မႄႈၶူင်းၵၢင် ၽြႃးပၢင်မိူင်းၵူၼ်း

မိူဝ်ႈသူလႆႈ 1 ၶူပ်ႇ၊ မႄႈ သွမ်ဢူ လႄႈ ယဵမ်ႈၵူလုမ်းလႃး။

သူသမ့်ႁွင့်ႁႆႈတင်းၶိုၼ်း၊ မႄႈသူဢမ်ႇလႆႈလပ်းလႆႈၼွၼ်း။

မိူဝ်ႈသူလႆႈ 2 ၶူပ်ႇ၊ မႄႈသွၼ်ပႆတၢင်း။

ၽွင်းယၢမ်းမႄႈသူႁွင့်ႁႃ သူသမ့်လႅၼ်ႈပၢႆႊ။

မိူဝ်ႈသူလႆႈ 3 ၶူပ်ႇ၊ မႄႈဢဝ်မဵတ့်တႃႇသေ ႁဵတ်းတၢင်းၵိၼ်လဵင့်လူ။

သူသမ့်ဢဝ်ဢၢင်ႇဝၢၼ်ႇတူၵ်းတႅၵ်ႇလႅဝ်တင်းၼမ်။

မိူဝ်ႈသူလႆႈ 4 ၶူပ်ႇ၊ မႄႈ သိုဝ့်ၵမ်တႅမ်ႈသီၸေး မႃးပၼ်။

သူသမ့်ဢဝ်ၵႂႃႇယွမ့်ၽႃႁိူၼ်းၽႃယေး ၶူဝ်းၸႂ်ႉၽိူၼ်တင်ႇ ပေႃးလၢႆးၵႂႃႇၵူႊတီႈ။

မိူဝ်ႈသူလႆႈ 5 ၶူပ်ႇ၊ မႄႈ သိုဝ့်သိူဝ်ႈၶူဝ်းမႂ်ႇမႃးပၼ်။

သူသမ့် ထိမ်ႈပႅတ်ႈ ပေႃးမၢၵ်ႇပေႃးမိူဝ်။

မိူဝ်ႈသူလႆႈ 6 ၶူပ်ႇ၊ မႄႈ ဢွၼ်သူၵႂႃႇၶိုၼ်ႈႁူင်းႁဵၼ်း။

သူသမ့် ထဵင်ဝႃႈ “ဢမ်ႇၶႂ်ႈၵႂႃႇ!”။

မိူဝ်ႈသူလႆႈ 7 ၶူပ်ႇ၊ မႄႈ သိုဝ့်မၢၵ်ႇၼင်လွမ်ႊ မႃးပၼ်။

သူသမ့် ပိတ့်ၵႂႃႇၸူဝ်ႈသႂ်ႇ မၢၼ်ႇၾၵ်းတူႊႁူးလႅင်းပိူၼ်ႈလႅဝ်။

မိူဝ်ႈသူလႆႈ 8 ၶူပ်ႇ၊ မႄႈ သိုဝ့်ၶဝ်ႈမုၼ်းၼမ့်မူၺ် ပၼ်သူၵိၼ်။

သူသမ့် ဢဝ်တူၵ်းဢဝ်ယွၺ်ႉ ပေႃးၸွတ်ႇႁိူၼ်းၸွတ်ႇယေး။

မိူဝ်ႈသူလႆႈ 9 ၶူပ်ႇ၊ မႄႈ သွၼ်သူလဵၼ်ႈႁႆႇၶိူင်ႈမူၼ်ႊ။

သူသမ့် ဢမ်ႇၶဝ်ႈၸႂ်ၶဝ်ႈၶေႃႈ ဢမ်ႇၶႂ်ႈၽိုၵ်းလွင်ႈႁႆႇတိုင်ႊ။

မိူဝ်ႈသူလႆႈ 10 ၶူပ်ႇ၊ မႄႈ ၸွမ်းႁပ့်သူင်ႇ တင်းၼႂ်တင်းၶမ်ႈ။ ၵႂႃႇႁူင်းႁဵၼ်း၊ ၵႂႃႇၵိဝ်ႇသျိၼ်ႇ၊ ၵႂႃႇပၢင်ႇလဵၼ်ႈတၢင်းလဵၼ်ႈ၊ ၵႂႃႇပွၺ်းဝၼ်းၵိူတ်ႇဢူၺ်းၵေႃႉ၊ ၵႂႃႇတီႈၼိူင်ႈယဝ့်တီႈၼိူင်ႈ။

သူသမ့် မွင်းႁႂ်ႈၽႅဝ်ဢွင်ႈၽႅဝ်တီႈၵွၺ်းလႃႈ ဢွင်လူင်းလူတ့်သေ ဢမ်ႇတွၼ့်ဝၢႆႇတူၺ်းၶိုၼ်း ၽၢႆႇလင်သေပွၵ်ႈ။

မိူဝ်ႈသူလႆႈ 11 ၶူပ်ႇ၊ မႄႈ ဢွၼ်သူလႄႈဢူၺ်းၵေႃႉသူ ၵႂႃႇတူၺ်းငဝ်းတူင့်။

သူလၢတ်ႈမႄႈသူ ႁႂ်ႈၵႂႃႇၼင်ႈတၢင်ႇတီႈ။

မိူဝ်ႈသူလႆႈ 12 ၶူပ်ႇ၊ မႄႈ ပၼ်ၾၢင့်ယႃႇႁႂ်ႈတူၺ်းထီးဝီး၊ တူၺ်းၾူၼ်း တင်းဝၼ်းတင်းၶိုၼ်း။

သူသမ့် မွင်းႁႂ်ႈမႄႈသူဢွၵ်ႇႁိူၼ်းၵႂႃႇတၢင်းၼွၵ်ႈယူႇတႃႇသေႇ။

မိူဝ်ႈသူလႆႈ 13 ၶူပ်ႇ၊ မႄႈ ႁႂ်ႈသူၵႂႃႇၵႅတ်းၶူၼ်ႁူဝ်။

သူသမ့် လၢတ်ႈမႄႈသူဝႃႈ မႄႈသူပဵၼ်ၵူၼ်းဢမ်ႇၶိုတ်းၵၢပ်ႈ။

မိူဝ်ႈသူလႆႈ 14 ၶူပ်ႇ၊ မႄႈ သူင်ႇသူၵႂႃႇၶိုၼ်ႈပၢင်ၽိုၵ်းၽွၼ့်ပဵၼ်လိူၼ် မိူဝ်ႈၶၢဝ်းဢိုတ်းႁူင်းႁဵၼ်း။

သူသမ့် လိုမ်းတႅမ်ႈလိၵ်ႈၾၢၵ်ႇသူင်ႇမႃးႁႂ်ႈမႄႈသူ။

မိူဝ်ႈသူလႆႈ 15 ၶူပ်ႇ၊ မႄႈ ပွၵ်ႈႁဵတ်းၵၢၼ်သေ ၽႅဝ်ႁိူၼ်းမႃး၊ ဢၢၼ်းမႃးၵွတ်ႇၼူမ်သူ၊ ႁၵ့်ႁွမ်သူ။

သူသမ့် ၶတ်းၾၵ်းတူသေ မူၵ်းယူႇၼႂ်းလုၵ်းၼွၼ်း။

မိူဝ်ႈသူလႆႈ 16 ၶူပ်ႇ၊ မႄႈ သွၼ်သူၶပ်းလူတ့်။

သူသမ့် မွင်းႁႂ်ႈတၼ်းလႃႈ ၶပ်းလူတ့်ဢွၵ်ႇၵႂႃႇၵမ်းလဵဝ်။

မိူဝ်ႈသူလႆႈ 17 ၶူပ်ႇ၊ မႄႈ မီးလွင်ႈယႂ်ႇလူဝ်ႇၸႂ်ႉၾူၼ်း(ၾူၼ်းတမ်း)။

သူသမ့် လၢတ်ႈၾူၼ်းယူႇ တင်းၶိုၼ်းတင်းၶိုၼ်း။

မိူဝ်ႈသူလႆႈ 18 ၶူပ်ႇ၊ မႄႈ ဢွၼ်သူၵႂႃႇၶိုၼ်ႈႁူင်းႁဵၼ်းၸၼ့်ၸွမ်။

သူသမ့် ၵႂႃႇလႄႇမူၼ်ႊၵိၼ်ၵျေႃႇ တေႃႇၾႃႉပၢင်ႇမိူင်းလႅင်း။

မိူဝ်ႈသူလႆႈ 19 ၶူပ်ႇ၊ မႄႈ ပၼ်ငိုၼ်းတႃႇသူႁႂ်ႈၵႃႊႁဵၼ်း၊ ထႅမ်ႁွပ်ႇထူင်ႁူင်းႁဵၼ်းသေ ဢွၼ်ၵႂႃႇၼႂ်းဝၢင်းၸၼ့်ၸွမ်။

သူသမ့် သင်ႇၼၢႆမႄႈသူ ၽၢႆႇၼွၵ်ႈဝၢင်းၸၼ့်ၸွမ်၊ သူဢမ်ႇၶႂ်ႈႁႂ်ႈဢူၺ်းၵေႃႉသူ ႁၼ်မႄႈသူ။

မိူဝ်ႈသူလႆႈ 20 ၶူပ်ႇ၊ မႄႈ ထၢမ်ဝႃႈ ၸွင်ႇသူထူပ်းသေၵေႃႉၵေႃႉ။

သူသမ့် ၶၢၼ်ဝႃႈ “ၼႆ့ဢမ်ႇၸႂ်ႈ ၵၢၼ်မႄႈႁဝ်း”။

မိူဝ်ႈသူလႆႈ 21 ၶူပ်ႇ၊ မႄႈ ပၼ်တၢင်းၶႆႈၸႂ် ႁႂ်ႈသူၼ်ဝူၼ့်တႃႇ ၸူဝ်ႊပၢၼ်သူ ဝၼ်းတႃမိူဝ်းၼႃႈ။

သူသမ့် ၶၢၼ်ဝႃႈ “ၵဝ်ဢမ်ႇၶႂ်ႈမိူၼ်မႄႈႁဝ်း”။

မိူဝ်ႈသူလႆႈ 22 ၶူပ်ႇ၊ မႄႈ ၸူမ်းၸွမ်းလွင်ႈသူၸူပ်းၶူးၸၼ့်ၸွမ်။

သူသမ့် ယွၼ်းငိုၼ်းမႄႈသူ တႃႇဢွၵ်ႇလႄႇလၢဝ်းမိူင်း။

မိူဝ်ႈသူလႆႈ 23 ၶူပ်ႇ၊ မႄႈပၼ်ႁွင်ႈၵၢၼ်(ႁွင်ႈသုၼ်ႇတူဝ်တႃႇႁဵတ်းၵၢၼ်) တႃႇသူၸႂ်ႉသုၼ်ႇတူဝ်။

သူသမ့် ၶႆႊၼႄဢူၺ်းၵေႃႉသူဝႃႈ ႁွင်ႈၵၢၼ်သူႁၢင်ႊၸႃႉ။

မိူဝ်ႈသူလႆႈ 24 ၶူပ်ႇ၊ မႄႈ ထူပ်းဢူၺ်းၵေႃႉသူသေ ထၢမ်လွင်ႈၽႅၼ်ၵၢၼ်မိူဝ်းၼႃႈသူ တီႈဢူၺ်းၵေႃႉသူ။

သူသမ့် ဢွၵ်ႇၸႂ်လမ်တိုင်ႈသဵင်ႁႅင်းသေ တပ့်မႄႈသူဝႃႈ “မႄႈ! ပေႃးလႆႈယဝ့်”။

မိူဝ်ႈသူလႆႈ 25 ၶူပ်ႇ၊ မႄႈႁဵတ်းပွၺ်းပၢင်ၶႅၵ်ႇပၼ်သူ။ ယဝ့်ၵေႃႈ မႄႈသူတူၵ်းၼမ့်တႃသေ လၢတ်ႈၼေလွင်ႈ မႄႈႁၵ့်သူ ၼမ်ၵႃႊႁိုဝ်။

သူသမ့် ၶၢႆႉတီႈၵႂႃႇမႃး ပေႃးၸွတ်ႇမၢၼ်ႈၸွတ်ႇမိူင်း။

မိူဝ်ႈသူလႆႈ 30 ၶူပ်ႇ၊ မႄႈ သိုပ်ႇၾူၼ်းမႃး လိူၺ်ႈလွင်ႈလုၵ်ႈဢွၼ်ႇသူ။

သူသမ့် ၶၢၼ်ဝႃႈ “ၵူႊၸိူဝ့်ၵူႊလွင်ႈ ဢမ်ႇမိူၼ်မိူဝ်ႈပၢၼ်မႄႈႁဝ်းၼၼ့်ယဝ့်”။

မိူဝ်ႈသူလႆႈ 40 ၶူပ်ႇ၊ မႄႈ သိုပ်ႇၾူၼ်းမႃး ႁႂ်ႈသူၶုၵ်းၸႂ်လႆႈ လွင်ႈဝၼ်းၵိူတ်ႇ ႁိုဝ် ၸူဝ်ႊၶူပ်ႇမႄႈသူ။

သူသမ့်ၶၢၼ်ဝႃႈ “မိူဝ်ႈလဵဝ်ၵၢၼ်မၢင့်ၼႃႇ” ။

မိူဝ်ႈသူလႆႈ 50 ၶူပ်ႇ၊ မႄႈယူႇဢမ်ႇလီၵိၼ်ဢမ်ႇဝၢၼ်သေ ပႂ်ႉမွင်း လွင်ႈယဵမ်ႈၵူလုမ်းလႃးတီႈသူ။

သူသမ့် ၵုမ်ႇႁႃယဵမ်ႈဢၢၼ်ႇလိၵ်ႈလၢႆး ၵဵဝ်ႇလိူၺ်ႈလွင်ႈ တေပဵၼ်ပေႃႈမႄႈလုၵ်ႈဢွၼ်ႇလီယူႇ။

 ဝၼ်းၼိူင်ႈမႃး၊ မႄႈ ၵိုင့်ၵၢင့်တၢႆၵႂႃႇ။ ဢၼ်သူ ဢမ်ႇယၢမ်ႈႁဵတ်းတေႃႇမႄႈသူမႃး သေၸိူဝ့်သေလွင်ႈၼၼ့် မိူၼ်ၼင်ႇ ၾႃႉၽႃႇလူင်သေ တၵ်းမႃးၽႃႇသႂ်ႇမၢၵ်ႇႁူဝ်ၸႂ်သူ ယူႇယဝ့်။

 ပိူဝ်ႈၼႆ သင်ဝႃႈ မႄႈတိုၵ့်မီးယူႇၼႆ၊ ယႃႇလိုမ်းပၼ်တၢင်းႁၵ့်တေႃႇၶဝ်။ ပၼ်တၢင်းႁၵ့်တႃႇသေႇတႃႉ၊ ဢမ်ႇၼၼ် သင်ဝႃႈ မႄႈဢမ်ႇမီးယဝ့်ၼႆ ၶုၵ်းၸႂ်လႆႈ လွင်ႈမဵတ့်တႃႇႁူမ်ႈငဝ်းတၢင်းႁၵ့်မႄႈ တႃႇသေႇတႃႉ။ ၵွပ်ႈပိူဝ်ႈသင်ၼႆ ၼႂ်းၶူင်းၵၢင်ၼႆ့ မႄႈဢၼ်ဝႃႈၼၼ့် မီးၵေႃႉလဵဝ်ၵွၺ်း။ မႄႈၼႆ့ ပဵၼ်ၸူဝ်ႊပၢၼ်ႁဝ်းဢိူဝ်ႈ။

ၾၢၼ်ႊ - သိူဝ်ႊၶႂၢၼ်ၾႃႈ

(ဢိင်တီႈ - ၽိုၼ်လိၵ်ႈ Forward Email ၽိုၼ်ၼိူင်ႈသေ)