ၸိူၼ်ႇလုၵ်ႉမႃးလႄႈ
ၸိူၼ်ႇလုၵ်ႉမႃးလႄႈ
==============
ၵူၼ်းၵေႃႉဢၼ်ႁၢင်ႊလီၼၼ်ႉ မၼ်းၵေႃႈဢမ်ႇၸႂ်ႈ
ယူႇတႃႇသေႇလေႃႇဝႃႈ ၼႃႈႁိူၼ်းၶဝ်တေမီးတၢင်းသိူဝ်းၸႂ်
ၵူၼ်းၵေႃႉဢၼ်မီးၼႃႈႁိူၼ်းဢၼ်မီးတၢင်းသိူဝ်းၼၼ်ႉ
မၼ်းၵေႃႈဢမ်ႇၸႂ်ႈတႃႇသေႇလေႃႇဝႃႈ ...
ၼႃႈၵၢၼ်ၶဝ်တေယႂ်ႇသုင် ။
ၵူၼ်းၵေႃႉဢၼ်ၼႃႈၵၢၼ်ယႂ်ႇသုင်ၼၼ်ႉ
မၼ်းၵေႃႈဢမ်ႇၸႂ်ႈတႃႇသေႇလေႃႇဝႃႈ ၶဝ်တေမီး
တၢင်းသိူဝ်းၸႂ် လႄႈမီးလွင်ႈလႅဝ်းၼႂ်းၽဝၶဝ်ၼၼ်ႉ။
ၼႂ်းၽဝၸူဝ်ႈပၢၼ်ၵူၼ်းႁဝ်းၼႆႉ မီးတင်းၽၢႆႇတုၵ်ႉ
လႄႈၽၢႆႇသိူဝ်းယဝ်ႉ။ ယႃႇပေၵုမ်ႇဢဝ်ၽဝၸဝ်ႈၵဝ်ႇ
ၵႂႃႇတႅၵ်ႈၼိူင်းၸွမ်းၽႂ်ယူႇယဝ်ႉ။
ႁူဝ်ၸႂ်ႁဝ်းလုၵ်ႈလဵၵ်ႉဢွၼ်ႇဢိတ်းၼိုင်ႈၵူၺ်း
တႅၵ်ႈၼိူင်းၼႃႇၵေႃႈ ႁိုဝ်ႉၸႂ်လၢႆလၢႆၵူၺ်းဢိူဝ်ႈ။
ဢၼ်ၸဝ်ႈၵဝ်ႇပဵၼ်တၢင်းတုၵ်ႉတၢင်းၶီယူႇၼၼ်ႉ
ပဵၼ်ယွၼ်ႉၵွပ်ႈဝႃႈၸဝ်ႈၵဝ်ႇသႂ်ႇၸႂ်ဝူၼ်ႉၼမ်ၸွမ်း
ၼႃႇပူၼ်ႉတီႈၼၼ်ႉယဝ်ႉ။ ဢၼ်ၼၼ်ႉၵေႃႈဝႃႈတေ
ဢုပ်ႇပိူင်ႇ ဢၼ်ၼႆႉၵေႃႈဝႃႈတေႁပ်ႉႁွင်းဝႆႉ
ၽဝၸူဝ်ႈပၢၼ်ၵူၼ်းႁဝ်းၼႆႉ ဢမ်ႇမီးၽႂ်ဢၼ်ၶႅမ်ႉလႅပ်ႈ
လႆႈမိူၼ်ၼင်ႇၸႂ်မုင်ႈမွင်းၵူႊလွင်ႈလွင်ႈလေႃႇ ....
ယွၼ်ႉဝႃႈမီးမိူဝ်ႈလႆႈၵေႃႈႁူႉတိုၼ်းမီးမိူဝ်ႈသုမ်း
မီးမိူဝ်ႈထူပ်းၵေႃႈႁူႉတိုၼ်းမီးမိူဝ်ႈယၢၼ်
မီးမိူဝ်ႈၽၢၼ်ၵေႃႈႁူႉတိုၼ်းမီးမိူဝ်ႈမီး
မီးမိူဝ်ႈႁၵ်ႉၵေႃႈႁူႉတိုၼ်းမီးမိူဝ်ႈၸင်းၵၼ်ယဝ်ႉ
ဢမ်ႇမီးၽႂ်ဢၼ်တေလႆႈလီၵႂႃႇတေႃႇၸူဝ်ႈလေႃႇ ။
ၼႂ်းၽဝႁဝ်းၼႆႉ
တိုၼ်းတေလႆႈထူပ်းၺႃးၵူၼ်းတင်းၼမ်
တင်းလၢႆဢမ်ႇႁၢင်ႉယဝ်ႉ ။
မၢင်ၵေႃႉ ယၢင်ႈၶဝ်ႈမႃးတႃႇပဵၼ်ဢူၺ်းၵေႃႉ
မၢင်ၵေႃႉ ယၢင်ႈၶဝ်ႈမႃးတႃႇပဵၼ်ၵေႃႉႁၵ်ႉ
မၢင်ၵေႃႉ ယၢင်ႈၶဝ်ႈမႃးတႃႇပဵၼ်ၵူႊႁူမ်ႈၸၢတ်ႈပၢၼ်
မၢင်ၵေႃႉ ယၢင်ႈၶဝ်ႈမႃးတႃႇပဵၼ်ၵူႊၶေႉၶဵင်ႇ
မၢင်ၵေႃႉ ယၢင်ႈၶဝ်ႈမႃးတႃႇပဵၼ်ၽူႈၶဵၼ်
မၢင်ၵေႃႉ ယၢင်ႈၶဝ်ႈမႃးယဝ်ႉၵေႃႈပူၼ်ႉၵႂႃႇ
ဝႆႉမိူၼ်ၼင်ႇၵူၼ်းပႅၵ်ႇၼႃႈၼၼ်ႉယဝ်ႉ။
ၵူၼ်းၼိူဝ်လူၵ်ႈၵမ်ႇၽႃႇၼႆႉမီးတင်းၼမ်တင်းလၢႆ
ထူပ်းၺႃးၵူၼ်းၵေႃႉဢၼ်ႁဵတ်းႁႂ်ႈၽိတ်းပိူင်ႈ
သွင်သၢမ်ၵေႃႉၵူၺ်း တေၵႂႃႇသူၼ်ၸႂ်ႁဵတ်းသင်မၼ်း
ယွၼ်ႉဝႃႈတိုၵ်ႉမီးၵူၼ်းလီလီ ဢၼ်ပႂ်ႉႁဝ်းဝႆႉယူႇ
တင်းၼမ်တင်းလၢႆ
ႁဝ်းၵုမ်ႇယုမ်ႇဝႃႈ ...တိုၵ်ႉမီးၶၢဝ်းယၢမ်းထႅင်ႈတင်းၼမ်ယူႇ
ၵူၺ်းၵႃႈမၢင်ၶၢဝ်းယၢမ်းၵေႃႈ ...ပိူင်ႈၵႂႃႇဢိတ်းၼိုင်ႈ
ၵူၺ်းၵေႃႈ .... ၽိတ်းပိူင်ႈတင်းၸူဝ်ႈတင်းၸၢတ်ႈယဝ်ႉ။
ႁဝ်းၵုမ်ႇဝူၼ်ႉၼမ်ယူႇဝႃႈ ....
ပွၵ်ႈတေမႃးၼၼ်ႉတေႁဵတ်းၸိူင်ႉႁိုဝ်လီ
ဝၼ်းမိူဝ်းၼႃႈၼၼ်ႉလူးတေပဵၼ်ၸိူင်ႉႁိုဝ်ၼႆယူႇ။
ၵူၺ်းၵႃႈၸွင်ႇႁဝ်းသမ်ႉယၢမ်ႈဝူၼ်ႉၽွင်ႈႁိုဝ်ဝႃႈ
ပွၵ်ႈတေမႃးလႄႈဝၼ်းမိူဝ်းၼႃႈၼၼ်ႉ
ၸွင်ႇႁဝ်းသမ်ႉတေတိုၵ်ႉမီးလူမ်းထူၺ်ႈၸႂ်ယူႇႁိုဝ်?
ပေႃးၸိူင်ႉၼၼ် မိူဝ်ႈလဵဝ်ၼႆႉ ၶၢဝ်းယၢမ်းၼႆႉ
ဝၼ်းမိူဝ်ႈၼႆႉ သင်ဝႃႈၸဝ်ႈၵဝ်ႇတိုၵ်ႉႁဵတ်းသေလွင်ႈလွင်ႈ
ယူႇၵေႃႈ ၶႅၼ်းတေႃႈၶတ်းၸႂ်ႁဵတ်းမၼ်းႁႂ်ႈတဵမ်ထူၼ်ႈလႄႈ
ႁဝ်းတၵ်းတေပၼ်လွင်ႈသူၼ်ၸႂ်ၸွမ်းလွင်ႈဢၼ်
ဢမ်ႇမီးဝၼ်းတေလႆႈဢုပ်ႉပိူင်ႇၼၼ်ႉယူႇၵူႊၶၢဝ်းယၢမ်းယဝ်ႉ
ယွၼ်ႉဝႃႈၶႂ်ႈလႆႈ ၵူၺ်းၵေႃႈဢမ်ႇမီးဝၼ်းတေလႆႈ
လႄႈၸင်ႇလႆႈဝူၼ်ႉဝႃႈလွင်ႈၼၼ်ႉမၼ်းတေမီးၵႃႊၶၼ်
တေႉတေႉၼၼ်ႉယဝ်ႉ။
ၵူၺ်းၵႃႈမိူဝ်ႈလႆႈမၼ်းမႃးဢုပ်ႇပိူင်ႇလီလီယဝ်ႉ
ထိုင်မႃးၵမ်းၼၼ်ႉၵေႃႈ ဢမ်ႇႁူႉထိုင်ၵႃႊၶၼ်မၼ်း
သေဢိတ်း ...
ယဝ်ႉမၼ်းၵေႃႈဢမ်ႇၸႂ်ႈလႄႈဝႃႈတေလီလိူဝ်သေ
ဢၼ်မီးဝႆႉယူႇၼၼ်ႉသႄႈ ....
ၵူၼ်းၼေႃၵူၼ်း သင်ဝႃႈမေႃပဵင်းပေႃးၸႂ် ၼႂ်းလွင်ႈ
ဢၼ်မီးယူႇၼၼ်ႉၵေႃႈ ..... တၢင်းသိူဝ်းၸႂ်ဢၼ်ဝႃႈၼၼ်ႉ
မၼ်းၵေႃႈဢမ်ႇႁႃယၢပ်ႇသေဢိတ်း ။
ၵူၼ်းႁဝ်းၵမ်ႉၼမ်ၼႆႉ တေသူပ်းဝႆးတေလၢတ်ႈသင်ၵေႃႈ
ဢမ်ႇတူၺ်းၵူၼ်းႁိမ်းႁွမ်းသေ ၵႆႉလၢတ်ႈၸူၵ်ႉတႅင်းတမ်
ဢူၵ်းမၢၵ်ႇႁူဝ်ၸႂ်ၵူၼ်းႁိမ်းၶၢင်ႈယူႇတႃႇသေႇယဝ်ႉ။
ထိုင်ဝၼ်းၼိုင်ႈမႃးဝူၼ်ႉလႆႈၵေႃႈလီဢၢႆၸႂ်တေႉယဝ်ႉ
ဝူၼ်ႉဢဝ်ႁင်းၵူၺ်းဝႃႈ ....
လွင်ႈယွမ်းၼွမ်းၽိတ်းၼႆႉတေၸွႆႈႁဵတ်းႁႂ်ႈၶဝ်ပွၵ်ႈမႃးလီ
မိူၼ်ၵဝ်ႇၶိုၼ်း .... ၼၼ်ႉမၼ်းၵေႃႈဢမ်ႇၸႂ်ႈ
လွင်ႈငၢႆႈတႃႇၵူၼ်းႁဝ်းသႄႈ ။
ၵႂၢမ်းလၢတ်ႈၵူၼ်းႁဝ်းၼႆႉ ပဵၼ်ဝႆႉမိူၼ်ၼင်ႇလႅဝ်း
ၽၢႆၶူပ်း ဢၼ်ပႂ်ႉသဵပ်ႇတႅင်းတမ်ၵူၼ်း တူၼ်ႉလိူတ်ႈ
ဢၼ်ဢမ်ႇမီးႁွႆးၸဵပ်းသင်ၼၼ်ႉယဝ်ႉ ....
ၵူၺ်းၵႃႈ ... ယွၼ်းႁႂ်ႈတွင်းဝႆႉၶႃႈၼႃ
မိူဝ်ႈယၢမ်းလႂ်ဢၼ်သူတေၸၵ်ႉလႅဝ်းမၢၵ်ႈၼၼ်ႉ
ဢွၵ်ႇမႃး ၸႂ်ႉမၼ်းမိူဝ်ႈလႂ်ၵေႃႈယဝ်ႉ
ႁွႆးၸဵပ်းဢၼ်မၢတ်ႇလိုၵ်ႉထိုင်ၸႂ်ၼၼ်ႉ
တႃႇတေယူတ်းယႃႁႂ်ႈၶႅၼ်းမိူၼ်ၵဝ်ႇတေႉတေယၢပ်ႇဝႆႉယူႇ။
ယုမ်ႇယမ်ဝႃႈတေပဵၼ်တွၼ်ႈသွၼ်
တွၼ်ႈတႃႇၵူၼ်းႁဝ်းၵူႊၵေႃႉယူႇၶႃႈ။
=======================
ၼပ်ႉယမ်ထိုင်ၽူႈလူလိၵ်ႈတၢင်းသဵင်ႈၶႃႈ။
ပိၼ်ႇ - ၶႅၵ်ႇၸူဝ်ႈၶၢဝ်း [ မိူင်းသူႈ ]
