မိူဝ်ႈမီးတိုဝ်ႉတၢင်း ပေပၼ်လုတ်ႈႁၢမ်း

“ယၢမ်းမူင်းၼၼ်ႉ ပိူၼ်ႈဢမ်ႇႁဵတ်းၶၢႆဢၼ်ႁူၼ်ၶိုၼ်းၽၢႆႇလင်”ၼႆဝႃႇ မိူၼ်ၼၼ်ၼင်ႇၵဝ်ႇ ၶၢဝ်းယၢမ်းၵေႃႈ မၼ်းတေဢမ်ႇပႂ်ႉၵူၼ်းႁဝ်း ၸူဝ်ႈပၢၼ်ႁဝ်းၵေႃႈ ဢမ်ႇသဝ်းတီႈၵဝ်ႇတီႈလဵဝ် ၸူဝ်ႈၶူပ်ႇႁဝ်းၵေႃႈ တေဢမ်ႇလဵၵ်ႉမႃး လွင်ႈထူပ်းတူဝ်ႁဝ်းၵေႃႈ တေၸၢင်ႈတိူဝ်းၼမ်မႃး ၼႃႈၵၢၼ်ႁဝ်းၵေႃႈ တေၸၢင်ႈၼမ်မႃးၸွမ်း ပေႃးၸိူင်ႉၼၼ် မိူဝ်ႈပႆႇထိုင်ဝၼ်းၼၼ်ႉ ႁဝ်းလူဝ်ႇဝူၼ်ႉဝႆႉဝၼ်းၼႆႉ။

 မိူဝ်ႈပႆႇထိုင်ယၢမ်းၼၼ်ႉ ႁဝ်းလူဝ်ႇႁၢင်ႈႁႅၼ်းဝႆႉယၢမ်းၼႆႉ၊ 

တူဝ်ၸႂ်ၼႆႉၵေႃႈ မၼ်းဢမ်ႇမီးသင်ပဵၼ်ပိူင်တၢႆ ပိၵ်ႉသမ်ႉမိူဝ်ႈလဵဝ် ႁဝ်းလႆႈပဵၼ်ၵေႃႉဢၼ် မီးလွင်ႈဢဵၼ်ႇမႃႇႁႅင်းၶႅင် ဝႃႈၼႆသေတႃႉ ဝၼ်းၼိုင်ႈမႃး ဢဵၼ်ႁႅင်းႁဝ်းၼၼ်ႉ တိုၼ်းတေၸၢင်ႈယူပ်ႈယွမ်းၵႂႃႇဢမ်ႇႁၢင်ႉယဝ်ႉ။ 

မိူၼ်ၼင်ႇတွၼ်ႈသွၼ်မႃႉလီႈၽူႈႁတ်းႁၢၼ်တူဝ်ၼိုင်ႈ

မႃႉတူဝ်ၼႆႉ မၼ်းလႅၼ်ႈဝႆးၼႃႇ" ၼိုင်ႈဝၼ်းၼႆႉ မၼ်းလႅၼ်ႈလႆႈလၵ်းပွင်း မၼ်းၼိုင်ႈႁဵင် ပေႃးပဵၼ်ၵၢင်ၶမ်ႈသမ်ႉ လႅၼ်ႈလႆႈလၵ်းပွင်းမၼ်းပႅတ်ႇပၢၵ်ႇၼႆယဝ်ႉ၊

 ၵွပ်ႈမၼ်းၼႆႉ မီးတၢင်းၵတ်ႉၶႅၼ်ႇ လႅၼ်ႈလႆႈဝႆးတႄႉ"လႄႈ မၼ်းၸင်ႇပႂ်ႉႁႂ်ႈတိုဝ်ႉတၢင်းလီ ၵၢၼ်လီၵိုင်ႇၵႃႈၼမ်ႉၵတ်ႉ ၵႃႈၶၼ် ၵၢၼ်ဢၼ်တေၸၢင်ႈလႆႈၼႃႈလႆႈတႃၼၼ်ႉ မႃးတူၵ်း ထိုင်မၼ်းယူႇ။

 မီးဝၼ်းၼိုင်ႈ ၵူၼ်းၵႃႉလူင် မႃးထၢမ်မၼ်းဝႃႈ

“ၵဝ်ပဵၼ်ၵူၼ်းၵႃႉလူင်ဢိူဝ်ႈ မႂ်းၸွင်ႇတေၶႂ်ႈႁဵတ်းၵၢၼ်ပၼ်ၵဝ်ၼႄႇ?” ၼႆလႄႈ မႃႉလီႈၽူႈႁတ်းႁၢၼ်လူင်ၸင်ႇတွပ်ႇဝႃႈ “ၵဝ်ၼႆႉပဵၼ်မႃႉလီႈၽူႈႁတ်းႁၢၼ်လူင်ဢိူဝ်ႈ ၵဝ်မီးတၢင်းၵတ်ႉၶႅၼ်ႇ လႅၼ်လႆႈၽႆးၽၢႆ ၵဝ်သမ်ႉတေၵႂႃႇႁဵတ်းၽူႈတၢင်ႇၵုၼ်ႇပၼ်မႂ်းလႆႈၸိူင်ႉႁိုဝ်”ၼႆတွပ်ႇၶိုၼ်းၵႂၢမ်းၵူၼ်းၵႃႉၼၼ်ႉသေ  သိုပ်ႇပႂ်ႉတိုဝ်ႉတၢင်းလီမၼ်းထႅင်ႈယူႇ။

 ထိုင်ၼင်ႇဝၼ်း႞ သိုၵ်းႁၢၼ်ၵေႃႉ႞ မႃးထၢမ်မၼ်း “ၵဝ်ပဵၼ်သိုၵ်းႁၢၼ်ၵေႃႉၼိုင်ႈဢိူဝ်ႈ ၸွင်ႇမႂ်း တေၶႂ်ႈႁဵတ်းၵၢၼ်ၸွမ်းၵဝ်ႁိုဝ်?”ၼႆ မၼ်းၸင်ႇၶွၼ်းႁူဝ်ၼႄသေ လၢတ်ႈဝႃႈ “ၵဝ်ၼႆႉပဵၼ်မႃႉလီႈၽူႈႁတ်းႁၢၼ်လူင်ဢိူဝ်ႈ ၵဝ်မီးတၢင်းၵတ်ႉၶႅၼ်ႇလႅၼ်ႈလႆႈၽႆးၽၢႆ ၵဝ်သမ်ႉတေၵႂႃႇႁဵတ်းႁိုဝ်ၶဝ်ႈပွႆးတိုၵ်းၸွမ်း သိုၵ်းႁၢၼ်ဢွၼ်ႇၸိူင်ႉမႂ်းၼႆႉလႃႇ”ၼႆ ႁင်းသိုၵ်းႁၢၼ် သိုပ်ႇပႂ်ႉတိုဝ်ႉတၢင်းလီမၼ်းထႅင်ႈယဝ်ႉ။

 သမ်ႉမီးမႃးထႅင်ႈဝၼ်းၼိုင်ႈ မူးသိူဝ်းၵေႃႉၼိုင်ႈ မႃးထၢမ်မၼ်း “ၵဝ်ပဵၼ်မူးသိူဝ်းလူင်ၵေႃႉၼိုင်ႈဢိူဝ်ႈ ၸွင်ႇမႂ်းတေ ၶႂ်ႈႁဵတ်းၵၢၼ်ၸွမ်းၵဝ်ႁိုဝ်?”မၼ်းၵေႃႈၶွၼ်းႁူဝ်ၼႄသေ လၢတ်ႈဝႃႈ “ၵဝ်ၼႆႉပဵၼ်မႃႉလီႈၽူႈႁတ်းႁၢၼ်လူင်ဢိူဝ်ႈ ၵဝ်မီး တၢင်းၵတ်ႉၶႅၼ်ႇ လႅၼ်ႈလႆႈၽႆးၽၢႆ ၵဝ်သမ်ႉတေႁဵတ်းႁိုဝ် ၵႂႃႇၶၢမ်ႇႁိူဝ်ႉၶၢမ်ႇၼူၼ်းၸွမ်းၼင်ႇမႂ်းမူးသိူဝ်းလႆႈလႃႇ မၼ်းဢမ်ႇ ၵိုင်ႇတၢၼ်ႇတၢင်းၵတ်ႉၶႅၼ်ႇၵဝ်”ၼႆႁင်းမူးသိူဝ်းသေ သိုပ်ႇပႂ်ႉတိုဝ်ႉတၢင်းလီမၼ်းထႅင်ႈယူႇယဝ်ႉ။

လိူၵ်ႈဢမ်ႇလႄႇ ၵမ်းၼၼ်ႉ ၶုၼ်လူင်ႁေႃၶမ်း 

တမ်းဝၢင်းၽႅၼ်ၵၢၼ် တီႈႁူဝ်သိုၵ်းလူင်ဝႃႈ “ၵဝ်ၸဝ်ႈလူဝ်ႇမႃႉလီႈၽူႈႁတ်းႁၢၼ် လူင်တူဝ်ၼိုင်ႈဢိူဝ်ႈ”ၼႆလႄႈ ႁူဝ်သိုၵ်းလူင်ၵေႃႈ ၸင်ႇလႆႈပိုၼ်ႇၽၢဝ်ႇပွႆႇၶၢဝ်ႇၸွတ်ႇတူဝ်ႈမိူင်းလႄႈ မၼ်းၸင်ႇၼႅတ်ႈၵႂႃႇ ၸူးတီႈႁူဝ်သိုၵ်းလူင်ၼၼ်ႉသေလၢတ်ႈဝႃႈ “မႃႉလီႈလူင် ၽူႈႁတ်းႁၢၼ် ဢၼ်ၸဝ်ႈႁဝ်းႁႃၼၼ်ႉ ပဵၼ်ၵဝ်ၶႃႈၼႆႉယဝ်ႉ”ၼႆ ႁင်းႁူဝ်သိုၵ်းလူင်ၼၼ်ႉယဝ်ႉ၊

 ႁူဝ်သိုၵ်းလူင်ၵေႃႈၸင်ႇထၢမ်တူၺ်းမၼ်း “ၸွင်ႇမႂ်းလူင်ႉလႅၼ်ႇ လွင်ႈသဵၼ်ႈတၢင်းလူင် တီႈၼႂ်းမိူင်းႁဝ်းၼႆႉႁႃႉ?” မၼ်းၵေႃႈၶွၼ်းႁူဝ်ၼႄၵမ်းၼိုင်ႈယူႇ၊

 ႁူဝ်သိုၵ်းၸင်ႇသိုပ်ႇထၢမ်ထႅင်ႈ “ၸွင်ႇမႂ်းယၢမ်ႈ ၶဝ်ႈပွႆးတိုၵ်းမႃးသေပၢင်ယူႇႁႃႉ?” မၼ်းၵေႃႈၶွၼ်းႁူဝ်ၼႄထႅင်ႈ၊ 

ၵမ်းလိုၼ်းႁူဝ်သိုၵ်းၸင်ႇထၢမ်ထႅင်ႈ “ၸွင်ႇမႂ်းယၢမ်ႈၶဝ်ႈ ထိူၼ်ႇၶိူဝ်းၼႃသေ လိုပ်ႈလမ်းတူဝ်ထိူၼ်ႇမႃးယူႇႁႃႉ?”မၼ်းၵေႃႈသမ်ႉၶွၼ်းႁူဝ်ၼႄထႅင်ႈၼင်ႇၵဝ်ႇ၊ 

ႁဵတ်းၼၼ်သေ ႁူဝ်သိုၵ်းလူင်ၸင်ႇဝႃႈႁင်းမၼ်း “ပေႃးၸိူင်ႉၼၼ် မႂ်းသမ်ႉမီးၼမ်ႉၵတ်ႉသင် မႂ်းသမ်ႉတေၶဝ်ႈတၢင်းတိုဝ်းလႆႈတီႈလႂ်လႃႇ?”ၼႆ လႄႈ မၼ်းၸင်ႇတွပ်ႇဝႃႈ “ၵဝ်ၶႃႈၼႆႉ ပဵၼ်မႃႉလီႈလူင်ၽူႈႁတ်းႁၢၼ် ၼိုင်ႈဝၼ်းၼႆႉလႅၼ်ႈလႆႈလၵ်းပွင်းမၼ်း ၼိုင်ႈႁဵင် ပေႃးၵၢင်ၶမ်ႈ လႅၼ်ႈလႆႈလၵ်းပွင်းမၼ်းပႅတ်ႇပၢၵ်ႇဢေႃႈ”ၼႆႁင်းႁူဝ်သိုၵ်းလူင်ယဝ်ႉ။

ၵမ်းၼၼ်ႉ ႁူဝ်သိုၵ်းလူင် ၸင်ႇၵျွၵ်းၶိုၼ်ႈၶီႇၼိူဝ်ၵွင်းလင်မႃႉၼၼ်ႉသေ ၸႂ်ႉမၼ်းလႅၼ်ႈၼႄတူၺ်းယဝ်ႉ မၼ်းၵေႃႈ ၼင်ႇဢဵၼ်ႁႅင်းမၼ်းမီး ၸင်ႇႁုပ်ႈဢဵၼ်ႁုပ်ႈႁႅင်းမၼ်းသေလႅၼ်ႈ တၼ်းလႆႈသိပ်းယၢင်ႈၵူၺ်း တိၼ်မၼ်း ဢူၼ်ႈသေ ႁိူဝ်ႇတီႈၵွင်းလင်မၼ်းၵေႃႈ ၸင်ႇၸိုမ်းဢွၵ်ႇမႃးယဝ်ႉ။

 ႁူဝ်သိုၵ်းလူင် ဢၼ်ႁၼ်ၼင်ႇၼၼ်သေ ၸင်ႇၵျွၵ်းလူင်း ၵွင်းလင်မၼ်းမႃးယဝ်ႉလၢတ်ႈဝႃႈ “မႂ်းထဝ်ႈၼႃႇယဝ်ႉ”ၼႆႁင်းမၼ်းသေ ဝၢႆႇၼႃႈသွင်ႉပႅတ်ႈမၼ်းယဝ်ႉ။

ၵွပ်ႈၼင်ႇၼႆသေ မိူဝ်ႈမီးၶၢဝ်းယၢမ်း ႁဝ်းလႆႈမီးသုၼ်ႇလီၼႆႉ ႁဝ်းလူဝ်ႇဝူၼ်ႉသင် ဝူၼ်ႉႁႂ်ႈမႅၼ်ႈ ႁဝ်းလူဝ်ႇမေႃသင် သွၼ်ႁႂ်ႈလႆႈ ႁဝ်းလူဝ်ႇႁဵတ်းသင် ႁဵတ်းႁႂ်ႈပဵၼ် ပေႃးထိုင်ဝၼ်း ႁဝ်းထူပ်းတူဝ်မႃးၼၼ်ႉ ႁဝ်းတိုၼ်းတေၵၢမ်ႇလီ ႁဝ်းတိုၼ်းတေသႃႇၸႂ်ယဝ်ႉ၊

 သင်ႁဝ်းဢမ်ႇမီးလွင်ႈတူဝ်ထူပ်းဝႆႉ ပေႃးႁဝ်းထူပ်းတူဝ်မႃး မၼ်းတိုၼ်းတေယၢပ်ႇ၊ ႁဝ်းမီးတၢင်ႉဝူၼ်ႉလီꧦသေ ႁဝ်းဝူၼ်ႉဢဝ်ၵူၺ်းၼၼ်ႉ ႁဝ်းမေႃလႆႈၵူႈလွင်ႈဢိူဝ်ႈ။

သင်ႁဝ်းဢမ်ႇၸၢမ်းႁဵတ်းတူဝ်ထူပ်းၼႆ လွင်ႈဝႃႈႁဝ်းမေႃတႄႉႁိုဝ် ဢမ်ႇမေႃတႄႉၼၼ်ႉ ႁဝ်းဢမ်ႇၸၢင်ႈလၢတ်ႈလႆႈတႅတ်ႈၼႅတ်ႈ ဝၢႆးမႃးႁဝ်းတေၸၢင်ႈ လႆႈတၢင်းၼႅင်ၸႂ်မိူၼ်ၼင်ႇမႃႉလီႈၽူႈႁတ်းႁၢၼ်လူင်ၼၼ်ႉလူးၵွၼ်ႇ။

 ၵၢၼ်တူဝ်ထူပ်းဢၼ်ႁဝ်းလႆႈႁဵတ်းယူႇဝၼ်းမိူဝ်ႈလဵဝ်ၼႆႉ ပိၵ်ႉသမ်ႉႁဝ်းတေသွၼ်ႇဝႃႈမၼ်းယၢပ်ႇၵေႃႈ မၼ်းတေ ပဵၼ်ငဝ်ႈႁၢၵ်ႈတၢင်းၵတ်ႉၶႅၼ်ႇႁဝ်းမိူဝ်းၼႃႈယူႇ။

 “ႁိူဝ်းၼၼ်ႉ ပေႃးဢဝ်ဝႆႉတီႈၽင်ႇမၼ်းၵွၼ်ႇ မၼ်းၸင်ႇၸၢင်ႈလွတ်ႈၽေးလီ” ႁဝ်းဝူၼ်ႉဝႃႈၼႆသေတႃႉ၊ ႁိူဝ်းၼၼ်ႉယိူင်းဢၢၼ်းမၼ်းဢမ်ႇလႆႈယူႇတီႈၽင်ႇတီႈလဵဝ်။

 “ၵူၼ်းႁဝ်းပေႃးလႆႈယူႇတီႈႁိူၼ်းၵွၼ်ႇ ၸင်ႇမီးလွင်ႈယူႇသႃႇလူမ်ၸႂ်”ဝႃႈၼႆသေတႃႉ ၵူၺ်းၵႃႈ ၼၼ်ႉဢမ်ႇၸႂ်ႈ ၶေႃႈယိူင်းဢၢၼ်းလူင်သုင်သုတ်း တႃႇၼႂ်းၸၢတ်ႈပၢၼ်ႁဝ်း။

 လွင်ႈႁဝ်းလႆႈလိုဝ်းႁူင်မႃးမိူဝ်ႈဝႃးၼၼ်ႉ ပဵၼ်တႃႇလွင်ႈၸိူဝ်းပူၼ်ႉမႃးလႄႈ ပဵၼ်လွင်ႈတွင်းမၢႆႁဝ်းဝၼ်း မိူဝ်ႈၼႆႉယဝ်ႉ၊ လွင်ႈႁဝ်းၵၢၼ်ႉသုမ်းမႃးမိူဝ်ႈဝႃးၼၼ်ႉၵေႃႈ ပဵၼ်လွင်ႈတူဝ်ထူပ်းတႃႇႁဝ်းတေသိုပ်ႇႁဵတ်းထႅင်ႈ မိူဝ်ႈၼႆႉလႄႈ တေပဵၼ်လွင်ႈလိုဝ်းႁူင်ႁဝ်းၼႂ်းဝၼ်းၼႃႈဢိူဝ်ႈ။

 “မိူဝ်ႈၽွင်းၼင်ႇၼၼ် မၼ်းၼႆႉၵတ်ႉၶႅၼ်ႇတႄႉဢိူဝ်ႈ”ၼႆၼၼ်ႉဢမ်ႇလွင်ႈယႂ်ႇ၊ လူဝ်ႇလႆႈပဵၼ်ဝႃႈ “ဝၼ်းမိူဝ်ႈၼႆႉ မၼ်းၼႆႉၵတ်ႉၶႅၼ်ႇတေႉဢိူဝ်ႈ”ၼႆၼၼ်ႉၵူၺ်း။

 ယႃႇပေဢဝ်ၵုင်ႇမုၼ်ၼိူဝ်လွင်ႈဢၼ်ပူၼ်ႉမႃးၼၼ်ႉသေ ၶႆႈယူႇတိၵ်း လူဝ်ႇၶတ်းၸႂ်ႁဵတ်းႁႂ်ႈ လွင်ႈမိူဝ်ႈလဵဝ်လႄႈ လွင်ႈမိူဝ်းၼႃႈၼၼ်ႉ လီလိူဝ်ထႅင်ႈဢိူဝ်ႈ။

ၵမ်းလိုၼ်းယွၼ်းသူးႁႂ်ႈၵေႃႉ မေႃပွင်ႇၸႂ်ၼိူဝ်လွင်ႈယၢမ်းဢၼ်ပဵၼ်ယူႇမိူဝ်ႈလဵဝ် ၽွင်းႁဝ်းမီး သုၼ်ႇလီလႆႈၶၢဝ်းယၢမ်းၼၼ်ႉလႄႈ ႁႂ်ႈမေႃဝူၼ်ႉသၢင်ႈတႃႇဝၼ်းမိူဝ်းၼႃႈသေ ႁႂ်ႈမီးလွင်ႈၵၢမ်ႇလီ တီႈလႆႈမီးတိုဝ့်တၢင်း လွင်ႈတူဝ်ထူပ်းၼၼ်ႉသေၵမ်း။

တႅမ်ႈ #ဢႃးတိတ်ႉ