁဵၼ်းၼႂ်း #Colledge ဢၼ်မီးႁိမ်းၸမ်ႁိူၼ်းမၼ်းၸၢႆး။

 ဝၢႆးသေဢွင်ႇပူၼ်ႉၸၼ်ႉသုင်ယဝ်ႉၵေႃႈ ၶိုၼ်ႈၸၼ်ႉၸွမ်တီႈ #Harvard University ဢမ်ႇတၼ်းသုတ်းပီႊ ဢွၵ်ႇၸၼ်ႉၸွမ်ယဝ်ႉၵေႃႈ ၶူင်ႊသၢင်ႈ #Facebook သေ ဢွင်ႇမၢၼ်မႃး တေႃႇယၢမ်းလဵဝ်ၼႆႉယဝ်ႉ။ မၼ်းၸၢႆး ၵိူတ်ႇ မိူဝ်ႈပီႊ 1984 သေ မိူဝ်ႈဢၼ်ထိုင်တီႈဢွင်ႇမၢၼ်ၼၼ်ႉ ပဵၼ်မိူဝ်ႈပီႊ 2004 လႄႈယင်းတိုၵ်ႉလႆႈသၢဝ်းၶူပ်ႇၵူၺ်းၵွၼ်ႇ။

တေၸၢင်ႊလဵပ်ႈႁဵၼ်းႁူႉႁၼ် တီႈၸိူဝ်းၶဝ်လႆႈၸိူင်ႉႁိုဝ်???

ၽၢႆႇပၢႆးမွၼ်းႁိုဝ် ၽၢႆႇပၢႆးမၢၵ်ႈမီး ဢမ်ႇၼၼ် ၽၢႆႇITဢမ်ႇဝႃႈ ပေႃးမႃးၼပ်ႉသၢင်ႈတူၺ်း ၽူႈၸိူဝ်းဢၼ်ႁွတ်ႈထိုင်တီႈ လွင်ႈဢွင်ႇမၢၼ်ၸိူဝ်းၼၼ်ႉၼႆၸိုင် တေလႆႈႁူႉဝႃႈ ၸိူဝ်းၶဝ်လႆႈပၵ်းၸႂ်လႄႈ လႆႈၶတ်းၸႂ်လဵပ်ႈႁဵၼ်းႁဵတ်းသၢင်ႈမႃး ၸဵမ်မိူဝ်ႈလဵၵ်ႉလဵၵ်ႉၼႆယူႇ။ လိူဝ်ၼၼ်ႉ လၢႆးဢၼ်ပေႃႈမႄႈပူၵ်းပွင်ပၼ်ၼၼ်ႉၵေႃႈ လမ်ႇလွင်ႈမိူၼ်ၵၼ်။ လုၵ်ႈဢွၼ်ႇသူၼ်ၸႂ်ၶႂ်ႈႁဵတ်းၶႂ်ႈသၢင်ႈယူႇသေတႃႉ ပေႃးပေႃႈမႄႈဢမ်ႇၵမ်ႉၸွႆႈလႄႈ ဢမ်ႇၼႄပၼ်သဵၼ်ႈတၢင်းၵေႃႈ တေယၢပ်ႇတႃႇၶိုပ်ႈၼႃႈယူႇ။ 

ၵွပ်ႈၼၼ် တႃႇတေပဵၼ်မႃးၽူႈဢွင်ႇမၢၼ်ထိုင်တီႈၵေႃႉၼိူင်ႈၼႆႉ လွၵ်းလၢႆးပေႃႈမႄႈပူၵ်းပွင်ပၼ်ၼႆႉ လမ်ႇလွင်ႈတေႉတေႉ။ ယူႇတီႈပဵၼ်ပေႃႈမႄႈသေ တိုၼ်းလူဝ်ႇလႆႈၾၢင်ႉႁူႉဝႃႈ လုၵ်ႈလၢင်းၸဝ်ႈၵဝ်ႇ သူၼ်ၸႂ်ၶဝ်ႈၸႂ်ၼိူဝ်လွင်ႈသင်ၼႆသေ ပေႃးႁူႉယဝ်ႉၵေႃႈ တေလႆႈသိုပ်ႇပၢၵ်ႈၼႄပၼ် သဵၼ်ႈတၢင်းဢၼ်တေႁၼ်တီႈယိူင်းမၢႆၶဝ်ၼၼ်ႉယူႇ။ ပေႃးယင်းပေႃႈမႄႈသမ်ႉ ပူၵ်းပွင်ၼႄပၼ်သဵၼ်ႈတၢင်းယူႇသေတႃႉ ၽၢႆႇလုၵ်ႈလၢင်းသမ်ႉ ဢမ်ႇၶတ်းၸႂ်သေ ယွမ်းၵၢၼ်ႉထွႆလင်ပႅတ်ႈၵေႃႈ တေဢမ်ႇထိုင်တီႈဢွင်ႇမၢၼ်လႆႈၼင်ႇၵဝ်ႇ။

ယွၼ်ႉပိူဝ်ႈၼႆ တွၼ်ႈတႃႇတေထိုင်တီႈဢွင်ႇမၢၼ်လႆႈၼၼ်ႉ လူဝ်ႇႁႅင်းလၢႆ"ႁႅင်း ၸဵမ်ႁႅင်းထၢတ်ႈၸႂ်ပေႃႈမႄႈ ႁႅင်းၵမ်ႉၸွႆႈ လႄႈႁႅင်းၸႂ်ယူႇ ဢၼ်လမ်ႇလွင်ႈသုတ်းတႄႉ ပဵၼ်ႁႅင်းၸႂ်ၼၼ်ႉယဝ်ႉ သင်မေႃပၼ်ႁႅင်းၸႂ်ပိူၼ်ႈဢမ်ႇဝႃႈတူဝ်ၸဝ်ႈၵဝ်ႇၸိုင်တိုၼ်းတေထိုင်တီႈလႆႈယူႇဢမ်ႇႁၢင်ႉ။

—————————————————————

ၼပ်ႉယမ်ယႂ်ႇၼမ်ထိုင် ၽူႈသူင်လူလိၵ်ႈတင်းသဵင်ႈယူႇဢေႃႈ....

ပိၼ်ႇတႅမ်ႈ-မူၺ်ၼုမ်ႇႁွမ်(မိူင်းၶိူဝ်း)