ပီႈၶႂ်ႈသင်ႇလၢတ်ႈထိုင်ၼွင်ႉယိင်း......
ၼွင်ႉယိင်းဢူၺ် ပေတူၵ်းၼမ်ႉတႃငၢႆႈငၢႆႈၼႃႉ။
ၼွင်ႉယိင်းဢူၺ် ပေတိူဝ်ႉၸႂ်ငၢႆႈငၢႆႈၼႃႉ။
ၼွင်ႉယိင်းဢူၺ် ပေၸႂ်လဵၵ်ႉငၢႆႈငၢႆႈၼႃႉ။
ၼွင်ႉယိင်းဢူၺ် ယႃႇပေဢူၼ်ႈဢွၼ်ႇငၢႆႈငၢႆႈၼႃႈ။
ၸၢတ်ႈပၢၼ်ဢၼ်ဝႃႈၼႆႉ တူၵ်းတႅမ်ႇ ၶိုၼ်ႈယႂ်ႇၸၼ်ႉတႅမ်ႇ ၸၼ်ႉသုင်
ဢၼ်ဝႃႈၼၼ်ႉ ၼႂ်းၶူင်းၵၢင်ပၼ်တူင်ႇယူႇလူင်ၼႆႉတိုၼ်းတေႁၼ်။
မၢင်ပွၵ်ႈမၢင်လႂ်ၵေႃႈ တေလူမ်ႉဢိူဝ်ႈ။
မၢင်ပွၵ်ႈမၢင်လႂ်ၵေႃႈ တေၸဵပ်းဢိူဝ်ႈ။
မၢင်ပွၵ်ႈမၢင်လႂ်ၵေႃႈ တေသိူဝ်းဢိူဝ်ႈ။
မၢင်ပွၵ်ႈမၢင်လႂ်ၵေႃႈ တေႁႆႈဢိူဝ်ႈ။
မိူဝ်ႈမီးလွင်ႈၶႅမ်ႉလႅပ်ႈမိူၼ်ၸႂ်မီးၵေႃႈႁူႉတေႃႈတေလႆႈမီးလွင်ႈယၢပ်ႇၽိုတ်ႇၶၢၼ်ၸႂ်ယူႇဢိူဝ်ႈ။
ၼွင်ႉယိင်း........
ယႃႇပေၵုမ်ႇလၢတ်ႈဝႃႈ ၵဝ်ၼႆႉၵၢမ်ႇႁၢႆႉတႄႉယဝ်ႉၼႆယူႇ။
ၵၢမ်ႇဢမ်ႇလီၼႆႉ ႁဵတ်းႁႂ်ႈၵၢမ်ႇလီမႃးလႆႈယူႇဢိူဝ်ႈ။
တီႈၼွင်ႉယိင်းၼၼ်ႉ လူဝ်ႇလႆႈမီးၼမ်ႉၸႂ် လွင်ႈႁၼ်လီဢွၼ်ႇၼၼ်ႉၵူၺ်းယဝ်ႉ။
ၼွင်ႉယိင်း........
ယႃႇပေၵုမ်ႇၵႂႃႇၶီၸႂ်မွင်ၸႂ်လွင်ႈဢၼ်ဝႃႈ ၵူၼ်းတၢင်းလၢႆ ဝူၼ်ႉၼိူဝ်ၵဝ်ၸိူင်ႉႁိုဝ်?
ႁၼ်ထိုင်ၸိူင်ႉႁိုဝ်?
ၵုမ်ႇဝူၼ်ႉလွင်ႈတႃႇတေသႄႉၼႄးၵဝ်ၵူၺ်း၊ဢဝ်လွင်ႈၸိူဝ်းၼႆႉသေ
လၢတ်ႈယူႇၵူၺ်း၊ လွင်ႈၶမ်ၸႂ်ဢွၼ်ႇၵဝ်ၽႂ်ဢမ်ႇႁူႉၸွမ်း
ၽႂ်ဢမ်တွၼ်ႉဝူၼ်ႉမႅၼ်ႈသေပွၵ်ႈ ၼႆသေ ၸႂ်လဵၵ်ႉၸွမ်းယူႇ။
ယႃႇၶီမွင်ၸႂ် ႁႅင်းၼႃႇပူၼ်ႉယႃႇဢဝ်မႃးၵိူဝ်ႉလဵၼ်ႈၼႂ်းၸူဝ်ႈပၢၼ်ယူႇ။
ၼွင်ႉယိင်း..........
ဢမ်ႇမီးၵူၼ်းပၼ်ႁႅင်းၸႂ်ၵေႃႈ ယႃႇပေၸႂ်လဵၵ်ႉ။
ပေႃးမီးၵူၼ်းႁူမ်ႈႁဵတ်းသၢင်ႈၸွႆႈထႅမ်ၵွၼ်ႇ ၸင်ႇတေမေႃလုၵ်ႉၸိူၼ်ႇၼႆၸိုင်
ၼွင်ႉယိင်း....... တေႁဵတ်းႁိုဝ်သိုပ်ႇယၢင်ႈၵႂႃႇတၢင်းၼႃႈယဝ်ႉလႃႇ။
ၼွင်ႉယိင်း ယႃႇပေပေႃးၸႂ်ယႂ်ႇပိူၼ်ႈႁႅင်းၼႃႇပူၼ်ႉ။
ၼမ်ႉၵတ်ႉတၢင်းၶႅၼ်ႇၸဝ်ႈၵဝ်ႇမီးၼၼ်ႉ တေၸၢင်ႈၼိုၵ်းထိုင့်ၵႂႃႇပႅတ်ႈဢိူဝ်ႈ။
ၼွင်ႉယိင်း........
ပိုင်ႈဢိင်ၶိုၼ်း တူဝ်ၸဝ်ႈၵဝ်ႇ။
ႁၵ်ႉၶိုၼ်း တူဝ်ၸဝ်ႈၵဝ်ႇ။
ပွင်ၸႂ်ၶိုၼ်းၼိူဝ် တူဝ်ၸဝ်ႈၵဝ်ႇ။
ယုမ်ႇယမ်ၶိုၼ်း တူဝ်ၸဝ်ႈၵဝ်ႇ။
ပၼ်ႁႅင်းၶိုၼ်း တူဝ်ၸဝ်ႈၵဝ်ႇ။
လိူၵ်ႈႁႃလူလိၵ်ႈဢၼ် တေထႅမ်ပၼ်ႁႅင်းၸႂ် ၸဝ်ႈၵဝ်ႇလႆႈၼၼ်ႉလႄႈ။
ဢမ်ႇမီးၽႂ် လူလွမ်ၶဝ်ႈၸႂ်တူၺ်းထိုင်ႁဝ်း ၼႆသေ…………
ပေၵုမ်ႇပွႆႇပိုၼ်ႉပႅတ်ႈတူဝ်ၸဝ်ႈၵဝ်ႇၼႃႉ။
ဢမ်ႇမီးၽႂ် ပွင်ႇၸႂ်ပၼ်ၼိူဝ်ႁဝ်း ၼႆသေ…………
ပေၵုမ်ႇၸဵပ်းၸႂ်ယူႇ။
ဢမ်ႇမီးၽႂ် မႃးႁၵ်ႉႁဝ်းလႆႈ ၼႆသေ …………
ပေၸႂ်လဵၵ်ႉယူႇယဝ်ႉ ။
ၼွင်ႉယိင်း........
ၶတ်းၸႂ်ၶိုင်သၢင်ႈႁဵတ်းႁႂ်ႈတူဝ်ၸဝ်ႈၵဝ်ႇ ၶိုၼ်ႈယႂ်ႇဢွင်ႇမၢၼ်လႄႈ။
ဢမ်ႇတၢပ်ႈၵိူင်းႁူသေပႂ်ႉထွမ်ႇ ၶေႃႈၵႂၢမ်းမၢင်ၸိူဝ်းၶဝ်လၢတ်ႈ ဢမ်ႇၶဝ်ႈၶိုဝ်ႇၶဝ်ႈပႄၼၼ်ႉ။
ၼႂ်းၵူၼ်းၼိုင်ႈပၢၵ်ႇၼၼ်ႉ ဢၼ်တေၸွႆႈႁႅင်းဢီးပၼ်ႁဝ်းမီးၵေႃႉၼိုင်ႈၵေႃႈ
ဢၼ်တေပႂ်ႉၸၼ်ႁဝ်းလူင်းတႂ်ႈၼၼ်ႉ မီး (99) ၵေႃႉၵွၼ်ႇဢိူဝ်ႈ။
ယႃႇၵုမ်ႇၶဝ်ႈၸႂ်ယူႇယဝ်ႉ ၵွႆႈယဝ်ႉၶဝ်။
ၸၢတ်ႈပၢၼ်ၸဝ်ႈၵဝ်ႇပေႃးတေၶိုၼ်ႈယႂ်ႇၼၼ်ႉတေလႆႈႁဵတ်းၸိူင်ႉႁိုဝ်ၼႆ ဝူၼ်ႉၸိူဝ်းၼႆႉလႄႈ။
ႁဵတ်းၵၢၼ်ၸွမ်းဢၼ်မီး လွင်ႈယုမ်ႇယမ်....
ၶေႃႈယိူင်းဢၢၼ်းၸိူဝ်းၼၼ်ႉသေ.... ၶိုင်ႈသၢင်ႈၵႂႃႇလႄႈ
ၶေႃႈၵႂၢမ်းမၢင်ၸိူဝ်းဢၼ်တေဢမ်ႇၸွႆႈထႅမ်သင်ႁဝ်းလႆႈၼၼ်ႉ
ဢမ်ႇတၢပ်ႈထွမ်ႇဢဝ်ၵုသူဝ်ႇ ၵေႃႈလႆႈ။
ၸၼ်ႉတႅမ်ႇၼႆႁႃႉ......
တွၼ်ႈတႃႇၸၢတ်ႈပၢၼ်လွင်ႈဢမ်ႇတဵမ်ထူၼ်ႈၼႆႉ ႁူႉလႆႈယူႇတီႈတႅမ်ႇၵူၺ်းဢိူဝ်ႈ။
တႅမ်ႇၵေႃႈယဝ်ႉဢိူဝ်ႈ......... ပေႃးႁဝ်းဢမ်ႇလႆႈတူၵ်းသုမ်းၵႂႃႇၵေႃႈပေႃးယဝ်ႉလႄႈ။
မၢင်ၸိူဝ်းၶဝ်တေႁၢၵ်းလင်ႁဝ်းၶိုၼ်းၵေႃႈပဵၼ်လႆႈ။
ၵူၺ်းပပ်ႉလိၵ်ႈတႄႉ တေဢမ်ႇတွၼ်ႉႁၢၵ်းလင်ႁဝ်းၶိုၼ်းသေပွၵ်ႈ။
လူလိၵ်ႈတႃႉ........
ၼင်ႇႁိုဝ်သဵၼ်ႈတၢင်းၶိုၼ်ႈယႂ်ႇ တေၶိုပ်ႈၼႃႈ ပၼ်ၽွၼ်းလီႁဝ်းၵႂႃႇၼၼ်ႉ လူလိၵ်ႈလႄႈ။
လူလိၵ်ႈဢၼ်ၸႂ်ႉပၢႆးဝူၼ်ႉဢဝ်လၢႆလၢႆသေ ၵုမ်ႇထၢင်ႇယႂ်ႇၶိုၼ်းတူဝ်ႈၸဝ်ႈၵဝ်ႇၵေႃႈ ယႃႇပေႁႂ်ႈပဵၼ် ၸိူဝ်းၼၼ်ႉၵေႃႈမၼ်းဢမ်ႇၸိုဝ်ႈလၢႆးမၼ်းၼင်ႇၵဝ်ႇၼွင်ႉယိင်းဢိူၺ်ႉ!။
ၼွင်ႉယိင်း........
ႁႂ်ႈမေႃတူၺ်းၶိုၼ်းတူဝ်ၸဝ်ႈၵဝ်ႇလႄႈ။
ဢၼ်ၵဝ်ႁဵတ်းယူႇၸိူဝ်းၼႆႉ ၸွင်ႇမၼ်းမီးတီႈပွင်ႇယူႇႁႃႉ? ဢၼ်ဝႃႈၼၼ်ႉ
ဝူၼ်ႉထတ်းသၢင်တူၺ်းၶိုၼ်းလႄႈ။
ယူႇမူၼ်ႈမူၼ်ႈသိူဝ်းသိူဝ်းၼႃႉ။
တီႈလႂ်ဢမ်ႇဝႃႈ ယႃႇၵုမ်ႇဢဝ်ၼမ်ႉတႃ ႁဵတ်းၵေႃႉယူႇ။
ၶတ်းၸႂ်ႁဵတ်းသၢင်ႈႁႂ်ႈ ၵူၼ်းတၢင်းလၢႆ ၶဝ်ႈၸႂ်ယွမ်းႁပ်ႉလႄႈ။
ဢမ်ႇမီးၽႂ် ဢိူမ်ႈၸမ်ၸွႆႈထႅမ်ႁဝ်းၵေႃႈ တူဝ်ၸဝ်ႈၵဝ်ႇႁူမ်ႈမိုဝ်းၵၼ်ႁဵတ်းလႄႈ ၼွင်ႉယိင်း။
မွတ်ႈပႅတ်ႈလွင်ႈၸႂ် ထိုင်ႉဢူၼ်ႈဢွၼ်ႇၼၼ်ႉလႃႈ
ၼႂ်းၵူၼ်းၸိူဝ်း ထိုင်ႉထိုဝ်ၼိုၵ်းၼႃတိုဝ်တၼ်ငိူဝ်ႈငႃႉၵႃႉယွႆႉၵႃႉလႆယူႇၼၼ်ႉ
ယႃႇပေႁႂ်ႈပႃး ၼွင်ႉယိင်းၵဝ်သေၵမ်းၼႃႈ။
ယွၼ်ႉပိူဝ်ႈၶေႃႈၵႂၢမ်းမၢင်ၶေႃႈသေ ၸူၵ်ႉတမ်တိူဝ်ႉတႅင်းႁဝ်းမႃးၵေႃႈ ယႃႇႁႂ်ႈၸၢတ်ႈပၢၼ်
လူမ်ႉၵႂႃႇၸွမ်းမၼ်းလႄႈ။
ၼွင်ႉယိင်း ၶႄႉၶဵင်ႇ!
ၽွင်းတိုၵ်ႉၶတ်းၸႂ်ယူႇၼႆႉ လွင်ႈၸႂ်လဵၵ်ႉၶေႃးၶူမ်ၸိူဝ်းၼၼ်ႉ တူပ်ႉၵဵၼ်ၸွၵ်းႁေႃႇဝႆႉ
မၼ်းပႅတ်ႈတႃႉ။
#ပိၼ်ႇ- #ဝၼ်းႁိူင်း-(သီႇပေႃႉ)
