ယႃႈမဝ်းၵမ် ယႃႈမၼႆႉ ၵွင်ႉမၼ်းငူၼ်ႉမၼ်း
ၽွၼ်းႁၢႆႉမၼ်း ႁၢႆႉလိူဝ်ယႃၵွင်ႉ ယႃငူၼ်ႉ ယႃဝိူဝ်ႇ
ဢၼ်ၵိၼ်ယဝ်ႉ ႁဵတ်းႁႂ်ႈတၢႆၵႂႃႇၵမ်းလဵဝ်ၼၼ်ႉၵွၼ်ႇဢိူဝ်ႈ။
ယႃၵွင်ႉယႃဝိူဝ်ႇ ယႃငူၼ်ႉၼႆႉ ပေႃးၵိၼ်ယဝ်ႉတၢႆၵႂႃႇၵမ်းလဵဝ်ယဝ်ႉ
မၼ်းဢမ်ႇၸၢင်ႈႁဵတ်းလွင်ႈသုၵ်ႉယုင်ႈဢူၼ်ၵဝ်းသင်
မၼ်းဢမ်ႇၸၢင်ႈပၼ်တၢင်းယၢပ်ႇၽိုတ်ႇၽႂ်
မၼ်းဢမ်ႇၸၢင်ႈႁဵတ်းႁႂ်ႈၵူၼ်းလႄႈတူင်ႇဝူင်းႁဝ်းတူၵ်းတႅမ်ႇ
မၼ်းဢမ်ႇႁဵတ်းႁႂ်ႈၼႃႈႁိူၼ်းလူႉ
မၼ်းဢမ်ႇၸၢင်ႈႁဵတ်းႁႂ်ႈၵူၼ်းႁဝ်းပဵၼ်ၵူၼ်းယွင်ႇမႃႈ
မၼ်းဢမ်ႇၸၢင်ႈႁဵတ်းႁႂ်ႈၵူၼ်းႁဝ်းၵွတ်းၽၢၼ်သင်
မၼ်းဢမ်ႇၸၢင်ႈႁဵတ်းႁႂ်ႈၵူၼ်းႁဝ်းႁၢမ်းတၢင်းႁူႉ ပေႃးၵိၼ်ယဝ်ႉၵေႃႈတၢႆယဝ်ႉ
မၼ်းဢမ်ႇႁဵတ်းသင်လႆႈယဝ်ႉ။
ယႃႈမယႃႈၽိၼ်ႇ ၸိူဝ်းၼႆႉပေႃးၵိၼ်ၼႆ
မၼ်းၸၢင်ႈႁဵတ်းလွင်ႈသုၵ်ႉယုင်ႈဢူၼ်ၵဝ်း
မၼ်းၸၢင်ႈပၼ်တၢင်းယၢပ်ႇၽိုတ်ႇပိူၼ်ႈ
မၼ်းၸၢင်ႈႁဵတ်းႁႂ်ႈၵူၼ်းလႄႈတူင်ႇဝူင်းၵူၼ်းႁဝ်းတူၵ်းတႅမ်ႇ
မၼ်းၸၢင်ႈႁဵတ်းႁႂ်ႈၼႃႈႁိူၼ်းလူႉ
မၼ်းၸၢင်ႈႁဵတ်းႁႂ်ႈၵူၼ်းႁဝ်းပဵၼ်ၵူၼ်းယွင်ႇမႃႈ
မၼ်းၸၢင်ႈႁဵတ်းႁႂ်ႈၽူဝ်မေးႁၵ်ႉၵၼ်ၽိတ်းၵၼ်
မၼ်းၸၢင်ႈႁဵတ်းႁႂ်ႈၵူၼ်းႁဝ်းၵွတ်းၽၢၼ်မႃး
မၼ်းၸၢင်ႈႁဵတ်းႁႂ်ႈၵူၼ်းႁဝ်းႁၢမ်းတၢင်းႁူႉ
မၼ်းႁဵတ်းႁႂ်ႈၵူၼ်းႁတ်းႁၢၼ်ပဵၼ်ၵူၼ်းၶီႈယၢၼ်ႈၶီႈၵူဝ်ၵႂႃႇ
လၢႆပီလၢႆဝၼ်းလၢႆလိူၼ် ဢမ်ႇၼၼ်တေႃႇၸူဝ်ႈသုတ်းပၢၼ်
ယႃႈမၼႆႉမၼ်းလီၵူဝ်လိူဝ် မၢၵ်ႇၵွင်ႈ မၢၵ်ႇပွမ်း
မၢၵ်ႇလူင် မၢၵ်ႇၼူးၶြီးရီးယႃး ယႃၵွင်ႉယႃဝိူဝ်ႇယႃငူၼ်ႉၸိူဝ်းၼၼ်
တေႉ"ဝႃႈ"ၵွၼ်ႇယဝ်ႉ။
ယႃၵွင်ႉယႃဝိူဝ်ႇယႃငူၼ်ႉၸိူဝ်းၼၼ်ႉ
သင်ၸိူဝ်ႉဝႃႈၵူၼ်းႁဝ်းႁူႉဝႃႈ ပေႃးၵိၼ်ယဝ်ႉတၢႆၵမ်းလဵဝ်
ဢမ်ႇၼၼ်ပဵၼ်ရေႃးၵႃႇၸပ်းတၢင်းပဵၼ်ၵမ်းလဵဝ်ၼႆၼႆၸိုင်
ၵူၼ်းၵိၼ်မၼ်းၵေႃႈတေဢမ်ႇမီးတင်းၼမ်လႆႈ
မိူၼ်ၼင်ႇၵူၼ်းၵိၼ်ယႃႈမမိူဝ်ႈလဵဝ်ၼႆႉ!
ယႃႈမၼႆႉသမ်ႉ သင်ဝႃႈၵိၼ်ယဝ်ႉ
ၶဝ်ဝူၼ်ႉဝႃႈၵူၼ်းႁဝ်းတေၵႆႉ တေလႅတ်းဝႃႈၼႆသေ
ဢွၼ်ၵၼ်ၵိၼ်ယူႇယဝ်ႉ ပေႃးၵိၼ်ယဝ်ႉၵေႃႈ
မိူဝ်ႈၵွင်ႉမၼ်းၶိုၼ်ႈလႄႇၼႂ်းတူဝ်ဢမ်ႇသဵင်ႈၼၼ်ႉၵွႆး
တေႁႅင်းတေၵႆႉၵေႃႈ ပေႃးၵွင်ႉမၼ်းသဵင်ႈယူတ်းၵႂႃႇယဝ်ႉၸိုင်
ဢမ်ႇလႆႈၵိၼ်ယဝ်ႉၵေႃႈ ႁႅင်းဢူၼ်ႈမႃး ၶီႈၶၢၼ်ႉမႃး
ဢမ်ႇၶႂ်ႈတူင်ႉဢမ်ႇၶႂ်ႈၼိုင်မႃး ၸႂ်ပွတ်းမႃး ၸႂ်ၶႂ်ႈၸႃႉမႃးယဝ်ႉ ။
ပေႃးၸပ်းယိၼ်ႉမၼ်းမႃးယဝ်ႉၵေႃႈ
ဢမ်ႇၵိၼ်ၵေႃႈဢမ်ႇယူႇလႆႈ ယဝ်ႉ
ပေႃးၵိၼ်ယူႇၵူႈဝၼ်းၵေႃႈ ငိုၼ်းဢၼ်ႁႃလႆႈလႄႈ
ငိုၼ်းဢၼ်ၸၢႆႇၵႃႈယႃႈမ ဢၼ်တေသိုဝ်ႉၵိၼ်ယႃႈမၼၼ်ႉ
လႆႈသဵင်ႈၼမ်လိူဝ်လႄႈ ႁႃဢမ်ႇပေႃး ၸၢႆႇဢမ်ႇမီး ၵိၼ်ဢမ်ႇပေႃးၵဵပ်း
ႁႂ်ႈပေႃးမၢၵ်ႈႁႂ်ႈမီးမႃးလႆႈယဝ်ႉသေဢမ်ႇၵႃး
ဢမ်ႇပေႃးပၼ်ႁႂ်ႈၼႃႈႁိူၼ်း ၵႃႈႁူင်းႁဵၼ်းပၢႆးပၺ်ၺႃႇ
ၵႃႈၶဝ်ၽၵ်းၸိူဝ်းၼႆႉၵွႆးၵေႃႈ ဢမ်ႇပပေႃးဢမ်ႇၵုမ်ႇယဝ်ႉ
ပေႃးဢမ်ႇမီးငိုၼ်းမႃး ႁႃငိုၼ်းလႆႈယၢပ်ႇမႃးယဝ်ႉၵေႃႈ
ဢဝ်ၸႂ်ၸူးငၢႆႈၶႂ်ႈလႆႈသေ ႁႃလၵ်ႉပိူၼ်ႈ ႁိမ်ပိူၼ် ၵူႈပိူၼ်ႈ မႃးယဝ်ႉ
ပေႃးမီးပေႃႈမႄႈၵေႃႈ ႁႃယွၼ်းငိုၼ်းပေႃႈမႄႈ ပေႃးယွၼ်းဢမ်ႇလႆႈသမ်ႉ
ၽိတ်းပေႃႈမႄႈ ထိုင်တီႈၶႃႈတၢႆ ၵူၼ်းၼႂ်းႁိူၼ်း ပေႃႈမႄႈလုၵ်ႈမေးၸဝ်ႈၵဝ်ႇၶိုၼ်း
ၵေႃႈယၢမ်ႈမီးမႃးယဝ်ႉ။
ထိုင်ၵမ်းလိုၼ်းမႃး
ၸၢင်ႈၸပ်းပႃးၸိူဝ်ႉမႅင်းတၢင်းပဵၼ် ရေႃးၵႃႇ
ၵိၼ်ႇသႃႇ(မရဵင်း) လႄႈ ရေႃးၵႃႇ AIDS ထႅင်ႈၵွၼ်ႇယဝ်ႉ
(ရေႃးၵႃႇမရဵင်းလႄႈ AIDS ၼႆႉပေႃးပဵၼ်ယဝ်ႉၼႆယႃယၢပ်ႇၼႃႇၼႃႇ
မၢင်ၵမ်းယႃဢမ်ႇလႆႈၵေႃႈမီးၵွၼ်ႇယဝ်ႉ)
ယွၼ်ႉပိူဝ်ႈၸိူင်ႉၼင်ႇၼႆလႄႈ ၶႂ်ႈယွၼ်းသင်ႇ.........
ဢူၺ်းၵေႃႉပီႈၼွင်ႉႁဝ်းၶဝ် ၶတ်းၸႂ်သွၵ်ႈႁႃလဵပ်ႈႁဵၼ်းတၢင်းႁူႉၵႅမ်တူဝ်
ၸွႆႈထႅမ် ဢူၺ်းၵေႃႉ ပီႈၼွင်ႉ ၸိူဝ်းၶိူဝ်းႁဝ်း ဝၼ်းမိူဝ်းၼႃႈ
ႁႂ်ႈၵၢင်းယၢၼ် ၽေးၶဵၼ်လူင်ယႃႈမဝ်းၵမ် သေၵမ်း........
ပၢႆၵမ်_ #ၶိူဝ်းသႅင်တိုၼ်းတႆး