*ပီႈၼွင်ႉတႆး လႄႈ ၵၢၼ်လူလိၵ်ႈ

|ပီႈၼွင်ႉတႆး လႄႈ ၵၢၼ်လူလိၵ်ႈ

မိူင်းဝၼ်းတူၵ်း ဢၼ်ပဵၼ်မိူင်းဢမေရိၵႃး
ႁဵတ်းဢွၵ်ႇမႃး facebook ပၼ်ႁႂ်ႈႁဝ်းလႆႈ
ၸႂ်ႉတိုဝ်းၵၼ်တူဝ်ႈလူၵ်ႈ ၸိူင်ႉၼင်ႇလႆႈ
ႁၼ်ၼႆႉယူႇယဝ်ႉ၊

ၵူၺ်းၵႃႈ တီႈမိူင်းပိူၼ်ႈ ပပ်ႉလိၵ်ႈယင်းလႆႈ
ၶၢႆလီယူႇမိူၼ်ၵဝ်ႇ ၵူၼ်းသူၼ်ၸႂ်ပပ်ႉလိၵ်ႈ
ၵူၼ်းလူလိၵ်ႈၼမ်မိူၼ်ၵဝ်ႇ ယဝ်ႉၵေႃႈတိုၵ်ႉ
ဢွၼ်ၵၼ်ၶတ်းၸႂ်ဢိတ်ႇဢွၵ်ႇပပ်ႉလိၵ်ႈၼမ်
မႃးလိူဝ်ႇၵဝ်ႇ ၽူႈတႅမ်ႈလိၵ်ႈၶဝ်ၵေႃႈတိူဝ်း
ၼမ်မႃးသေ

တိုၵ်ႉဢွင်ႇမၢၼ်ယွၼ်ႉၵၢၼ်လိၵ်ႈလၢႆး
ၵၼ်တေႃႇထိုင်ယၢမ်းလဵဝ် ၼႆယူႇယဝ်ႉ။

ၵူၼ်းတႆးႁဝ်းသမ်ႉ ပေႃးပဵၼ်လၢၼ်ႉၶၢႆ
ပပ်ႉလိၵ်ႈၼႆ ဢမ်ႇသူၼ်ၸႂ် ဢမ်ႇၶႂ်ႈၶဝ်ႈ
ႁူင်းတူၺ်းလိၵ်ႈဢၼ်ဝႃႈၼၼ်ႉၵေႃႈ
ၶႅၼ်းဢမ်ႇႁၼ် ဢမ်ႇမီး ၵူၼ်းတႆးႁဝ်းမၢင်ၵေႃႉ
တမ်ႉဢမ်ႇႁူႉၸၵ်းၵွၼ်ႇ၊

လၢၼ်ႉယိမ်ပပ်ႉလိၵ်ႈၼႂ်းပွၵ်ႉၼႂ်းယွမ်ႇ
ၼႆၵေႃႈ ယိုင်ႈၶႅၼ်းဢမ်ႇတွၼ်ႉယၢမ်ႈႁၼ်မႃး
(မၢႆထိုင်လၢၼ်ႉယိမ်ပပ်ႉလိၵ်ႈတႆး/ပပ်ႉတႆး)
ၼင်ႇႁိုဝ်ပၢႆးပၺ်ႇၺႃႇတႆးပေႃးတေဢမ်ႇ
ၶိုၼ်ႈယႂ်ႇ ၼင်ႇႁိုဝ်ၵူၼ်းတႆးႁဝ်းပေႃးတေ
ဢမ်ႇၶဝ်ႈၸႂ်ၼိူဝ်ၵၢၼ်လိၵ်ႈလၢႆးၼၼ်ႉၵေႃႈ
ဢၼ်ပဵၼ်ၽူႈၶဵၼ်ႁဝ်းၶဝ်ၶတ်းၸႂ်မႃး
ပၢၼ်သိုပ်ႇပၢၼ် ၼိုင်ႈႁဝ်းဢမ်ႇသူၼ်ၸႂ်
ဢမ်ႇၶဝ်ႈၸႂ်ၼိူဝ်လိၵ်ႈလၢႆး ၶႅၼ်းမႅၼ်ႈၸႂ်
ၽူႈၶဵၼ်ယဝ်ႉ၊

 ယၢမ်းလဵဝ် လၢၼ်ႉၶၢႆပပ်ႉလိၵ်ႈမိူဝ်ႈၵွၼ်ႇ
ၸိူဝ်းၼၼ်ႉၵေႃႈယဵၼ်းပဵၼ်လၢၼ်ႉၶၢႆၶူဝ်း
လၢၼ်ႉၶၢႆၵုၼ်ႇယွႆႈၵႂႃႇၵမ်ႈၼမ်ယူႇယဝ်ႉ။

တူၺ်းလူး ယၢမ်းလဵဝ် ၸဵမ်ၵူၼ်းလူင်
ၵူၼ်းၼုမ်ႇ ၵုမ်ႇဢွၼ်ၵၼ်ၵူမ်ႈၼႃႈတူၺ်းၽူင်း
ဢဝ်ၼိဝ်ႉမိုဝ်းလုပ်ႈၶိုၼ်ႈလုပ်ႈလူင်းၵၼ်ယူႇ
ၵူႈတီႈၵူႈတၢင်းယဝ်ႉ၊

-ဢွင်ႈတီႈႁဵတ်းၵၢၼ်ၵေႃႈ ၼႆႉၵူၺ်း၊

-ၼိူဝ်လူတ်ႉၵႃး/ၼိူဝ်လူတ်ႉၾႆးၵေႃႈ ၼႆႉၵူၺ်း

-ၼႂ်းႁွင်ႈၼွၼ်းလႄႈႁွင်ႈၼမ်ႉၵေႃႈ ၼႆႉၵူၺ်း

ဢၼ်ႁၢင်ႈႁၢႆႉႁႅင်းၼႃႇလိူဝ်ၼႆႉတႄႉ ပီႈၼွင်ႉ ဢူၺ်းၵေႃႉဢူၺ်းသေႈ ဢၼ်လႆႈၽၢတ်ႇၵၼ်
ႁိုင်သေ ၶိုၼ်းမႃးႁူပ်ႉၵၼ်ၼၼ်ႉ တႅၼ်းတီႈ
ထုၵ်ႇလီၸူမ်းၵၼ် သမ်ႉဢွၼ်ၵၼ်ၼင်ႈၵူမ်ႈၼႃႈ
သေတူၺ်းၽူင်းၽႂ်မၼ်း သမ်ႉပေႃးဢမ်ႇတၼ်း
ဢုပ်ႇၵၼ်ၼၼ်ႉယဝ်ႉ။

#ဢမ်ႇတမ်းဝႆႉပၵ်းပိူင်
ဢမ်ႇမၵ်းမၼ်ႈၶၢဝ်းယၢမ်း လဵၼ်ႈယူႇၵူႈၶိင်ႇ
ၵူႈၶၢဝ်းသေ တူၺ်းသေယုမ်ႉ တူၺ်းသေၶူဝ်
တူၺ်းသေၼႃႈတူႇ တူၺ်းသေပွင်ႉလႃႇၵေႃႈမီး
ထဵင်ၵၼ် ဝႃႈၵၼ်ၼိူဝ်Online(ဢွၼ်းလႆး)
ၵေႃႈယၢမ်ႈႁၼ်

ဢၼ်ၸႂ်ႉတိုဝ်း Online သေလူလိၵ်ႈ
ႁႂ်ႈပေႃးမီးၽွၼ်းလီတႃႇတူဝ်ၵဝ်ႇ မိူၼ်ၼင်ႇ
ၽူႈလူလိၵ်ႈ Shan books ႁဝ်းလူယူႇမိူဝ်ႈလဵဝ်ၼႆႉ
မီးၵမ်ႈဢေႇၶႃႈယဝ်ႉ။

ယွၼ်ႉပီႈၼွင်ႉတႆးႁဝ်း ဢမ်ႇသူင်လူလိၵ်ႈၵၼ်လႄႈ-

*ပီသႃႇသၼႃႇလႆႈၵႃႈႁိုဝ် ဢမ်ႇႁူႉ

*ပီႈတႆးလႆႈမႃးၵႃႈႁိုဝ်ၵေႃႈ ဢမ်ႇႁူႉ

*ပီမိူင်းၵေႃးၸႃႇသၵ်ႉၵရဵတ်ႈလႆႈၵႃႈ
ႁိုဝ်ယဝ်ႉၵေႃႈ ဢမ်ႇႁူႉ

*ၽူႈၼမ်းတပ်ႉသိုၵ်းတႆးႁဝ်းပဵၼ်ၽႂ်
မီးၽႂ်ၸဝ်ႈလႂ်ၽွင်ႈ ဢမ်ႇႁူႉ

*ၽူႈၼမ်းၽၢႆႇၵၢၼ်မိူင်းတႆးႁဝ်းပဵၼ်ၽႂ်
ဢမ်ႇႁူႉ

*ႁူဝ်ပဝ်ႈလူင်မုၵ်ႉၸုမ်းသင်ႇၶၸိုင်ႈတႆး
ႁဝ်းပဵၼ်ၽႂ် ၸဝ်ႈလႂ်ၵေႃႈ ဢမ်ႇႁူႉ

*ၽူႈတႅမ်ႈလိၵ်ႈၸိုဝ်ႈသဵင်ယႂ်ႇၼႂ်းတႆးႁဝ်း
ပဵၼ်ၽႂ်လႂ်လၢႆ"ၵေႃႈ ဢမ်ႇႁူႉ

*ပိုၼ်းၽြႃးပဵၼ်ၸဝ်ႈၵေႃးတမ ဢမ်ႇႁူႉ

*ၸၢတ်ႈလူင်(10)ၸၢတ်ႈ ပဵၼ်သင်လၢႆ"
ဢမ်ႇႁူႉ

*ႁႃႈပၢၵ်ႈႁႃႈသိပ်းၸၢတ်ႈ ယိုင်ႈၶႅၼ်းဢမ်ႇႁူႉ

*မိူင်းဢႃႇသီႇယၼ်ႇ(10)မိူင်း ပဵၼ်မိူင်းလႂ်လၢႆ"
ႁိုဝ်ႁူႉ

*ၼႂ်းမိူင်းႁူမ်ႈတုမ်ႇမျၢၼ်ႇမႃႇ
မီးမိူင်းမီးတိူင်းသင်လၢႆ"ၵေႃႈ ႁိုဝ်ႁူႉ

*ဢၼ်ၼႃႇလိူဝ်သေၼႆႉတႄႉ မိူင်းတႆးႁဝ်း
တူၵ်းသုမ်းၵႂႃႇၼႂ်းမိုဝ်းပိူၼ်ႈၸိူင်ႉႁိုဝ်
ၼႆၵေႃႈဢမ်ႇႁူႉ

ပေႃးဢမ်ႇႁူႉလွင်ႈၸိူဝ်းၼႆႉယဝ်ႉ
လွၵ်းလၢႆးတႃႇတေဢဝ်ၶိုၼ်းမိူင်းႁဝ်း
ၶိုၼ်းၼၼ်ႉၶႅၼ်းဢမ်ႇႁူႉ ၶႅၼ်းဝႆႉၵႆ"ယဝ်ႉ။

လွင်ႈဢမ်ႇမီးပၢႆးပၺ်ႇၺႃႇ
ဢမ်ႇမီးတၢင်းႁူႉၼမ်တၢင်းႁၼ်ၵႂၢင်ႈ
ဢမ်ႇလူလိၵ်ႈၼႆႉ ၽွၼ်းႁၢႆႉမၼ်း
ဢွၼ်တၢင်းတုမ်ႉတိူဝ်ႉတူဝ်ၵဝ်ႇၵေႃႉလဵဝ်
ဝၢႆးလိုၼ်းမႃးတုမ်ႉတိူဝ်ႉပႃးၵၢၼ်ၸိူဝ်ႉၸၢတ်ႈ
ဝၢၼ်ႈမိူင်းႁဝ်းပႃးလူးၵွၼ်ႇၶႃႈယဝ်ႉ။

ၵူၼ်းမီးတၢင်းႁူႉၼမ်တၢင်းႁၼ်ၵႂၢင်ႈ
ဢၼ်ဝႃႈၼၼ်ႉ မၼ်းဢမ်ႇၸႂ်ႈဝႃႈ
ပဵၼ်ၵူၼ်းဢၼ်မီးၵၢၼ်ႁဵၼ်းသုင်"
ၵူၼ်းၶိုၼ်ႈၸၼ်ႉၸွမ်လႆႈၸုမ်ႈလႆႈၶူး
ၸိူဝ်းၼၼ်ႉၵူၺ်း သင်ဝႃႈပဵၼ်ၵူၼ်းၵေႃႉ
ဢၼ်လူလိၵ်ႈၼမ်"ၼႆ တိုၼ်းပဵၼ်ၵူၼ်းမီး
တၢင်းႁူႉၼမ်တၢင်းႁၼ်ၵႂၢင်ႈၶႃႈယဝ်ႉ၊

 မိူၼ်ၸိူင်ႉၼင်ႇၵႂၢမ်းမီးဝႆႉဝႃႈ "ၵူၼ်းလႆႈ
ၸုမ်ႈၶူးမိူဝ်ႈၼႆႉ၊ မိူဝ်ႈၽုၵ်ႈသင်မၼ်း
ဢမ်ႇလူလိၵ်ႈၸိုင်၊ မိူဝ်ႈႁိုဝ်းမႃးမၼ်းတေပဵၼ်ၵူၼ်းဢၼ်ႁၢမ်းတၢင်းႁူႉ" ၼႆယူႇယဝ်ႉ။

ၵူၼ်းၵေႃႉဢၼ်ဢမ်ႇမီးၵၢၼ်ႁဵၼ်းသုင်သေ
ဢမ်ႇၵႃး သမ်ႉဢမ်ႇပႃးၸႂ်လွင်ႈလူလိၵ်ႈ
ဢမ်ႇၶတ်းၸႂ်လူလိၵ်ႈၼၼ်ႉ တေပဵၼ်ၵူၼ်း
ဢမ်ႇႁူႉၼႃႇသေဢမ်ႇႁူႉၼၼ်ႉယဝ်ႉ။

*ဢၼ်လႂ်ထုၵ်ႈမႅၼ်ႈၸွမ်းတြႃးႁႃႉ ဢမ်ႇၸွမ်းတြႃးႁႃႉၵေႃႈ ဢမ်ႇႁူႉ

*ၵူၼ်းမီးၵုင်ႇမုၼ်/ၸဝ်ႈၵုင်ႇမုၼ်ၵေႃႈ ဢမ်ႇႁူႉ

*ၽူႈယႂ်ႇၵူၼ်းလူင် ဢၼ်ထုၵ်ႇလီၼပ်ႉ
ယမ်ၵူမ်ႈၵွမ်းၼၼ်ႉၵေႃႈ ဢမ်ႇႁူႉ ဢမ်ႇမေႃ

*ၸႂ်ၵူဝ်ၼၼ်ႉတေမီးၼမ်လိူဝ်သေတၢင်းႁူႉၵႂႃႇ

ပေႃးပဵၼ်ၸိူင်ႉၼႆ ၼႂ်းသၢႆသဵၼ်ႈတၢင်း
ၸၢတ်ႈပၢၼ်ၸဝ်ႈၵဝ်ႇၼၼ်ႉ
တေႁဵတ်းႁိုဝ်သိုပ်ႇပႆယၢင်ႈၵႂႃႇ?

လိုၼ်းသုတ်း ၸဝ်ႈၵဝ်ႇၶႂ်ႈပဵၼ်သင်
တၢင်းဝူၼ်ႉၸဝ်ႈၵဝ်ႇပဵၼ်ဝႆႉၸိူင်ႉႁိုဝ်ၼႆ
ၶေးတေဢမ်ႇႁူႉၵွၼ်ႇႁိုဝ်?

တိုၵ်းသူၼ်း - ႁႂ်ႈပၼ်ႁႅင်းလူလိၵ်ႈ လႄႈ
ၶတ်းၸႂ်လူလိၵ်ႈၵၼ်ယႂ်ႇၼမ်သေၵမ်း။

တႅမ်ႈ - သႅင်ၵေႃႇမိူင်း(မိူင်းပၼ်ႇ)