#လွၵ်းလၢႆးလုၵ်ႉၽိုၼ်ႉ
ၽူႈၶႅၼ်ႇတႅမ်ႈမၢႆမီႈမိူင်းဢိၼ်ႇတိယ Dr. ဢႅမ်ႇပဵတ်ႇၵႃႇလၢတ်ႈဝႃႈ ''ၼႂ်းမိူင်းဢိၼ်ႇတိယႁဝ်းၶႃႈၼႆႉ ဢမ်ႇမီးလွင်ႈၽွမ်ႉႁူမ်ႈၵၼ် ၵုမ်ႇၸႅၵ်ႇၸၼ်ႉထၢၼ်ႈၵူၼ်းမီး ၵူၼ်းၽၢၼ် ၵုမ်ႇၸႅၵ်ႇၸၼ်ႉထၢၼ်ႈၵူၼ်းမီးပၺ်ႇၺႃႇ ဢမ်ႇမီးပၺ်ႇၺႃႇသေ ၵူၼ်းမိူင်းဢိၼ်ႇတိယႁဝ်းသမ်ႉၵႂႃႇယွၼ်း လွင်ႈသုၼ်ႇလႆႈၽဵင်ႇပဵင်းၵၼ် လွင်ႈလွတ်ႈတႂ်ႈဢင်းၵိတ်းယူႇၼၼ်ႉ ၽႂ်သမ်ႉတေမီးလွင်ႈၼပ်ႉယမ်လႄႈ ပၼ်လွင်ႈလွတ်ႈလႅဝ်းတႂ်ႈၶုၼ်ဢင်းၵိတ်း ယွၼ်ႉႁဝ်းၶႃႈ ဢမ်ႇမီးလွင်ႈၽွမ်ႉႁူမ်ႈၵၼ်လႄႈ ၼိုင်ႈၶႅၼ်းထၢင်ႇႁၢင်ႈဢင်းၵိတ်းပေႉၵိၼ်ႁဝ်းယူႇယဝ်ႉ။
Dr. ဢႅမ်ႇပဵတ်ႇၵႃႇၼႆႉ ယွၼ်ႉပိူဝ်ႈမၼ်းၸဝ်ႈႁၼ်ထိုင်ဝႃႈ ''လွင်ႈၽွမ်ႉႁူမ်ႈၼႆႉ လမ်ႇလွင်ႈတႃႇၸိူဝ်ႉၸၢတ်ႈတႄႉတႄႉ၊ လွင်ႈၽွမ်ႉႁူမ်ႈၼႆႉ လမ်ႇလွင်ႈတႃႇဝၢၼ်ႈမိူင်းတႄႉတႄႉ၊ လွင်ႈၽွမ်ႉႁူမ်ႈၼႆႉ ပဵၼ်ၶိူင်ႈလၢၵ်ႈၼၢၵ်ႈဢၼ်ၽူႈၶဵၼ်ၵူဝ်းႁဝ်း''ၼႆႉယူႇ။ Dr. ဢႅမ်ႇပႅတ်ႇၵႃႇႁၼ်ထိုင်ဝႃႈ ပေႃးၶႂ်ႈႁႂ်ႈဝၢၼ်ႈမိူင်းလွတ်ႈလႅဝ်းၸိုင် ဢွၼ်တၢင်းသုတ်းလူဝ်ႇသၢင်ႈလွင်ႈၽွမ်ႉၼႂ်းၸိူဝ်ႉၸၢတ်ႈ လူဝ်ႇပူၵ်းပွင်ပၼ်ပၢႆးပၺ်ႇၺႃႇၵူၼ်းမိူင်း ႁႂ်ႈပွင်ႇၸႂ်ၼိူဝ်ၵၢၼ်ၽွမ်ႉႁူမ်ႈၸိူဝ်ႉၸၢတ်ႈၼႆယူႇ။
မၼ်းၸဝ်ႈႁၼ်ဝႃႈ ပေႃးဢမ်ႇမီးလွင်ႈၽွမ်ႉႁူမ်ႈၸိုင် လႆႈလွတ်ႈလႅဝ်းမႃးၵေႃႈ လွင်ႈလွတ်ႈလႅဝ်းၼၼ်ႉ ၵူၼ်းမိူင်းႁဝ်းၶႃႈတေဢမ်ႇလႆႈၸၢမ်ႇ ၸိူဝ်းၶိူဝ်းၵူၼ်းၽၢၼ် ၵူၼ်းၸၼ်ႉတႅမ်ႇၵေႃႈ တေလႆႈၶၢမ်ႇၶိုဝ်းၸၼ်ႉသုင် ၵူၼ်းမီးၶဝ် ၶီႇၼဵၵ်းတဵၵ်းတဵင်ပဵၼ်ၶႃႈလဵပ်းၶဝ်ႈထႅင်ႈယူႇ လႆႈလွတ်ႈလႅဝ်းမႃးၵေႃႈ ဢမ်ႇပႆႇၵိုင်ႇ။
ယွၼ်ႉပိူဝ်ႈ Dr. ဢႅမ်ႇပဵတ်ႇၵႃႇႁၼ်ဝႆႉ သဵၼ်ႈတၢင်းတႃႇၽွမ်ႉႁူမ်လႄႈ ၼႂ်းၽဝပၢၼ်လုၵ်ႉၽိုၼ်ႉမၼ်းၸဝ်ႈၼႆႉ ဢွၼ်တၢင်းသုတ်းမၼ်းသၢင်ႈလွင်ႈၽွမ်ႉႁူမ်း ၼႂ်းၶိူဝ်းၵူၼ်းၽၢၼ်ႇ သၢင်ႈလွင်ႈၽွမ်ႉႁူမ်ႈၵူၼ်းၸိူဝ်းႁၢမ်းသုၼ်ႇလႆႈသုၼ်ႇပဵၼ် ဢမ်ႇလႆႈၶၢမ်ႇၸႅၵ်ႇၸၼ်ႉထၢၼ်ႈ၊ တူၵ်ႉသူၼ်းႁႂ်ႈၶိူဝ်းၵူၼ်းၽၢၼ် ဢွၼ်ၵၼ်သွၼ်ပၺ်ႇၺႃႇတၢင်းမေႃ တႃႇမေႃပိုင်ႈဢိင်တူဝ်ၸဝ်ႈၵဝ်ႇ၊ တူၵ်းသူၼ်းႁႂ်ႈၶိူဝ်းၸၼ်ႉသုင် လႄႈ ၶိူဝ်းၸၼ်ႉတႅမ်ႈမီးလွင်ႈႁူမ်ႈၵၼ် ယႃႇပေလႆႈၸႅၵ်ႇၸၼ်ႉထၢၼ်ႈၵၼ်ယူႇ။
Dr. ဢႅမ်ႇပဵတ်ႇၵႃႇၼႆႉ ပဵၼ်ၶူးသွၼ်ႁူင်းႁဵၼ်း လႄႈ ၸၼ်ႉၸွမ်ၵေႃႉၼိုင်ႈ၊ ပဵၼ်ၽူႈလူင်ႉလႅၼ်ႇၽၢႆႇမၢႆမီႈၵေႃႉၼိုင်ႈ၊ လႆႈၸုမ်ႈၶူးလူင် (ပႃႇရၵူႇ Ph.D) ၽၢႆႇပၢႆးမၢၵ်ႈမီး လႄႈ ၵၢၼ်မိူင်းၵေႃႉၼိုင်ႈ ယွၼ်ႉပိူဝ်ႈမၼ်းၸဝ်ႈလူင်ႉၵၢၼ်မိူင်းၵေႃႉၼိုင်ႈသေ မၼ်းၸဝ်ႈၶတ်းၸႂ်ၶဝ်ႈႁဵတ်းပဵၼ်တႅၼ်းၽွင်းသၽႃးမႃး။ ႁွတ်ႈထိုင်ၼႂ်းသၽႃး ပႃႇလီႇမၢၼ်ႇယဝ်ႉ မၼ်းၸဝ်ႈၶတ်းၸႂ်လွင်ႈၽွမ်ႉႁူမ်ႈၸိူဝ်ႉၸၢတ်ႈ ယွၼ်ႉပိူဝ်ႈလူင်ႉလႅၼ်ႇၽၢႆမၢႆမီႈလႄႈ မၼ်းၸဝ်ႈလႆႈပဵၼ်ၽူႈဢွၼ်ႁူဝ်ၶဵၼ်ႇတႅမ်ႈမၢႆမီႈၸိုင်ႈမိူင်းဢိၼ်ႇတိယသေ တေႃႇသူႈၵၢၼ်လုၵ်ႉၽိုၼ်ႉမႃး တေႃႇထိုင်မိူင်းဢိၼ်ႇတိယ လွတ်ႈလႅဝ်းမႃးယူႇယဝ်ႉ။
Dr. ဢႅမ်ႇပဵတ်ႇၵႃႇၼႆႉ မိူဝ်ႈတႄႇပဵၼ်ၵူၼ်းၼပ်ႉယမ် ၽႃႇသႃႇႁိၼ်ႇတူႇၵေႃႉၼိုင်ႈ ၼႂ်းၽႃႇသႃႇႁိၼ်ႇတူႇၼၼ်ႉ ယွၼ်ႉပိူဝ်ႈၵိူတ်ႇမႃးၼႂ်းၶိူဝ်းၵူၼ်းၸၼ်ႉတႅမ်ႇ ၶိူဝ်းၵူၼ်းၽၢၼ် ဢတိသုတ်ႉတၵေႃႉၼိုင်ႈ ၸင်ႇလႆႈၶၢမ်ႇၶိူဝ်းၵူၼ်းၸၼ်ႉသုင်ၶဝ် ၶီႇၼဵၵ်းတဵင် ၸႅၵ်ႇၸၼ်ႉထၢၼ်ႈ ႁၢမ်းသုၼ်ႇလႆႈသုၼ်ႇပဵၼ်မႃးတင်းၼမ်ႉ ယွၼ်ႉပိူဝ်ႈလႆႈၸႅၵ်ႇၽေၸၼ်ႉထၢၼ်ႈၵူၼ်း လႄႈ ႁၢမ်းသုၼ်ႇလႆႈသုၼ်ႇပဵၼ် မၼ်းၸဝ်ႈၸင်ႇၶတ်းၸႂ်သွၼ်ပၺ်ႇၺႃႇ ႁႃလွင်ႈၽွမ်ႉႁူမ်ႈၸိူဝ်ႉၸၢတ်ႈ တိုၵ်းဢဝ်သုၼ်ႇလႆႈၽဵင်းပဵင်းမႃးယူႇ။
ၵမ်းလိုၼ်းသုတ်း Dr. ဢႅမ်ႇပဵတ်ႇၵႃႇၼႆႉ လုၵ်ႉတီႈၽႃႇသႃႇႁိၼ်ႇတူႇဢၼ်ၸႅၵ်ႇၸၼ်ႉထၢၼ်ႈၶိူဝ်းၵူၼ်းသေ ၶၢႆႉၶဝ်ႈမႃးယုမ်ႇယမ် ပုတ်ႉထၽႃႇသႃႇယူႇယဝ်ႉ။ ဝၼ်းဢၼ် Dr. ဢႅမ်ႇပဵတ်ႇၵႃႇ ၶဝ်ႈမႃးပဵၼ်ပုတ်ႉထၽႃႇသႃႇၼၼ်ႉ ၵူၼ်းမိူင်းဢိၼ်ႇတိယ ၶိူဝ်းၵူၼ်းၸၼ်ႉတႅမ်ႇ ဢတိသုတ်ႉတၶဝ်ၵေႃႈ ၵူၼ်းႁႃႈသႅၼ် (5 -သႅၼ်) ၶဝ်ႈမႃးပဵၼ်ပုတ်ႉထၽႃႇသႃႇၸွမ်းမၼ်းၸဝ်ႈဝၼ်းလဵဝ်ယူႇယဝ်ႉ။ ဝၼ်းဢၼ် Dr. ဢႅမ်ႇပဵတ်ႇၵႃႇ ၶဝ်ႈမႃးပဵၼ်ပုတ်ႉထၽႃႇသႃႇၼၼ်ႉ တေလႆႈဝႃႈ သႃႇသၼႃႇပုတ်ႉထၸဝ်ႈ ၶိုၼ်းႁိူဝ်ႈႁိူင်းမႃးၼႂ်းမိူင်းဢိၼ်ႇတိယ ပၢၼ်ႁူဝ်ပၢၵ်ႇသၢဝ်းၼႆႉယူႇယဝ်ႉ။
ၵူၼ်းမိူင်းဢိၼ်ႇတိယၶဝ်ယုမ်ႇယမ်ဝႃႈ Dr. ဢႅမ်ႇပဵတ်ႉၵႃႇ ပဵၼ်ၽူႈၶဵၼ်ႇတႅမ်ႈမၢႆမီးပၼ်မိူင်းဢိၼ်ႇတိယ။ ၽူႈဢွၼ်ႁူဝ်လုၵ်ႉၽိုၼ်ႉ မိူဝ်ႈပၢၼ်ဢင်းၵိတ်းၼၼ်ႉ ပေႃးဝႃႈ မႁတ်ႉတမၵၼ်ႇတီႇယဝ်ႉ မၢႆသွင်ၼႆႉ ပဵၼ်Dr. ဢႅမ်ႇပဵတ်ႉၵႃႇယူႇယဝ်ႉ ယွၼ်ႉပိူဝ်ႈ Dr. ဢႅမ်ႇပဵတ်ႉၵႃႇၼႆႉ ႁဵတ်းၵေႃႉလူင်ပွင်ၸိုင်ဢင်းၵိတ်းသေ ထႅင်ႈၽၢႆႇၼိုင်ႈၵေႃႈ သမ်ႉတႅမ်ႈမၢႆမီႈၸိူင်ႈမိူင်း တႃႇတေၵႅတ်ႇၶႄၸိူဝ်ႉၸၢတ်ႈ လႄႈ ၽႅၼ်ႇလိၼ်ဢိၼ်ႇတိယယူႇယဝ်ႉ။ ထႅင်ႈဢၼ်ၼိုင်ႈ ယွၼ်ႉပိူဝ်ႈ Dr. ဢႅမ်ႇပဵတ်ႇၵႃႇၼႆႉ ပဵၼ်ၽူႈၵေႃႇတင်ႈသႃႇသၼႃႇပုတ်ႉထၸဝ်ႈပၢၼ်မႂ်ႇ ၼႂ်းမိူင်းဢိၼ်ႇတိယ ၵွပ်ႈၼႆႉ ၵူၼ်းမိူင်းဢိၼ်ႇတိယၶဝ် ယုမ်ႇယမ်ဝႃႈ Dr. ဢႅမ်ႇပဵတ်ႇၵႃႇၼႆႉ ပဵၼ်ၼေႃႇလွင်းၸဝ်ႈ (ြၽႃးဢလွင်းၸဝ်ႈ)ၼႆသေ ၶဝ်ၸင်ႇဢဝ်ႁုၼ်ႇႁၢင်ႈ ဢႅတ်ႇပဵတ်ႇၵႃႇ ႁဵတ်းပဵၼ်တီႈၼပ်ႉယမ်ၶဝ်ႈယူႇ။ ၼႂ်းမိူင်းဢိၼ်ႇတိယၼၼ်ႉ ပေႃးပဵၼ်ၵူၼ်းၼပ်ႉယမ် ပုတ်ႉထၽႃႇသႃႇၸိုင် တိုၼ်းမီးၶႅပ်းႁၢင်ႈ ပုတ်ႉထၸဝ်ႈလႄႈ ဢႅမ်ႇပဵတ်ႇၵႃႇ ဝႆႉတီႈၶဵင်ႇြၽႃးသေ ႁဵတ်းပဵၼ်တီႈၼပ်ႉယမ်ဝႆႈသႃၶဝ်ႈယူႇယဝ်ႉ။
တွၼ်ႈသွၼ်။ ။ ၶႂ်ႈထၢမ်ထိုင်ၵၢၼ်တေႃႇသူႈ ၵၢၼ်လုၵ်ႉၽိုၼ်ႉတႆးႁဝ်းၶႃႈလူး တေႁႃလွင်ႈသုၼ်ႇလႆႈၽဵင်ႇပဵင်းတီႈမၢၼ်ႈယဝ်ႉ ၸင်ႇႁႃလွင်ႈၽွမ်ႉၸိူဝ်ႉၸၢတ်ႈႁဝ်းၶႃႈႁႃႉ? ပေႃးၼၼ်ႉ ယွၼ်ႉပိူဝ်ႈဢမ်ႇမီးလွင်ႈၽွမ်ႉႁူမ်ႈၼႂ်းၸိူဝ်ႉၸၢတ်ႈႁဝ်းလႄႈ ၸင်ႇမၢၼ်ႈတေပၼ်ယူႇၶႃႈႁႃႉ? ဢွၼ်တၢင်းသုတ်းၼႂ်းၼႆႉ ႁဝ်းၶႃႈလူဝ်ႇသၢင်ႈႁႅင်း လွင်ႈၽွမ်ႉႁူမ်ႈၼႂ်းၸိူဝ်ႉၸၢတ်ႈတႆးႁဝ်း ၼႂ်းၸၢဝ်းၶိူဝ်းၼႂ်းမိူင်းတႆးႁဝ်းယဝ်ႉ ၸင်ႇႁႃလွင်ႈသုၼ်ႇလႆႈၽဵင်ႇပဵင်းလႄႈ လွင်ႈလွတ်ႈလႅဝ်းၵွၼ်းၶေႃ တေလီထိႉသုတ်း လွင်ႈၽွမ်ႉႁူမ်ႈၼႆႉယဝ်ႉ ပဵၼ်ႁႅင်းလူင် ဢၼ်ၽူႈၶဵၼ်တေၵူဝ်ႁဝ်းၼၼ်ႉ ၵဝ်ၶႃႈတႄႉယုမ်ႇယမ်မီးၼင်ႇၼႆ။
တႅၼ်ႈၽွင်းသၽႃးတႆးႁဝ်းၶႃႈလူး ၶဝ်ႈၼႂ်းသၽႃးယဝ်ႉ ႁဵတ်းပၼ်သင်လႆႈတႃႇၸိူဝ်ႉၸၢတ်ႈ ၶဝ်ႈၼႂ်းသၽႃးယဝ်ႉ ၵႂႃႇယွၼ်းႁႂ်ႈပိူၼ်ႈမေးပၼ်မၢႆမီႈၸိူင်ႈမိူင်းၵူၺ်းတႄႉ ဢမ်ႇပဵၼ်လႆႈ ႁဝ်းလူဝ်ႇႁူႉဝႃႈ မၢႆမီႈဢၼ်ပိူၼ်ႈၶဵၼ်တႅမ်ႈၼၼ်ႉ ပဵၼ်တႃႇပိူၼ်ႈ တႃႇမၢၼ်ႈၶဝ်ၵူၺ်း ပေႃးႁဝ်းၶႂ်ႈလႆႈသုၼ်ႇလႆႈတႃႇၸိူဝ်ႉၸၢတ်ႈႁဝ်းၸိုင် ႁဝ်းလူဝ်ႇယိူင်ႈ Dr. ဢႅမ်ႇပဵတ်ႇၵႃႇသေ ၶတ်းၸႂ်ၶဵၼ်ႇတႅမ်ႈမၢႆမီႈတႃႇႁေႉၵင်ႈၸိူဝ်ႉၸၢတ်ႈၽႅၼ်ႇလိၼ်ႁဝ်း။ မၢႆမီႈမိူင်းမၢၼ်ႈ လႅၵ်ႈလၢႆႈမႃးသၢမ်ပၢၼ်ယဝ်ႉ ၼႂ်းၼၼ်ႉ ပဵၼ်မၢၼ်ႈၶဝ်တႅမ်ႈမႃးတင်းသဵင်ႈ တႆးႁဝ်းတေႉပဵၼ်ႈၽူႈတုၵ်ႉယွၼ်းႁႂ်ႈတႅမ်ႈမေးမၢႆမီႈၵူၺ်း တူဝ်ႁဝ်းၶႃႈဢမ်ႇတႅမ်ႈၸွမ်းၼၼ်ႉ ၶိူဝ်းႁဝ်းတူၵ်ႉသုမ်းယူႇဢိူဝ်ႈ ပေႃးႁဝ်းၶႂ်ႈလႆႈလွင်ႈသုၼ်ႇၽဵင်ႇပဵင်းပၼ်ၸိုင် တူဝ်ႁဝ်းလူဝ်ႇပဵၼ်ၽူႈတႅမ်ႈမၢႆမီႈၸိူင်ႈမိူင်းၼၼ်ႉယဝ်ႉ ၸင်ႇတေပဵၼ်မႃးၼင်ႇၵၢင်ၸႂ်ၶႂ်ႈလႆႈတႃႇၸိူဝ်ႉၸၢတ်ႈ။ ယႃႇပေဝူၼ်ႉဝႃႈ ၶဝ်ႈၼႂ်းသၽႃးယဝ်ႉ ယွၼ်းႁႂ်ႈမၢၼ်ႈႁဵတ်းပၼ်တၢင်း ႁူင်းႁဵၼ်းၸိူဝ်းၼႆႉ ၼႆႉတိုၼ်းပဵၼ်ၵၢၼ်လူင်ပွင်ၸိုင် တေလႆႈႁဵတ်းပၼ်ၵူၼ်းမိူင်း ပဵၼ်ပုၼ်ႈၽွၼ်းလူင်ပွင်ၸိုင်ယူႇယဝ်ႉ။ ဢၼ်တႅၼ်းၽွင်းႁဝ်းလူဝ်ႇႁဵတ်းၼၼ်ႉ ပဵၼ်ၵၢၼ်တေႃႇသူႈသုၼ်ႇလႆႈၸိူဝ်ႉၸၢတ်ႈ လႄႈ လွတ်ႈလႅဝ်းၼၼ်ႉၶႃႈယဝ်ႉ။
ယွၼ်းဢဝ်ၶေႃႈၵႂၢမ်း ပေႃႈဢႅမ်ႇပဵတ်ႇၵႃႇ ၶွတ်ႇယွတ်ႈလူပ်းလင် ပေႃႈဢႅမ်ႇပဵတ်ႇၵႃႇ လၢတ်ႈတီႈလုၵ်ႈၸၢႆးမၼ်း (ဢႅမ်ႇပဵတ်ႇၵႃႇ)ဝႃႈ ''လုၵ်ႈၸၢႆးဢူၺ်း ပေႃႈတေႉဢမ်ႇမီးငိုၼ်း မီးၶမ်း ႁိူၼ်းယေးသင် တႃႇတေပဵၼ်ဢမူၺ်ႇလုၵ်ႈ ဢၼ်ပေႃႈပၼ်လႆႈလုၵ်ႈ ဢမူၺ်ႇဢမ်ႇသုတ်းဢမ်ႇသဵင်ႈၼၼ်ႉတႄႉ ပေႃႈၶႂ်ႈသူၼ်းႁႂ်ႈလုၵ်ႈၶတ်းၸႂ်သွၼ်ဢဝ်ပၺ်ႇၺႃႇ ႁႂ်ႈပဵၼ်ၵူၼ်းႁူႉၵေႃႉၼိုင်ႈ ႁႂ်ႈပဵၼ်ၵူၼ်းမေႃၸွႆႈထႅမ်ၵူၼ်းၸၼ်ႉတႅမ်ႇလႄႈ ၸိူဝ်ႉၸၢတ်ႈဝၢၼ်ႈမိူင်းႁဝ်း’' မီးဢၼ်ၼႆႉၵူၺ်း ဢၼ်ပေႃႈပၼ်လႆႈလုၵ်ႈၼႆယူႇ။ ႁၢၼ်ႉတေႃႉဢႅမ်ႇပဵတ်ႇၵႃႇ လႆႈၸုမ်ႈၶူးမႃးၼၼ်ႉ ပေႃႈမၼ်းၸဝ်ႈ ၶတ်းၸႂ်ႁဵတ်းၵၢၼ်ႁႃငိုၼ်းသေ ၸွႆႈထႅမ်ၵႃႈၵၢၼ်ႁဵၼ်း ဢႅမ်ႇပဵတ်ႇၵႃႇမႃး တေႃႇထိုင် ဢသၢၵ်ႈသၢႆၸႂ်ပေႃႈမၼ်းသဵင်ႈယူႇယဝ်ႉ။ တေလႆႈဝႃႈပေႃႈမၼ်းပၼ်ဢမူၺ်ႇလုၵ်ႈ ပၺ်ႇၺႃႇၸႅတ်ႇၸၢင်ႇ တႃႇၸႂ်ႉၼႂ်းၽဝၸၢတ်ႈပၢၼ်ဢႅမ်ႇပဵတ်ႇၵႃႇမႃးယူႇယဝ်ႉ။
မၢႆတွင်း။ ။မူႇလိၵ်ႈၼႆႉ သင်ဝႃႈလီၵေႃႈ ဢဝ်ၵိၼ်မိူၼ်ၼမ်ႉၼူမ်း၊ သင်ဝႃႈဢမ်ႇလီၵေႃႈ ၵိၼ်ယဝ်ႉ ႁႂ်ႈၶၢႆးမိူၼ်ၼမ်ႉပူႉၼၼ်ႉၶႃႈ။
#မၢဝ်းၶမ်း
ဢိင်ဢဝ်မႃးတီႈ>>>
