မိူဝ်ႈၼႆႉယဝ်ႉပဵၼ်ဝၼ်းလီ

ဝၼ်းမိူဝ်ႈၼႆႉ

မီးၵူၼ်းလၢႆလၢႆၵေႃႉ ဢမ်ႇလႆႈတိုၼ်ႇၶိုၼ်ႈမႃးၶိုၼ်း

ၵူၺ်းၵႃႈ ႁဝ်းတိုၵ်ႉမီးလူမ်းထူၺ်ႈၸႂ် မီးသၢႆၸႂ်ယူႇ၊

ဝၼ်းမိူဝ်ႈၼႆႉ 

ၵူၼ်းႁဝ်းၵမ်ႈၽွင်ႈ ဢၼ်ဢမ်ႇလႆႈႁၼ် 

လူၵ်ႈၶူင်းၵၢင်လူင်ၼႆႉ မီးတင်းၼမ်တင်းလၢႆ

ၵူၺ်းၵႃႈ 

ႁဝ်းတိုၵ်ႉတူၺ်းၽူၼ်း၊ တူၺ်းၾဵတ်ႉ၊ တူၺ်း TV၊ 

တူၺ်းလိၵ်ႈၸိူဝ်းၼႆႉလႆႈယူႇ၊

ဝၼ်းမိူဝ်ႈၼႆႉ

 မီးၵူၼ်းမၢင်ၵေႃႉ ဢမ်ႇတူင်ႉတူဝ်လႆႈ 

(ၸိူဝ်းပဵၼ်တၢင်းပဵၼ်ဢၼ်ၼွၼ်းယူႇတီႈႁူင်းယႃ)

ၵူၺ်းၵႃႈ

 ႁဝ်းတိုၵ်ႉၵႂႃႇမႃးပႆ လႆႈယူႇ၊ဝၼ်းမိူဝ်ႈၼႆႉ

ၵူၼ်းႁဝ်းမၢင်ၵေႃႉဢမ်ႇမီးငိုၼ်းတႃႇတေသိုဝ်ႉၵိၼ်ၶဝ်ႈ

ၵူၺ်းၵႃႈ 

ႁဝ်းယင်းမီးငိုၼ်းတႃႇတေသိုဝ်ႉၵိၼ်ၵေႃႇၾီႇ

 ၼမ်ႉသူမ်ႈၼမ်ႉၸဵမ်းယူႇ၊

မၢင်ပွၵ်ႈမႃးၼႆႉ 

ႁဝ်းယႃႇပေဝူၼ်ႉ ဢၼ်ႁဝ်းၶၢတ်ႇ ဢၼ်ႁဝ်းဢမ်ႇမီး

ၸိူဝ်းၼၼ်ႉသေယဝ်ႉၵေႃႈ ႁႂ်ႈမႃးဝူၼ်ႉသွၵ်ႈႁႃတူၺ်း

တီႈတူဝ်ႁဝ်း ဝႃႈႁဝ်းမီးဢီႈသင်ၽွင်ႈ 

ပေႃးႁဝ်းႁႃႁၼ်ယဝ်ႉ ဢမ်ႇဝႃႈမိူဝ်ႈၼႆႉ မိူဝ်ႈၽုၵ်ႈႁိုဝ်

မိူဝ်ႈႁိုဝ်းမၼ်းၵေႃႈတေပဵၼ် ဝၼ်းလီ တႃႇႁဝ်းတႃႇသေႇ။

လိူဝ်သေႉၼၼ်ႉသမ်ႉ 

ၵူၼ်းႁဝ်းမီးလွင်ႈဢၼ်မိူၼ်ၵၼ် လႄႈ ပႅၵ်ႇပိူင်ႈၵၼ်ထႅင်ႈ

ဢၼ်ၵူၼ်းႁဝ်းမီးမိူၼ်ၵၼ်ၵေႃႈ ပဵၼ်ၶၢဝ်းယၢမ်း

ၼႂ်းတႃႇၼိုင်ႈဝၼ်းၼၼ်ႉယဝ်ႉ ဢမ်ႇမီးၽႂ်ၵေႃႉလႂ် 

မီးၶၢဝ်းယၢမ်းၼမ်သေပိူၼ်ႈယဝ်ႉၵေႃႈ ဢမ်ႇမီးၽႂ်

ၵေႃႉလႂ် မီးၶၢဝ်းယၢမ်းဢေႇသေပိူၼ်ႈ ႁဝ်းမီးၶၢဝ်းယၢမ်း

သၢဝ်းသီႇၸူဝ်ႈမွင်းမိူၼ်ၵၼ်မူတ်းယဝ်ႉ။

ဢၼ်ႁဝ်းပႅၵ်ႇပိူင်ႈၵၼ်တႄႉ

ပဵၼ်လွင်ႈယိၼ်း(feeling) တီႈၶၢဝ်းယၢမ်းဢၼ်မီးမႃးၼၼ်ႉယဝ်ႉ မၢင်ၵေႃႉယိၼ်းဝႃႈ ဝၼ်းၼိုင်ႈၼႆႉ 

ၸိုင်ပေႉမႃးပွတ်းၼႃႇ မၢင်ၵေႃႉသမ်ႉယိၼ်းႁူႉဝႃႈ 

ဝၼ်းၼိုင်ႈၼႆႉ ၸိုင်ပေႉမႃးယၢဝ်းၼႆယူႇ

ၸႂ်ႈယဝ်ႉ

ဝၼ်းဢၼ်မီးတၢင်းသိူဝ်းၼၼ်ႉ တေယိၼ်းႁူႉဝႃႈ

ၶၢဝ်းယၢမ်းပွတ်းၶၢဝ်းယၢမ်းမီးဢေႇလိူဝ်သေမိူဝ်ႈ

ႁဝ်းထူပ်းလွင်ႈတုၵ်ႉ ၵွပ်ႈပိူဝ်ႈဝႃႈ ၸႂ်ၵူၼ်းႁဝ်းၼႆႉ 

ႁူႉဝႃႈ မိူဝ်ႈႁဝ်းမီးတၢင်းသိူဝ်း မိူဝ်ႈလႆႈထူပ်းတၢင်းသိူဝ်းၼၼ်ႉ ၶၢဝ်းယၢမ်းၸိုင်ပေႉဝႆး လွင်ႈတၢင်းသိူဝ်းၵေႃႈပူၼ်ႉၵႂႃႇပႅတ်ႈဝႆး ။

ဢီႈသင်ၵေႃႈယဝ်ႉ

ဢၼ်ႁဝ်းၶႂ်ႈႁႂ်ႈမၼ်းယူႇၸွမ်းႁဝ်းႁိုင်"ၸိုင်သမ်ႉပေႉၸဵဝ်းၽၢတ်ႇယၢၼ်ၵႂႃႇ ။

ဢီႈသင်ၵေႃႈယဝ်ႉ 

ဢၼ်ႁဝ်းၶႂ်ႈႁႂ်ႈမၼ်းပူၼ်ႉၵႂႃႇၵႆႁူၵႆတႃႁဝ်းဝႆး"ၼၼ်ႉသမ်ႉ ယူႇၸွမ်းႁဝ်းႁိုင်ဝႃႈႁိုင်ၵူၺ်းၵႃႈ တီႈတေႉမၼ်းတႄႉ

ပဵၼ်ႁဝ်းၵူၺ်း ဢၼ်ပွႆႇႁႂ်ႈလွင်ႈယိၼ်းႁူႉ(feeling)ၼၼ်ႉ မႃးႁူမ်ႇငမ်းတဵင်ပႅတ်ႈလွင်ႈတေႉ၊ 

လွင်ႈတေႉဢၼ်ဝႃႈၼၼ်ႉ 

ၼႂ်းၼိုင်ႈဝၼ်းၼၼ်ႉမီးလွင်ႈလီဢိၵ်ႇတင်းလွင်ႈႁၢႆႉယဝ်ႉ 

ယူႇတီႈႁဝ်းတေယူႇတီႈၸဵင်ႇလႂ်သေမုင်ႈတူၺ်း

ဝၼ်းၼိုင်ႈၼၼ်ႉၵူၺ်းယဝ်ႉၵေႃႈ တေပၼ်

ၼမ်ႉၸင်ႈၽၢႆႇလႂ်ၼၵ်းသေဢၼ်လႂ်ၼႆၼၼ်ႉၵူၺ်း ၊

လွင်ႈသိူဝ်းႁႃႉ 

လွင်ႈတုၵ်ႉႁဝ်းလိူၵ်ႈဢမ်ႇလႆႈ ႁဝ်းႁဵတ်းဢဝ်ဢမ်ႇလႆႈလေႃႇ ႁႂ်ႈဝၼ်းၼၼ်ႉပဵၼ်ဝၼ်းၸိူင်ႉႁိုဝ်ပုၼ်ႈတႃႇႁဝ်း

ဢၼ်ႁဝ်းလိူၵ်ႈလႆႈတႄႉ ၼႂ်ဝၼ်းၼိုင်ႈၼၼ်ႉ ႁဝ်းတေလိူၵ်ႈ

တူၺ်းဢၼ်လီမၼ်းႁႃႉ ဢမ်ႇၼၼ် လိူၵ်ႈတူၺ်းဢၼ်ႁၢႆႉမၼ်းၼႆၼၼ်ႉၵူၺ်း။

ပေႃးပဵၼ်ၵဝ်ၶႃႈတႄႉ

လွင်ႈသင်သေဢမ်ႇဝႃႈ သင်ဝႃႈဢမ်ႇလိူၵ်ႈလႆႈ ဢမ်ႇလိူဝ်လႆႈၼႆ ၵဝ်ၶႃႈတေယွမ်းႁပ်ႉမၼ်းသင်ဝႃႈလိူၵ်ႈလႆႈၼႆ 

တေလိူၵ်ႈမုင်ႈတူၺ်းဢၼ်လီမၼ်း လိူၵ်ႈတူၺ်းမၼ်း

ၼႂ်းလွင်ႈလီဢၼ်ၸိုၼ်ႈပၢင်ႇသႂ်ငၢမ်း၊

သင်ၸိူဝ်ႉဝႃႈ 

ပၢႆးဝူၼ်ႉလႄႈဢွၵ်းဢေႃၵူၼ်းႁဝ်းၼႆႉ ၸၢင်ႈဢဝ်

လူင်းတိုၼ်းလၢင်းလႆႈၼႆ ၵေႃႉဢၼ်မေႃတူၺ်း

ႁၼ်လွင်ႈဢၼ်လီတီႈပိူၼ်ႈၼၼ်ႉ မၼ်းတိုၼ်းလႆႈ

ၼမ်ႉမႅတ်ႈၼမ်ႉတွၼ်းမၼ်းယူႇယဝ်ႉ။

တိူၵ်ႈတီႈဢမ်ႇလႆႈၼမ်ႉမႅတ်ႈၼမ်ႉတွၼ်းမႃးၼႆၵေႃႈ 

တိုၼ်းဢမ်ႇၶၢတ်ႇထုၼ်း(ဢမ်ႇသုမ်းၵေးလၢင်း)၊ 

လွင်ႈတၢင်းသိူဝ်းၼၼ်ႉ တေလႆႈႁပ်ႉဢဝ်

တဵမ်ꧦထူၼ်ႈꧦယူႇ မိူဝ်ႈတိုၼ်ႇၸဝ်ႉမႃးၵူႈဝၼ်းꧦၼၼ်ႉ 

တေလႆႈဝူၼ်ႉဝႃႈ ဝၼ်းၼႆႉယဝ်ႉတေလႆႈပဵၼ်ဝၼ်းလီ

ယဝ်ႉၵေႃႈလိုၼ်းသုတ်း

ဝၼ်းလီၼႆႉ ပဵၼ်ဝၼ်ဢၼ်မႂ်းလူလိၵ်ႈႁူဝ်ၼႆႉယဝ်ႉၵႂႃႇသေ ဢဝ်ပဵၼ်တၢင်းဝူၼ်ႉလီလီ ၸိုၼ်ႇလုၵ်ႉႁဵတ်းဢၼ်ထုၵ်ႇလီႁဵတ်း တႃႇၸူဝ်ႈၸၢတ်ႈပၢၼ်ၸဝ်ႈၵဝ်ႇႁၢင်ႈလီ  ဝၼ်းမိူဝ်းၼႃႈ ဢွၼ်ႇသူၶဝ်ၼၼ်ႉယဝ်ႉ။

ပိၼ်ႇတႅမ်ႈ 📖 သႅင်ၵေႃႇမိူင်း (မိူင်းပၼ်ႇ)