လွၵ်းလၢႆးယူႇသၢင်ႈသဝ်း

လွၵ်းလၢႆး

|ယူႇသၢင်ႈသဝ်းၼႂ်းၸူဝ်ႈပၢၼ် (10) လၢႆး

1. ပေပၼ်ၵူႈယိမ်ငိုၼ်း

မီးဝႆႉၶေႃႈၵႂၢမ်းဝွၵ်းဢွၼ်ႇပုၵ်ႈၼိုင်ႈ

"ပေႃးယွၼ်းၸင်ႇပၼ် ပဵၼ်ၵူၼ်းႁၢႆႉ၊

ဢမ်ႇလႆႈယွၼ်းသေပၼ် ပဵၼ်ၵူၼ်းလီ၊

ယွၼ်းယူႇၵေႃႈဢမ်ႇပၼ် ပဵၼ်ၵူၼ်းမိူၵ်ႈ" ၼႆလူး။

ယွၼ်ႉၼၼ် တီႈၵူၼ်းၵေႃႉဢၼ်ဢမ်ႇႁူႉၸၵ်း၊ ၵူၼ်းၵေႃႉဢၼ်ဢမ်ႇလႆႈယုမ်ႇယမ်တမ်းၸႂ်ၼၼ်ႉ ပႅင်ႇၼင်ႇပဵၼ်လႆႈ ပေပၼ်ၵူႈယိမ်ငိုၼ်းသေဢိတ်း။

ပေႃးၵဵဝ်ႇလူၺ်ႈလွင်ႈငိုၼ်းတွင်းၼႆ ဢေႇၵေႃႈၶႂ်ႈယဝ်ႉၼမ်ၵေႃႈၶႂ်ႈယႃႇ၊ ၽႂ်ၵေႃႉလႂ် ၵေႃႉဢၼ်ၵူႈယိမ်ၵူႈၵေႃႉတိုၼ်းၶႂ်ႈလႆႈၶိုၼ်းၼၼ်ႉ ပဵၼ်ထမ်ႇမတႃႇမၼ်းယူႇယဝ်ႉ။   သင်ဢမ်ႇၶိုၼ်းတႅၼ်းၸိုင် ၼႂ်းၸႂ် ႁၢင်ႈမိူၼ်ႁိုဝ်ဝႆႉ၊  ပဵၼ်ပုတ်းပဵၼ်ၽၢၼ်ႈ ႁၢင်ႈဢမ်ႇႁၢၼ်ႉၸႂ်လူင်ဝႆႉယဝ်ႉ။   ပေႃးဝႃႈ တွၼ်ႈတႃႇၵူၼ်းၵေႃႉဢၼ်ႁဝ်းႁၵ်ႉတေႉတေႉ တႄႉၵေႃႈ ၸွႆႈထႅမ်ပၼ်တဵမ်တဵမ်ထူၼ်ႈထူၼ်ႈသေလႄႈ။

2. ၸူႉႁွမ်ဝႆႉလႄႈ

ထိုင်မႃးမိူဝ်ႈႁဝ်းလူဝ်ႇၼၼ်ႉ ႁႂ်ႈမီးဝႆႉတူဝ်ႈတၼ်းလၼ်းၵၼ်းတႃႇၵေႈၶႆလႆႈၼၼ်ႉ ၸူႉႁွမ်ငိုၼ်းဝႆႉလႄႈ။ႁဝ်းၶႃႈ တေထူပ်းတၢင်းယၢပ်ႇၽိုတ်ႇမိူဝ်ႈလႂ် တေထူပ်းၽေးႁိုဝ် တေပဵၼ်တၢင်းပဵၼ်ဢမ်ႇယူႇလီမိူဝ်ႈလႂ်ၼႆႁဝ်းဢမ်ႇႁူႉႁၼ်လႆႈထႃႈတၢင်းၼႃႈ။   သင်ပဵၼ်မႃးတေႉ ၸွမ်းၼင်ႇသၢႆငၢႆငဝ်းလၢႆးၸိူင်ႉၼင်ႇၼႆၸိုင် ႁႂ်ႈၵေႈလိတ်ႈလႆႈၼိုင်ႈၽၢႆႇၼိုင်ႈတၢင်းၼၼ်ႉ ၸူႉႁွမ်ငိုၼ်းဝႆႉလႄႈ။ 

ၵူၺ်းၵႃႈဢမ်ႇၸိုဝ်ႈတွၼ်ႈတႃႇၵမ်ႉထႅမ်လွင်ႈပၢႆးယူႇလီၵေႃႈ တႃႇဝၼ်းမိူဝ်းၼႃႈလူဝ်ႇထႅမ်တၢင်းႁူႉပၢႆးဝူၼ်ႉသင်ထႅင်ႈၼႆၵေႃႈ ႁႂ်ႈပဵၼ်တၢင်းၵမ်ႉထႅမ်ႁႂ်ႈသူၶိုၼ်ႈလႆႈထႅင်ႈၶိုၼ်ႈလႆလၢႆသိၵ်ႈလႄႈ။

3. ၵဵပ်းသိမ်းၶၢဝ်းယၢမ်းလႄႈ

ပေၵုမ်ႇသဵင်ႈၶၢဝ်းယၢမ်းၸွမ်း ၵေႃႉဢၼ်ဢမ်ႇလူဝ်ႇ တွၼ်ႈတႃႇၸၢတ်ႈပၢၼ်ႁဝ်း။  ပေၵုမ်ႇၶၢမ်ႇသဵင်ႈၶၢဝ်းယၢမ်းၸွမ်း ၵူၼ်းၸိူဝ်းဢၼ်ယၢမ်ႈပႄႇပၢၵ်ႈ ဢမ်ႇႁပ်ႉၶၢမ်ႇသေ ယၢမ်ႈထဵင်ၶိုၼ်းႁဝ်း၊ ဢမ်ႇၼၼ်ၵူၼ်းၸိူဝ်း ဢမ်ႇဝႆႉၵႃႈၶၼ်ၼမ်ႉၼၵ်းၼိူဝ်ႁဝ်း၊ ၵူၼ်းၸိူဝ်းဢၼ်ၸၢင်ႈၶုၵ်းၸႂ်လႆႈ မိူဝ်ႈၶဝ်မီးလွင်ႈတၢင်းလူဝ်ႇတီႈၼိူဝ်ႁဝ်းၵူၺ်းၼၼ်ႉ။

မၢင်ၵေႃႉမီး၊ "တူဝ်ႈတၼ်းတႃႇသေႇ တွၼ်ႈတႃႇသၢႆႈတႅၼ်းပၼ်မၼ်း" ၼႆၼၼ်ႉ ပေႃးၶိုၼ်းဝူၼ်ႉတူၺ်းလီလီၸိုင် ပဵၼ်ၵူၼ်းၵေႃႉဢၼ်မီးလွင်ႈၸဵပ်းသႅပ်ႇ တၢင်းပဵၼ်ပၢႆးၸႂ် ယႃႇဝႃႈတေၵိုင်ႇထိူၵ်ႈယုၵ်ႉယွင်ႈ ပၢႆပဵၼ်လွင်ႈႁဵတ်းသၢင်ႈဢၼ်ဢမ်ႇလီ ဢမ်ႇမီးၵုင်ႇသလေႇသေဢိတ်းၵွၼ်ႇ။

ၽိူဝ်ႇတႃႉတေၶၢမ်ႇတုၵ်ႉယၢၵ်ႈႁိူဝ်ႉၸွမ်း တွၼ်ႈတႃႇၵူၼ်းၵေႃႉဢၼ်ဢမ်ႇလူဝ်ႇႁဝ်းၼၼ်ႉ၊ တႃႉႁဝ်းသဵင်ႈၶၢဝ်းယၢမ်းၸွမ်း ၼႃႈၵၢၼ်ၵၢၼ်ၵူၼ်းတင်းၼမ်ၼၼ်ႉလႃႈ တႃႉတေလႆႈမီးၽွၼ်းလီတၢင်းၼမ်။

4. သိူၵ်ႈသမ်ႇႁႂ်ႈလီလီ

လူဝ်ႇလႆႈမေႃတႅပ်းတတ်းသိူၵ်ႈသမ်ႇ ပုတ်းၶၢတ်ႇတေႃႇ ၵူၼ်းၵေႃႉဢၼ်ဢမ်ႇလီတေႃႇၼိူဝ်ႁဝ်း။ ၸဝ်ႈၵဝ်ႇၵၢၼ်ႉလီတေႃႇတၢၼ်ႇႁိုဝ်ၵေႃႈ မၼ်းသမ်ႉၵႆႉၵႆႉလိင်ႉလေႇ ပေႉၵိၼ်တေႃႇၼိူဝ်ႁဝ်းၼၼ်ႉ ဢမ်ႇလူဝ်ႇဝႆႉလွင်ႈၼပ်ႉထိုဝ်တေႉတေႉဝႃႈဝႃႈသေသိူၵ်ႈသမ်ႇတေႃႇၶိုၼ်းသေဢိတ်းယဝ်ႉ။ 

ၸိူင်ႉၵူၼ်းမဵဝ်းၸိူဝ်းၼႆႉ ၵူၼ်းၵေႃႉဢၼ်ၶဝ်ယၢမ်ႈဢဝ်ပေႉပုၼ်ႈၼိူဝ်မႃးၼၼ်ႉ တႃႇၶဝ်တေမိူၵ်ႈမႆႈႁဵတ်းလႆႈ တေႃႇထႅင်ႈၼၼ်ႉ ဢမ်ႇၶႃႈလႃႇသင်၊ ပဵၼ်လွင်ႈလဵၵ်ႉတႃႇၶဝ်ၵူၺ်းယဝ်ႉလေႃႇ။ ပေႃးမၼ်းယုမ်ႉတေႃႇ ၸဝ်ႈၵဝ်ႇၵေႃႈ ၶိုၼ်းယုမ်ႉတေႃႇ။ပေႃးမၼ်းတူႇတေႃႇ ၸဝ်ႈၵဝ်ႇၵေႃႈ ၶိုၼ်းတူႇတေႃႇသေလႄႈ။ ပေႃးမၼ်းၵျၢင်ႉမိူၼ်ၾႆး ၸဝ်ႈၵဝ်ႇၵေႃႈ လုၵ်ႉမႆႈမိူၼ်ၾႆး။ပေႃးမၼ်းၵျၢင်ႉမိူၼ်ၼမ်ႉ ၸဝ်ႈၵဝ်ႇၵေႃႈ ၵတ်းယဵၼ်မိူၼ်ၼမ်ႉသေလႄႈ။

5. ဢုပ်ႇဢူဝ်းၵၼ်လႄႈ

ၵႆႉဢုပ်ႇဢူဝ်းလၢတ်ႈတေႃႇၼမ်ၼမ် တင်းဢူၺ်းလီၵေႃႉဢၼ်တူဝ်ၸႂ်မိူၼ်ၵၼ်။ ၵႆႉဢုပ်ႇဢူဝ်းလၢတ်ႈတေႃႇ တင်းၵေႃႉဢၼ်ယုမ်ႇယမ်ၼပ်ႉထိုဝ်သူ လႄႈ ၵေႃႉဢၼ်သူယုမ်ႇယမ်ၼပ်ႉထိုဝ်ၼၼ်ႉလႄႈ။

လွင်ႈလႆႈလၢတ်ႈတေႃႇၸိူင်ႉၼႆၼႆႉ ႁဵတ်းႁႂ်ႈၸႂ်ၵတ်းယဵၼ်သိူဝ်းသႃႇသေ တၼ်းသဵင်ႈၶၢဝ်းယၢမ်းၵႂႃႇၸိူင်ႉႁိုဝ်ဢမ်ႇတၼ်းႁူႉလႆႈ၊ ဢမ်ႇမီးလွင်ႈၶီမႆႈသင် ပဵၼ်ဢၼ်လတ်းၽၢၼ်ႇၸွမ်းၶၢဝ်းယၢမ်းဢၼ်မူၼ်ႈၸႂ်ၼၼ်ႉယဝ်ႉ။

ယဝ်ႉၵေႃႈ တွၼ်ႈတႃႇယိူင်းဢၢၼ်းၸဝ်ႈၵဝ်ႇ ပိူင်ပဵၼ်မိူဝ်ႈလဵဝ် လႄႈ ဢၼႃႇၵၢတ်ႈတၢင်းၼႃႈၸဝ်ႈၵဝ်ႇၸႃႉၵႂႃႇၵဵဝ်ႇၵပ်းလူၺ်ႈလွင်ႈၸိူဝ်းၼၼ်ႉ ၵူၼ်းၸိူဝ်းဢၼ်မီးလွင်ႈၶမ်ၸႂ်ႁပ်ႉႁူႉမိူၼ်ၵၼ်ၵူၺ်း တေပၼ်ပၢႆးဝူၼ်ႉတၢင်းၶႂ်ႈၸႂ်ႈလႆႈ။

ၶႂ်ႈဝႃႈၼႆႉ ပေႃးသူသမ်ႉပဵၼ်ၵူၼ်းလွင်ႈၽၢႆႇၽႃႇသႃႇသူတေၵႂႃႇလၢတ်ႈတေႃႇတင်းၵူၼ်းၵိၼ်လဝ်ႈ မဝ်းလဝ်ႈၶဝ်ၼၼ်ႉ ေတဢမ်ႇသၢင်ႇထုၵ်ႇလူး။

6. ဢွၵ်ႇၶၢဝ်းတၢင်းလႄႈ

ႁိုင်ႁိုင်ၼၢၼ်းၼၢၼ်း ၵႆႉဢွၵ်ႇၶၢဝ်းတၢင်းပၼ်။ ၼႂ်းၶၢဝ်းယၢမ်းၸၢတ်ႈပၢၼ်ပွတ်းပွတ်းဢွၼ်ႇႁဝ်းၼႆႉတႃႇႁႂ်ႈႁပ်ႉႁူႉတူဝ်ထူပ်းႁၼ်လွင်ႈမႂ်ႇမႂ်ႇ လႄႈ တႃႇႁႂ်ႈၽိူမ်ႉၼမ်ႉၵတ်ႉတၢင်းႁူႉတၢင်းႁၼ်ပႁုသုတ (General knowledges) ႁႂ်ႈၶိုၼ်ႈသင်ႉၶိုၼ်ႈသုင်မႃးၼၼ်ႉ ႁိုင်ႁိုင်ၼၢၼ်းၼၢၼ်း ထုၵ်ႇလီဢွၵ်ႇၶၢဝ်းတၢင်းပၼ်ယူႇ။

ၵၢၼ်ဢွၵ်ႇၶၢဝ်းတၢင်းၼႆႉ ပဵၼ်လွင်ႈယႃႇႁိူဝ်ႉယႃမွႆႈမဵဝ်းၼိုင်ႈဢၼ်ဝႃႈၼၼ်ႉ သူတေႁူႉ တေႁပ်ႉၶၢမ်ႇမႃးယူႇယဝ်ႉ။ လွင်ႈလေႇလဵပ်ႈႁဵၼ်းတူၺ်း သၽႃႇဝတၢင်းႁၢင်ႈလီ ၼမ်ႉ၊လိၼ်၊ႁိၼ်၊ၽႃၼႆႉၵေႃႈ ပဵၼ်ဢၼ်ၸႂ်ၵတ်းယဵၼ်လီမဵဝ်းၼိုင်ႈၼင်ႇၵဝ်ႇယဝ်ႉ။  ၸွမ်းလူၺ်ႈလွင်ႈလႆႈဢွၵ်ႇၶၢဝ်းတၢင်းၼႆႉ တေၸၢင်ႈႁဵတ်းႁႂ်ႈ လွင်ႈၼၵ်းၸႂ် (Pressure) တီႈဢၼ်သူမီးၼၼ်ႉ ယုပ်ႈယွမ်းလူင်းၵႂႃႇၵမ်ႈၽွင်ႈယူႇယဝ်ႉ။

7. ႁဵတ်းလွင်ႈသူင်ၸႂ်လႄႈ

ႁဵတ်းၵၢၼ် ဢၼ်ၸဝ်ႈၵဝ်ႇသူင်ၸႂ် ပႃးဝႃႇသၼႃႇ

ၼၼ်ႉၵူၺ်းလႄႈ။ ၼင်ႇဝႃႈ "If you don’t like where you are, move You are not a tree” ပေႃးမႂ်းဢမ်ႇလႆႈၸႂ်တီႈမႂ်းယူႇ မႂ်းၵေႃႈၶၢႆႉတီႈပႅတ်ႈလႄႈ၊ မႂ်းဢမ်ႇၸႂ်ႈတူၼ်ႈမႆႉလူး ၼႆၼၼ်ႉ။ၸႂ်ႈယဝ်ႉ ႁဝ်းၶႃႈပဵၼ်ၵူၼ်း၊ ဢမ်ႇၸႂ်ႈတူၼ်ႈမႆႉ ဢၼ်ဢမ်ႇတူင်ႉၼိုင်လႆႈ။

ယွၼ်ႉၼၼ် ၼႂ်းၸၢတ်ႈပၢၼ်ဢွၼ်ႇ ဢၼ်လႆႈယၢပ်ႇလႆႈယဵၼ်းမႃးၼႆႉ ပေႁဵတ်းၵၢၼ်ဢၼ်ၸဝ်ႈၵဝ်ႇ ဢမ်ႇလႆႈၸႂ်သေ ၼၵ်းၸႂ် ၶမ်ၸႂ်ယူႇ။

ၵျေႃႉပၢၼ်း ယၢမ်ႈလၢတ်ႈဝႃႈ "ၵဝ်ၶႃႈတႄႉ လိူဝ်သေလႆႈႁဵတ်းၵၢၼ်ဢၼ်ၸဝ်ႈၵဝ်ႇဢမ်ႇပႃးဝႃႇသၼႃႇသေပဵၼ်ၵူၼ်းၶိုၼ်ႈယႂ်ႇ၊ တႃႉႁဵတ်းၵၢၼ်ဢၼ်ၸဝ်ႈၵဝ်ႇပႃးဝႃႇသၼႃႇသေ ပဵၼ်ၵူၼ်းဢမ်ႇၶိုၼ်ႈယႂ်ႇလႃႈ" ၼႆဝႃႇ။ ၶတ်းၸႂ်ႁဵတ်းသၢင်ႈၼႃႈၵၢၼ်ဢၼ်ၸဝ်ႈၵဝ်ႇသူင်ၸႂ် ပႃးဝႃႇသၼႃႇတေႉတေႉၼၼ်ႉတူၺ်းလႄႈ။

8. ဝူၼ်ႉသွၼ်ႇပိူၼ်ႈၽွင်ႈလႄႈ

ဝူၼ်ႉသွၼ်ႇပၼ် ၽၢႆႇပိူၼ်ႈၽွင်ႈ၊ ႁၼ်ထိုင် ဢီးလူပိူၼ်ႈၽွင်ႈလႄႈ။ ပၼ်ႁႃၼိုင်ႈဢၼ် ယူႇၽၢႆႇၸဝ်ႈၵဝ်ႇတူၺ်းႁၼ်ၵေႃႈၸၢင်ႈမၢၼ်ႇမႅၼ်ႈ၊ ယူႇၽၢႆႇမၼ်းတူၺ်းႁၼ်ၵေႃႈၸၢင်ႈမၢၼ်ႇမႅၼ်ႈၼင်ႇၵဝ်ႇ။လွင်ႈပွင်ႇၸႂ်ႁၼ်ထိုင်ပႅၵ်ႇပိူင်ႈၵၼ်ၼၼ်ႉ ဢမ်ႇၸႂ်ႈပၼ်ႁႃဢၼ်လမ်ႇလွင်ႈမၼ်းၼင်ႇၵဝ်ႇ။ ယွၼ်ႉၼၼ်လူဝ်ႇလႆႈတူၺ်းႁၼ်ၼပ်ႉထိုဝ် တၢင်းႁၼ်ထိုင်ၽၢႆႇပိူၼ်ႈၽွင်ႈယူႇဢိူဝ်ႈ။

တႃႇႁႂ်ႈမေႃဝူၼ်ႉသွၼ်ႇဝႃႈ "ပေႃးတီႈမၼ်း သင်ပဵၼ်ၵဝ်ၼႆၸိုင် တေပဵၼ်ၸိူင်ႉႁိုဝ်ၼေႃ" ၼႆၼၼ်ႉ ၽိုၵ်းသွၼ်ဝႆႉတႃႇသေႇလႄႈ။ မိူၼ်ၼင်ႇ ၽၢႆႇမၼ်းတူၺ်းသမ်ႉ ပဵၼ်ၽႃႇမိုဝ်း၊ ၽၢႆႇၵဝ်တူၺ်းသမ်ႉ ပဵၼ်ဢူင်ႈမိုဝ်း။ တြႃးမၢၼ်ႇမႅၼ်ႈဢၼ်ၼိုင်ႈၼၼ်ႉ ၸၢင်ႈမီးလွင်ႈႁၼ်ထိုင်ၵူႈလၢႆသႅၼ်းပႅၵ်ႇပိူင်ႈၵၼ်ၼၼ်ႉယူႇယဝ်ႉ။

9. လူလိၵ်ႈလႄႈ

"ၵူၼ်းၶိူဝ်းဢၼ်လူလိၵ်ႈၼၼ်ႉ ၶိုၼ်ႈယႂ်ႇသေ၊ ၵူၼ်းၶိူဝ်းဢၼ်ၶိုၼ်ႈယႂ်ႇၼၼ်ႉၵေႃႈ ၶဝ်လူလိၵ်ႈ" ၼႆဝႃႇ။ မႅၼ်ႈတေႉ။ သင်ဝႃႈ သူၶဝ်ႈၸႂ်ၶဝ်ႈၶေႃးၼႂ်းလွင်ႈလူလိၵ်ႈယူႇၼၼ်ႉၼႆၸိုင် သူတေလႆႈႁပ်ႉႁူႉၼႂ်းၸႂ်ဝႃႈ မိူၼ်ႁွတ်ႈၵႂႃႇ

ၼႂ်းတၢင်ႇလူၵ်ႈၵမ်ႇၽႃႇၼၼ်ႉယူႇဢမ်ႇႁၢင်ႉယဝ်ႉ။

တွၼ်ႈတႃႇၸၢတ်ႈပၢၼ်ႁဝ်း သမ်ႉပေႃးတေၶိုၼ်ႈယႂ်ႇႁိူဝ်ႈႁိူင်း ၊ တၢင်းႁူႉတၢင်းႁၼ်သမ်ႉပေႃးတေတိူဝ်းမႃးၼၼ်ႉ  လွင်ႈလူလိၵ်ႈၼႆႉ ပဵၼ်လွၵ်းလၢႆးဢၼ်လီသေပိူၼ်ႈယဝ်ႉ။

10.လဵပ်ႈႁဵၼ်းသေလွင်ႈလွင်ႈလႄႈ

လဵပ်ႈႁဵၼ်းသေဢၼ်ဢၼ် သေမဵဝ်းမဵဝ်းယူႇတႃႇသေႇလႄႈ။ၸိုင်ႈမိူင်းဝၼ်းတူၵ်း ဢုရေႃးပၶဝ်ၼႆ ဢႃႇယူႉ (80) ပူႇထဝ်ႈ ၼၢႆးထဝ်ႈၶဝ်ၼႆႉ တိုၵ်ႉလဵပ်ႈႁဵၼ်း တေႇဢဝ်ၽႃႇသႃႇမႂ်ႇမႂ်ႇၸႃႉၵႂႃႇ ပိင်ႇၺႃႇတၢင်းႁူႉတၢင်းမေႃတၢင်းလၢႆယူႇ။

ဢၼ်ၶဝ်လဵပ်ႈႁဵၼ်း သိင်ႇမႂ်ႇမႂ်ႇသေဢၼ်ဢၼ် သေမဵဝ်းမဵဝ်းယူႇတႃႇသေႇၼၼ်ႉ မိူၼ်ပဵၼ်ထုင်းၶဝ်ဝႆႉၼၼ်ႉယဝ်ႉ။

ယွၼ်ႉ ၶဝ်သႂ်ႇၸႂ်သႂ်ႇၶေႃးသေ လဵပ်းႁဵၼ်းတၢင်းႁူႉမႂ်ႇမႂ်ႇသေဢၼ်ဢၼ်သေမဵဝ်းမဵဝ်းၼၼ်ႉယဝ်ႉ။ ၶတ်းၸႂ်လဵပ်းႁဵၼ်းပိင်ႇၺႃႇတၢင်းႁူႉတၢင်းႁၼ်ၵူႈၸိူဝ်ႉၵူႈမဵဝ်း ႁႂ်ႈပေႃးလူင်ႉလႅၼ်ႇၵတ်ႉၶႅၼ် ထိုင်တီႈထိုင်လႅၼ်လႄႈ။

ၵၢၼ်ဢၼ်ၸႂ်ႉႁႅင်းတူဝ်သေႁဵတ်းၼႆႉ ၽွၼ်းလီမၼ်းပၼ်မိူဝ်ႈတိုၵ်ႉလဵၵ်ႉၼုမ်ႇႁၢတ်ႈႁၢႆးၼႆႉၵူၺ်း။ သင်ဢႃႇယူႉယႂ်ႇထဝ်ႈမႃးယဝ်ႉၸိုင် ၵၢၼ်ဢၼ်ၸႂ်ႉၺၢၼ်ႇသေႁဵတ်းၼၼ်ႉၵူၺ်းတေသၢင်ႇထုၵ်ႇ ၊ တေႁဵတ်းႁႂ်ႈသၢၵ်ႈသႃႇလူမ်ၸႂ်လႆႈ။

လွၵ်ႈလၢႆးယူႇသၢင်းသဝ်းၸၢတ်ႈပၢၼ် ၶႂ်ႈႁႂ်ႈသႅၼ်းႁုၼ်ႈမႂ်ႇ ၽွင်းတိုၵ်ႉတူင်ႉၼိုင်လႅတ်းသႅဝ်း ႁဵတ်းသၢင်ႈၵၢၼ်ငၢၼ်းႁဝ်းၶဝ် ႁႂ်ႈမေႃဢဝ်တွၼ်ႈသွၼ် ၸႂ်ႉတိုဝ်းတၢင်းႁူႉတၢင်းႁၼ် ယိူင်ႈႁဵတ်းၸွမ်းလွၵ်းလၢႆးတီႈလီ ပၢႆးဝူၼ်ႉၶပ်ႉၸိုင် ယုမ်ႇယမ်ဝႃႈတေပဵၼ်ၽွၼ်းလီ မီးၵႃႈၶၼ်တွၼ်ႈတႃႇသူၸဝ်ႈၵူႈၵေႃႉၵေႃႉယူႇဢေႃႈ။

ၼပ်ႉယမ်ယႂ်ႇၼမ်ထိုင်ၵူႈၵေႃႉသေ .............

ပိၼ်ႇတႅမ်ႈ >>>>

မႆႉသၢင်းၶမ်း(ပၢႆးဝူၼ်ႉၶပ်ႉ လပ်ႉၽၢႆၽၢႆ)လဵပ်ႈႁဵၼ်းတၢင်းႁူႉလႄႈ