လွင်ႈၵၢၼ်ႁဵၼ်းၸွမ်းလင်ပိူၼ်ႈ လႄႈ တၢင်းႁၼ်ထိုင်ၵဝ်ၶႃႈ

မိူဝ်ႈႁဝ်းလဵၵ်ႉ ဢမ်ႇၼၼ် မိူဝ်ႈပူၼ်ႉမႃး (14-15) ပီၼၼ်ႉ ပေႃးဝႃႈၸဝ်ႈသၢင်ႇ၊ ၸဝ်ႈၸၢင်းတႆးႁဝ်း၊ ၵူၼ်းၼုမ်ႇတႆးႁဝ်း ၶႂ်ႈမေႃလိၵ်ႈဢၢင်းၵိတ်ႉ၊ ၵႂၢမ်းဢၢင်းၵိတ်ႉပေႃးၼႆ လူဝ်ႇလႆႈလူင်းႁႃသွၼ်လဵပ်ႈႁဵၼ်းဢဝ်တင်း မိူင်းမၢၼ်ႈ မိူၼ်ၼင်ႇ ယၢၼ်ႇၵုင်ႇ၊ မၼ်းတလေးၸိူဝ်းၼႆႉ။

ပေႃးဝႃႈ လႆႈၵႂႃႇႁႃသွၼ်ဢဝ်တီႈၵႆၵေႃႈ ငိုၼ်းဢၼ်ဝႃႈၼၼ်ႉ ႁူႉတိုၼ်းတေလႆႈသဵင်ႈၸွမ်းမၼ်းယဝ်ႉ။ သဵင်ႈငိုၼ်းၸွမ်းယဝ်ႉဢမ်ႇၵႃး လိၵ်ႈဢၢင်းၵိတ်ႉ၊ ၵႂၢမ်းဢၢင်းၵိတ်ႉ ဢၼ်မေႃသွၼ်၊ ၶူးသွၼ်မၢၼ်ႈၶဝ် သွၼ်ပၼ်ႁဝ်းႁႃးၸိူဝ်းၼၼ်ႉၵေႃႈ သမ်ႉဢဝ်လိၵ်ႈမၢၼ်ႈ၊ ၵႂၢမ်းမၢၼ်ႈ၊ ပပ်ႉဢၢင်းၵိတ်ႉ ဢၼ်ပဵၼ်မၢၼ်ႈၵေႃႉတႅမ်ႈဝႆႉၼၼ်ႉသွၼ်ပၼ်ၵူၺ်းလႄႈ တႃႇႁႂ်ႈၵူၼ်းၼုမ်ႇတႆးႁဝ်း ႁူႉတီႈပွင်ႇၵႂၢမ်းဢၢင်းၵိတ်ႉ လႄႈ တႆးၵမ်းသိုဝ်ႈၼၼ်ႉ သမ်ႉယၢပ်ႇထႅင်ႈၵမ်းၼိုင်ႈ။

ၵွပ်ႈၵူၼ်းၼုမ်ႇႁဝ်း ယၢမ်ႈႁဵၼ်းသွၼ်ဢဝ် တီႈၵႂၢမ်းမၢၼ်ႈ၊ လိၵ်ႈမၢၼ်ႈမႃးၵူၺ်းလႄႈ တႃႇတေႁူႉတီႈပွင်ႇၶေႃႈၵႂၢမ်းဢၢင်းၵိတ်ႉမၢင်ၶေႃႈၶေႃႈၼႆႉ ႁဝ်းလႆႈဝူၼ်ႉၽၢႆႇမၢၼ်ႈဢွၼ်တၢင်း၊ ပေႃးယဝ်ႉၸင်ႇမႃႈပိၼ်ႇပဵၼ်ၽၢႆႇတႆး ဢမ်ႇၼၼ် ဝူၼ်ႉပဵၼ်ၶေႃႈၵႂၢမ်းတႆးထႅင်ႈၵမ်းၼိုင်ႈ ႁဵတ်းၼႆသေ မၢင်ၵႂႃႇမၢင်မႃး ၵႂၢမ်းတႆးၵေႃႈ ပဵၼ်ၵႂၢမ်းတႆးၸပ်းၽၢၵ်ႇ ဢမ်ႇၼၼ် ၵႂၢမ်းတႆးလေႃးလႄးၵႂႃႇပႅတ်ႈ။

ဢၼ်ႁၢင်ႈႁၢႆႉလိူဝ်ၼႆႉသမ်ႉ မၢင်ၵေႃႉၵေႃႉ ယင်းပႆမေႃမႃးထၢင်ႇလဵၵ်ႉၶိုၼ်းၶိူဝ်းတူဝ်ၸဝ်ႈၵဝ်ႇထႅင်ႈ။ ထၢင်ႇလဵၵ်ႉၸိူင်ႉႁိုဝ်ၼႆ ၶဝ်ဝႃႈ ပပ်ႉလိၵ်ႈတႆး ဢမ်ႇၶိုတ်းပၢၼ်၊ ပပ်ႉလိၵ်ႈတႆး ဢမ်ႇမီးၸေး၊ ပပ်ႉလိၵ်ႈတႆး ဢမ်ႇၶိုတ်းၸၼ်ႉၼႆလူင်ၵႂႃႇ။ မၼ်းၵေႃႈသမ်ႉမၢၼ်ႇမႅၼ်ႈၸွမ်းၼင်ႇၶဝ်ႈဝႃႈယူႇၼၼ်ႉတႄႉၼင်ႇၵဝ်ႇ။

ၵူၺ်းၵႃႈ ၵႃႈတီႈၼႆႈ ၶႂ်ႈထၢမ်ၶိုၼ်းယူႇဝႃႈ - ပေႃးၸဝ်ႈၵဝ်ႇႁူႉဝႃႈ ပပ်ႉလိၵ်ႈတႆး ဢမ်ႇၶိုတ်းပၢၼ်၊ ပပ်ႉလိၵ်ႈတႆး ဢမ်ႇမီးၸေး၊ ပပ်ႉလိၵ်ႈတႆး ဢမ်ႇၶိုတ်းၸၼ်ႉလုမ်ႈၾႃႉပေႃးၼႆ ၼင်ႇႁိုဝ်ပပ်ႉလိၵ်ႈတႆးႁဝ်း ပေႃးတေၶိုတ်းပၢၼ်၊ ၼင်ႇႁိုဝ်ပပ်ႉလိၵ်ႈတႆး ပေႃးတေမီးၸေး၊ ၼင်ႇႁိုဝ်ပပ်ႉလိၵ်ႈတႆးႁဝ်း ပေႃးတေၶိုတ်းပၢၼ်ၼၼ်ႉ ပုၼ်ႈၽွၼ်းမၼ်း မီးၼိူဝ်ႁူဝ်ဝႃႇသူၸဝ်ႈၵေႃႉၼိုင်ႈ ဢမ်ႇၸႂ်ႈၶႃႈႁိုဝ်? ၵွပ်ႈသင်? ၵွပ်ႈဝႃႈ သူၸဝ်ႈၵေႃႈ ပဵၼ်ၼိူဝ်ႉလိူတ်ႈၶိူဝ်းတႆးႁဝ်းၵေႃႉၼိုင်ႈ ဢမ်ႇၸႂ်ႈၶႃႈႁိုဝ်?

လွင်ႈဢွၵ်ႇၵႂႃႇႁႃသွၼ်လဵပ်ႈႁဵၼ်းဢဝ် တၢင်းႁူႉတၢင်းမေႃ တီႈမိူင်းၵႆ၊ ဢမ်ႇၼၼ် ဝၢၼ်ႈပိူၼ်ႈမိူင်းပိူၼ်ႈၼၼ်ႉ လီမဵဝ်းၼိုင်ႈ၊ ဢမ်ႇလီမဵဝ်းၼိုင်ႈ။ လီၸိူင်ႉႁိုဝ်? သင်ဝႃႈၵူၼ်းၵေႃႉၼၼ်ႉ ၶၢမ်ႇၽၢတ်ႇဝၢၼ်ႈၽၢတ်ႇမိူင်းသေ ဢဝ်ယိူင်းဢၢၼ်း ဢၼ်ၶႂ်ႈၸွႆႈပူၵ်းပွင်ပၼ် ၼႂ်းဝၢၼ်ႈ၊ ၼႂ်းဝဵင်း၊ ၼႂ်းမိူင်းၸဝ်ႈၵဝ်ႇ၊ ၶႂ်ႈယုၵ်ႉယွင်ႈႁွင်ႈသုင်ၶိုၼ်း ၵူၼ်းၶိူဝ်းၸဝ်ႈၵဝ်ႇသေ ၶတ်းၸႂ်ႁႃႁွမ်လဵပ်ႈႁဵၼ်းဢဝ် တၢင်းႁူႉတၢင်းမေႃ ဢၼ်မီးတီႈဝၢၼ်ႈပိူၼ်ႈမိူင်းပိူၼ်ႈၼၼ်ႉ မႃးၸႂ်ႉၶိုၼ်း၊ မႃးႁဵတ်းပၼ်ၽွၼ်းလီ ၼႂ်းဝၢၼ်ႈ၊ ၼႂ်းဝဵင်း၊ ၼႂ်းမိူင်းမၼ်းၶိုၼ်းၸိုင် ၵူၼ်းၵေႃႉၼႆႉ ၵိုင်ႇလီၵႂႃႇသွၼ်ဢဝ်ယူႇ။

ဢမ်ႇလီၸိူင်ႉႁိုဝ်? သင်ၽၢတ်ႇဝၢၼ်ႈ၊ ၽၢတ်ႇဝဵင်း၊ ၽၢတ်ႇမိူင်းႁဝ်းသေ ၵႂႃႇႁႃလဵပ်ႈႁဵၼ်းသွၼ်ဢဝ် တၢင်းႁူႉတၢင်းမေႃ တီႈဝၢၼ်ႈပိူၼ်ႈ၊ မိူင်းပိူၼ်ႈယဝ်ႉ သမ်ႉၶိုၼ်းဢဝ် ၾိင်ႈထုင်းမိူင်းၼၼ်ႉ၊ ၵႂၢမ်းၵူၼ်းၶိူဝ်းၼၼ်ႉ၊ ပၢႆးဝူၼ်ႉၵူၼ်းမိူင်းၼၼ်ႉ၊ တၢင်းယၢမ်ႈၵူၼ်းမိူင်းၼၼ်ႉ မႃးၸႂ်ႉတိုဝ်းၶိုၼ်း ၼႂ်းမိူင်းႁဝ်း၊ ဢမ်ႇၼၼ် မေႃထၢင်ႇလဵၵ်ႉၶိုၼ်းၶိူဝ်းႁဝ်းပေႃးၼႆ ဢၼ်ၼႆႉႁွင်ႉဝႃႈ ဢမ်ႇလီၵႂႃႇႁႃသွၼ်ဢဝ်တီႈပိူၼ်ႈ။ ၵွပ်ႈဝႃႈ မၼ်းၸၢင်ႈယဵၼ်းငၢႆႈၼၼ်ႉယဝ်ႉ။

ၸိူင်ႉႁိုဝ်ၵေႃႈလီ ဢၼ်ၶႂ်ႈလၢတ်ႈတႄႉၵေႃႈ ဢၼ်ပိူၼ်ႈပိုတ်ႇၸၼ်ႉၸွမ်၊ ပိုတ်ႇၶေႃးလဵၵ်ႉ၊ ပိုတ်ႇႁူင်းႁဵၼ်း၊ ပိုတ်ႇပၢင်သွၼ်ပၼ် ႁႂ်ႈၵူၼ်းၵူႈၶိူဝ်းၶိူဝ်း၊ ၵူႈမိူင်းမိူင်းမႃးၶိုၼ်ႈၼၼ်ႉ ယွၼ်ႉမၼ်းပဵၼ်ၵၢၼ်ပိုၼ်ၽႄႈ ၾိင်ႈငႄႈ၊ ၾိင်ႈထုင်းပိူၼ်ႈ၊ ၵႂၢမ်းလၢတ်ႈပိူၼ်ႈ၊ ပၢႆးဝူၼ်ႉပိူၼ်ႈၵူၺ်းၼႆၼၼ်ႉယဝ်ႉ။

ၽွင်ႈပိူၼ်ႈ ဢဝ်ၸၼ်ႉၸွမ်၊ ဢဝ်ၶေႃးလဵၵ်ႉ၊ ဢဝ်ႁူင်းႁဵၼ်း ၊ဢဝ်ပၢင်သွၼ်ၼမ်ႉၵတ်ႉၵူၼ်းၼုမ်ႇ ႁဵတ်းပဵၼ်တီႈပိုၼ်ၽႄႈၾိင်ႈငႄႈ၊ ၾိင်ႈထုင်း၊ ၵႂၢမ်းလၢတ်ႈ ၸိူဝ်ႉၶိူဝ်းပိူၼ်ႈယူႇၼၼ်ႉ သင်ႁဝ်းသမ်ႉ ဢမ်ႇမေႃလၵ်ႉဢဝ်ၺၢၼ်ႇပိူၼ်ႈ လွင်ႈပိူၼ်ႈႁဵတ်းႁိုဝ်ပိုၼ်ၽႄႈ ၾိင်ႈငႄႈ၊ ၾိင်ႈထုင်း၊ လိၵ်ႈလၢႆး၊ ၵႂၢမ်းလၢတ်ႈပိူၼ်ႈၸိူဝ်းၼၼ်ႉၼႆၸိုင် ၸၢတ်ႈပၢၼ်တႆး ဢၼ်တေလႆႈၽၢတ်ႇဝၢၼ်ႈ၊ ၽၢတ်ႇမိူင်း၊ ၽၢတ်ႇဢွင်ႈတီႈယူႇတၼ်းသဝ်းၸဝ်ႈၵဝ်ႇသေ ၵႂႃႇႁႃသွၼ်ဢဝ်လိၵ်ႈလၢႆး၊ တၢင်းႁူႉ၊ တၢင်းမေႃ တီႈဝၢၼ်ႈပိူၼ်ႈ၊ မိူင်းပိူၼ်ႈၼၼ်ႉ တိုၼ်းတေပႆႇႁၢႆလႆႈ။ ထႅင်ႈပိူင်ၼိုင်ႈၵေႃႈ ၵွပ်ႈတႆး လႆႈသူင်ႇလုၵ်ႈသူင်ႇလၢၼ် ႁႂ်ႈမၢၼ်ႈဢဝ်ၾိင်ႈငႄႈ၊ ၾိင်ႈထုင်းၶဝ်၊ လိၵ်ႈလၢႆးၶဝ် သႂၢင်းၶဝ်ႈပၼ် ၼႂ်းဢွၵ်းဢေႃတႆးယူႇပေႃးၼႆၸိုင် တႃႇတေၽိုၼ်ႉၶိုၼ်းမၢၼ်ႈ ၽၢႆႇလိၵ်ႈလၢႆးပႆပေႇၼႆႉ ႁဝ်းပႆႇႁၼ်တီႈလႅင်းမၼ်းလႆႈ။

လွင်ႈၽၢတ်ႇဝၢၼ်ႈမိူင်းသေ ၵႂႃႇႁႃသွၼ်ဢဝ်တီႈပိူၼ်ႈၼၼ်ႉ-
1. ငိုၼ်းသဵင်ႈၼမ်။
2. ၵွပ်ႈပဵၼ်ၵႂၢမ်းပိူၼ်ႈ၊ လိၵ်ႈပိူၼ်ႈလႄႈ တႃႇတေပွင်ႇၸႂ်လႆႈငၢႆႈငၢႆႈ မိူၼ်ၵႂၢမ်းတႆးၼၼ်ႉ ဢမ်ႇငၢႆႈ။
3. ၼႂ်းပၢင်သွၼ်ၼၼ်ႉ ၵွပ်ႈမၼ်ႈပဵၼ်ဢွင်ႈတီႈ ပိုၼ်ၽႄႈၾိင်ႈငႄႈ လိၵ်ႈလၢႆး ၵႂၢမ်းလၢတ်ႈ ၵူၼ်းၶိူဝ်းၶဝ်ၵူၺ်းလႄႈ ပေႃးဢမ်ႇမေႃဝူၼ်ႉ၊ ဢမ်ႇမီးပိုၼ်ႉႁူႉ၊ ဢမ်ႇမီးၸႂ်ႁၵ်ႉၶိူဝ်းပေႃးၼႆ ၵူၼ်းၼုမ်ႇႁဝ်းၸၢင်ႈလိုမ်းၶိူဝ်း။
4. လႆႈတၢင်းႁူႉတၢင်းမေႃမႃးယဝ်ႉၵေႃႈ သင်ဢမ်ႇမေႃၸႂ်ႉ ၵႆႉပဵၼ်ၵူၼ်း ၵေႃႉဢၼ်ၶိုၼ်းမႃးပိုၼ်ၽႄႈပၼ် ၾိင်ႈငႄႈ၊ ၾိင်ႈထုင်း၊ ၵႂၢမ်းလၢတ်ႈ၊ လိၵ်ႈလၢႆးပိူၼ်ႈၶိုၼ်းၵူၺ်း။

ၵွပ်ႈလွင်ႈတၢင်းလၢႆလၢႆလွင်ႈ ဢၼ်လီၼၵ်းၸႂ် ပုၼ်ႈတႃႇၸိူဝ်ႉၸၢတ်ႈ၊ ၸိူဝ်ႉၶိူဝ်း၊ ၽႅၼ်ႇလိၼ်၊ ဝၢၼ်ႈမိူင်းၵဝ်ၶႃႈၼင်ႇၼႆလႄႈ ၵူၼ်းၼုမ်ႇႁဝ်း ၼႂ်းဝၼ်းမိူဝ်ႈၼႆႉ ႁဝ်းထုၵ်ႇလီဢွၼ်ၵၼ် ၽိုၼ်ႉပႅတ်ႈၶိုၼ်း ဢမ်ႇၼၼ် ႁဝ်းထုၵ်ႇလီဢွၼ်ၵၼ် ပိုတ်ႇပၢင်သွၼ်ပၼ် ၵူၼ်းၼုမ်ႇၼေႃႇတႅၼ်းၶိူဝ်းႁဝ်း ႁင်းၵူၺ်းၼႂ်းမိူင်းတႆးယဝ်ႉ။ ႁဝ်းလႆႈဢွၼ်ၵၼ် လူင်းႁႃသွၼ်လိၵ်ႈဢင်းၵိတ်ႉ၊ ၵႂၢမ်းဢၢင်းၵိတ်ႉ တီႈမၢၼ်ႈမႃးၼႆႉ မၼ်းႁိုင်ၼႃႇယဝ်ႉ။ ႁဝ်ႈထုၵ်ႇလီဢွၵ်ႇပူၼ်ႉ လွၵ်းဢၼ်ၼႆႉယဝ်ႉ။ ၵဝ်ၶႃႈ ဢိမ်ႇဢိူဝ်ႇ မိူဝ်ႇၸၢၼ်ႈ ၸၢတ်ႈပၢၼ် ၵူၼ်းတႆးႁဝ်း လႆႈၵႂႃႇႁႃသွၼ်ဢဝ် တၢင်းႁူႉတၢင်းမေႃတီႈမၢၼ်ႈၼၼ်ႉၼႃႇယဝ်ႉ။

ၵွပ်ႈၼႆလႄႈ ယူႇတီႈၼႆႈသေ ၶႂ်ႈတိုၵ်းသူၼ်းထိုင် ၽူႈလူင်ႉလႅၼ်ႇ၊ ၽူႈၵတ်ႉၶႅၼ်ႇ လိၵ်ႈၵူႈၶိူဝ်းၶိူဝ်း ၼႂ်းမိူင်းတႆးႁဝ်းၶဝ် ၶႅၼ်းတေႃႈပိုတ်ႇပၼ်တိုဝ်ႉတၢင်း ႁႂ်ႈၵူၼ်းၶိူဝ်းႁဝ်း  လႆႈသွၼ်လႆႈႁဵၼ်းဢဝ် လိၵ်ႈဢၼ်ၶဝ်ၶႂ်ႈမေႃၼၼ်ႉ ၵႃႈတီႈၼႂ်းမိူင်းတႆး (ၵႃႈတီႈၼႂ်းမိူင်းႁဝ်း) ၼႆႉသေၵမ်း။

ၵဝ်ၶႃႈတႄႉ ဢိမ်ႇဢိူဝ်ႇမိူဝ်ႇၸၢၼ်ႈ ဢၼ်လႆႈႁၼ်ၵူၼ်းၼုမ်ႇၼေႃႇတႅၼ်းၶိူဝ်း သႅၼ်းႁုၼ်ႈမႂ်ႇတႆးႁဝ်း လႆႈၵႂႃႇႁႃသွၼ်ဢဝ် တၢင်းႁူႉတၢင်းမေႃ တီႈမၢၼ်ႈၼၼ်ႉတႄႉတႄႉ။

 ပေႃးတူၺ်းဢဝ် ဢၼ်ႁဝ်းၵႂႃႇႁႃသွၼ်ဢဝ်တီႈမၢၼ်ႈၼႆႉၵူၺ်း မၼ်းပွင်ႇဝႃႈ (ၼႄလႆႈဝႃႈ) ၽၢႆႇလိၵ်ႈလၢႆးၼႆႉ တႆးႁဝ်းပႆႇၶိုတ်းမၢၼ်ႈ၊ တႆးႁဝ်းဢမ်ႇပူၼ်ႉမၢၼ်ႈလႆႈ ၼႆၼၼ်ႉၵူၺ်း။ မၢၼ်ႈၼၼ်ႉ ပေႃးႁဝ်းၵႂႃႇယူႇၶူၼ်းၶၢဝ်းလေႃးလႄးၶဝ်တူၺ်းၼႆ မၢၼ်ႈၺၢမ်ႉမီးတင်းၼမ်၊ တင်းလၢႆ တွၼ်းသေဝႃႈ ၶဝ်မီးလူင်ပွင်ၸိုင်ႈမၢၼ်ႈ ယူႇၽၢႆႇလင်ၶဝ်ဝႆႉ မွၵ်ႈၼၼ်ႉၵူၺ်း။ မၢၼ်ႈၼႆႉ လိူဝ်သေမေႃၽၢမ်းပုင်ႇယဝ်ႉ ဢမ်ႇမီးသင်။

ပေႃးဝႃႈ ပၢႆးပၺ်ႇၺႃႇတႆး ဢမ်ႇၶိုတ်းမၢၼ်ႈၼႆ ယႃႇပေမႃးလၢတ်ႈၽၢႆႇၼႃႈၵဝ်၊ ၵဝ်ဢမ်ႇၶႂ်ႈငိၼ်း၊ ၵဝ်ၶႃႈတေလုၵ်ႉၽိုၼ်ႉပႅတ်ႈ လွင်ႈပွႆႇၵူၼ်းတႆး ၵႂႃႇႁႃသွၼ်ဢဝ်တၢင်းႁူႉတၢင်းမေႃတီႈမၢၼ်ႈၸိူဝ်းၼၼ်ႉတင်းသဵင်ႈ။

ဝၼ်းမိူဝ်ႈၼႆႉ ႁဝ်းမီးၸၼ်ႉၸွမ်တႆး ႁင်းၵူၺ်းယဝ်ႉ။ ႁဝ်းမီးၶေႃးလဵၵ်ႉႁင်းၵူၺ်းယဝ်ႉ။ ႁဝ်းထုၵ်ႇလီဢွၼ်ၵၼ် မႃးႁဵၼ်းဢဝ်တီႈၸၼ်ႉၸွမ်တႆးႁဝ်း၊ ၶေႃးလဵၵ်ႉတႆးႁဝ်း၊ ႁူင်းႁဵၼ်းတႆးႁဝ်း ဢၼ်မီးၵူၼ်းတႆး ပဵၼ်ၵေႃႉသွၼ်ပၼ်ၼၼ်ႉယဝ်ႉ။ ပေႃးဢမ်ႇၼၼ် ပၢႆးဝူၼ်ႉၵူၼ်းတႆး တေလႅၼ်ႈၸွမ်းလင်မၢၼ်ႈတိၵ်းတိၵ်းယဝ်ႉ။ 

ႁႂ်ႈၵူၼ်းၶိူဝ်းတႆးၵဝ်ၶႃႈ မေႃပွင်ႇၸႂ်သေ

>>> တိုၼ်းႁၢၼ် တေၸဝမ်သ (လၢင်းၶိူဝ်း)