ပေႃးမီးလုၵ်ႈယိင်းၼႆႉ တွင်းမၢႆးဝႆႉ လွင်ႈၸိူဝ်းၼႆႉတႃႉ
(႑) လုၵ်ႈယိင်းၼႆႉ ၶႂ်ႈလႆႈတၢင်းႁၵ်ႉ တီႈၵေႃႉပဵၼ်ဢူႈၼၼ်ႉယူႇ ၵူႊၶၢဝ်းယဝ်ႉ။
ၵေႃႉပဵၼ်ဢူႈ ယႃႇၼၵ်းၸႂ်တႃႇလၢတ်ႈၼႄလုၵ်ႈ လွင်ႈဝႃႈဢူႈႁၵ်ႉလုၵ်ႈယူႇၼႆၼၼ်ႉ။
တႅၼ်းတီႈတေသိုဝ်ႉပၼ်ၶူဝ်းၶွင် ၶဝ်သေလွင်ႈလွင်ႈယူႇတိၵ်းတိၵ်းၼၼ်ႉ ပၼ်တၢင်းႁၵ်ႉ လွင်ႈဢုၼ်ႇၸႂ်ၶဝ် ႁႂ်ႈတဵမ်ထူၼ်ႈတႃႉ။
( ႒) ၵေႃႉၵူႊ ဢၼ်တေမႃးႁူမ်ႈၸၢတ်ႈပၢၼ်ၸွမ်း လုၵ်ႈယိင်းၼၼ်ႉ ၵႆႉမိူၼ်ၵၼ်တင်း ၵေႃႉပဵၼ်ဢူႈယဝ်ႉ။
လုၵ်ႈယိင်း ၶဝ်ၼႆႉ ယွမ်းႁပ်ႉဝႆႉဝႃႈ ၵူၼ်းၵေႃႉဢၼ်မိူၼ်ဢူႈၶဝ်ၼၼ်ႉၵွႆး တေၵိုင်ႇငမ်ႇၵၼ်တင်း ၸၢတ်ႈပၢၼ်ၶဝ်ၼႆယူႇ။
(႓) ထုၵ်ႇလီထွမ်ႇၽဵင်းၵႂၢမ်း ဢၼ်လုၵ်ႈယိင်းၶဝ် ႁပ်ႉထွမ်ႇၼၼ်ႉယူႇ။ မိူဝ်ႈယၢမ်း ၶီႇၵႃးၸွမ်းလုၵ်ႈယိင်းၼၼ်ႉၵေႃႈ ထုၵ်ႇလီဝႆႉၼမ်ႉၼၵ်းသေ ႁပ်ႉထွမ်ႇၽဵင်းၵႂၢမ်းၸွမ်းလုၵ်ႈယိင်း။
ပေႃးႁဵတ်းၼၼ်ၼင်ႇ တေႁူႉလႆႈဝႃႈ မိူဝ်ႈလဵဝ် ၽဵင်းၵႂၢမ်းသင် လိုဝ်းလင်ဝႆ့ယူႇသေ တေႁႃတၢင်းသိူဝ်းၸွမ်းလုၵ်ႈယိင်းလႆႈ။
(႔) လုၵ်ႈယိင်းၶဝ်ၼႆႉ ပႂ်ႉတူၺ်းဝႆႉ လၢႆးဢူႈလၢတ်ႈတေႃႇ ၵေႃႉပဵၼ်မႄႈယူႇတႃႇၵူႊၶၢဝ်း၊ ဝႃႈၸွင်ႇၵေႃႉပဵၼ်ဢူႈ လၢတ်ႈတေႃႇ သိူၵ်ႈသမ်ႇၼိူဝ် ၵေႃႉပဵၼ်မႄႈ လီငၢမ်းယူႇႁိုဝ်။
လုၵ်ႈယိင်းၼႆႉ ဢမ်ႇလႆႈၸႂ် ဢူႈဢၼ်ဢမ်ႇမေႃလုမ်းလႃးမႄႈ လီလီ။
(႕) ၵေႃႉပဵၼ်လုၵ်ႈယိင်း ယႂ်ႇမႃႈၵႃႊသုင်မႃးၵႃႊႁိုဝ်ၵေႃႈ ၶတ်းၸႂ်ယူႇႁိမ်းၸမ်ပၼ်လုၵ်ႈယိင်း ၼမ်ၼမ်လႄႈ။
ယွၼ်ႉဝႃႈ လုၵ်ႈယိင်းၼႆႉ ယိုင်ႈၶဝ် ဢႃႇယုယႂ်ႇမႃး ယိုင်ႈဢမ်ႇပေႃးသူႈလၢတ်ႈတေႃႇဢူႈၼၼ်ႉယဝ်ႉ။
(႖) ယႃႇလိုမ်း ဢွၵ်ႇဢဵၼ်ႁႅင်းၸွမ်းလုၵ်ႈယိင်း။
ပဵၼ်လုၵ်ႈယိင်းၼႆႉ ပႅၵ်ႉသမ်ႉဝႃႈ ၶဝ်လႆႈၸႂ် ၶိူင်ႈၶူဝ်း တၢင်းႁၢင်ႊလီ လႄႈ သိူဝ်ႈၶူဝ်း ဢိင်ႇတင်း ၵၢၼ်ဢၢၼ်ႇလိၵ်ႈလၢႆးၼႆသေတႃႉ ယႃႇႁႂ်ႈၶဝ်လိုမ်း ဢွၵ်ႇဢဵၼ်ႁႅင်းပႃး။
(႗) ယႃႇလိုမ်းႁဵတ်းသၢင်ႈပၼ် ႁႂ်ႈပဵၼ်တီႈမၢႆတွင်း။
တီႈမၢႆတွင်းၼႆႉ မၼ်းလမ်ႇလွင်ႈတေႉတေႉ။
တႃႇပဵၼ် တီႈမၢႆတွင်း ၼႃႈႁိူၼ်းၼၼ်ႉ ပၼ်ၶၢဝ်းယၢမ်း လုၵ်ႈယိင်းၶဝ်လႄႈ။
မိူၼ်ၼင်ႇ ၼႂ်းဝၼ်းၵိူတ်ႇလုၵ်ႈ ဢွၵ်ႇၶၢဝ်းတၢင်းၵႂႃႇသေတီႈတီႈသေ ႁဵတ်းပၼ်ႁႂ်ႈပဵၼ်တီႈမၢႆတွင်းၵႂႃႇ သေလွင်ႈလွင်ႈၸဵမ်ၸိူဝ်းၼႆႉ။
(႘) ယႃႇလိုမ်းသင်ႇသွၼ် သပ်းလႅင်းပၼ် လွင်ႈတူဝ်ထူပ်း ၼႂ်းၸၢတ်ႈပၢၼ်ၽၢႆႇၼွၵ်ႈၼၼ်ႉ ပၼ်တီႈလုၵ်ႈယိင်း။
(႙) ယႃႇလိုမ်း လႄႈ ၼၵ်းၸႂ် တႃႇၵႂႃႇ ပၢင်ပွႆးဢၼ်လုၵ်ႈယိင်း တေၶဝ်ႈပႃးၸိူဝ်းၼၼ်ႉလႄႈ။
သင်လုၵ်ႈယိင်း ၶဝ်ႈပႃးၼႂ်း ၸုမ်းတၢင်းၵႃႊ တီႈႁူင်းႁဵၼ်းၸိုင် ၵေႃႉပဵၼ်ဢူႈ ထုၵ်ႇလီၵႂႃႇႁူမ်ၸူမ်းၸွမ်းယူႇ။
(႑႐) ပၼ်ၶၢဝ်းယၢမ်းတႃႇ လုၵ်ႈယိင်းလႄႈ။
ၵၢၼ်ၼမ်ၵႃႊႁိုဝ်ၵေႃႈယဝ်ႉ ပေႃးႁွတ်ႈၽႅဝ်ႁိူၼ်း တႅၼ်းတၢင်တီႈတေယူႇၵေႃႉလဵဝ်သေ တူၺ်းၾူၼ်း၊ တူၺ်းထီးဝီးယူႇၼၼ်ႉ ႁႃလွင်ႈတၢင်း ဢုပ်ႇလၢတ်ႈၸွမ်း လုၵ်ႈယိင်းလႄႈ။
(႑႑) သင်ႇသွၼ်ပၼ် ႁႂ်ႈၶဝ်မေႃဝႆႉၼမ်ႉၸႂ်လီလႄႈ။
ၵဵဝ်ႇလူၺ်ႈ ၽႃႇသႃႇၵိူဝ်းယမ် ပႅၵ်ႇပိူင်ႈၵၼ်ၵေႃႈလီ၊
လွင်ႈၼႃႈႁိူၼ်း ဢမ်ႇမိူၼ်ၵၼ်ၵေႃႈယဝ်ႉ တေလႆႈသင်ႇသွၼ်ပၼ် ႁႂ်ႈၶဝ် မေႃယူႇ၊ ယႃႇႁႂ်ႈပဵၼ် လွင်ႈသုၵ်ႉတႃႇပိူၼ်ႈ။
သွၼ်ပၼ် ယႃႇႁႂ်ႈၶဝ်မေႃ ၶၢႆၶၢႆၸိုဝ်ႈသဵင်ပိူၼ်ႈ
လူၺ်ႈဢၼ်ဢမ်ႇထုၵ်ႇမႅၼ်ႈၼၼ်ႉ။
(႑႒) ယႃႇယူႇမိူၼ်ဢမ်ႇႁူႉဢမ်ႇႁၼ်ၸွမ်းသင်။
မိူဝ်ႈၽွင်း လုၵ်ႈယိင်းၶဝ် ႁဵတ်းၽိတ်းမႅၼ်ႈၼၼ်ႉ ၵေႃႉပဵၼ်ဢူႈ မီးပုၼ်ႈၽွၼ်း တႃႇမူၼ်ႉမႄးပၼ်လႄႈ ယႃႇယူႇမိူၼ်ဢမ်ႇႁူႉဢမ်ႇႁၼ်ၸွမ်းသင်။
