ထိုင်... ၵႆႇၶၼ်ၼႂ်းလဝ်ႉ

---------------------------------

ယူႇႁိူၼ်းသေ တိုဝ်တေႃႇပေႃႈမႄႈ

ယူႇဝၢၼ်ႈသေ ႁၢႆႉတေႃႇၵူၼ်းလူင်

ယူႇၵျွင်းသေ လိူင်းတေႃႇသြႃႇသမ်းမႃး

တေမီးလွင်ႈသင်   မီးၼမ်ႉၵတ်ႉသင်

ပေႃးငၢၼ်တႄႉၵေႃႈ ယူႇတူၺ်းလႄႈ

 ၵေႈပိူၼ်ႈ ႁၢႆႉတူၺ်းလႄႈ ၵေႃႉလဵဝ်၊

ႁၢႆႉဢမ်ႇဢွၵ်ႇႁိူၼ်း ငၢၼ်ဢမ်ႇပူၼ်ႉဝၢၼ်ႈ

မီးတီႈပွင်ႇသင် ၽႂ်တေဝႃႈသူႁတ်းႁၢၼ်၊

ၵႂႃႇလေႃႇၼႂ်းဝဵင်း ၵႂႃႇလေႃႇမိူင်းမၢၼ်ႈ

 မိူင်းထႆး ၵႂႃႇလေႃႇ မိူင်းၶႄႇ၊

သမ်ႉတေဝႃႈဢမ်ႇႁတ်း ဢမ်ႇမေႃ၊

မိူဝ်ႈမီးၶၢဝ်းယၢမ်းမိူဝ်ႈမီးသုၼ်ႇ

လႆႈၼၼ်ႉသွၼ်လေႃႇ လိၵ်ႈပိူၼ်ႈၵႂၢမ်းပိူၼ်ႈ

လဵပ်ႈႁဵၼ်းလေႃႇ လွင်ႈပိူၼ်ႈမိူင်းပိူၼ်ႈ၊

မိူဝ်ႈလဵဝ်ၼႆႉ မိူင်းတႆး 

ဝၢၼ်ႈႁဝ်းမိူင်းႁဝ်း ပဵၼ်မၢၼ်ႈပဵၼ်မႅင်း

ၵႂႃႇသဵင်ႈ ပေႃးတဵမ်ၵႂႃႇမူတ်း

ပိူၼ်ႈႁၢႆႉၼႆႉ ပိူၼ်ႈမႃးၶဵင်ႇတႃႉသူ

ပိူၼ်ႈႁတ်းၼႆႉ ပိူၼ်ႈမႃးႁိမ်တီႈယူႇသူ

သူတေဝႃႈႁိုဝ် ?

သူတေဢဝ်သင် တေႃႇသူႈ

တေဢဝ်သင်ၵႅတ်ႇၵင်ႈတီႈယူႇတီႈသၢင်ႈသူ

သုၼ်ႇလႆႈသုၼ်ႇပဵၼ်သူ၊

ယူႇၼႂ်းဝၢၼ်ႈႁဝ်းမိူင်းႁဝ်းၵူၺ်း

လိၵ်ႈၵႂၢမ်းပိူၼ်ႈၼၼ်ႉဢမ်ႇတၢပ်ႈမေႃၵေႃႈလႆႈ

တေဝႃႈၸိူင်ႉၼၼ်ႁႃႉ၊

မၢၼ်ႈယူႇမိူင်းတႆး ၶႄႇယူႇမိူင်းတႆး

ၵလႃးယူႇမိူင်းတႆး ဢမ်ႇမေႃလိၵ်ႈတႆးၵႂၢမ်းတႆး

သေၶူတ်းယင်းပဵၼ် ႁဝ်းတေႃႈသွၼ်ႁဵတ်းသင်

လိၵ်ႈၵႂၢမ်းပိူၼ်ႈ တေဝႃႈၼၼ်တႄႉ"ႁႃႉ

ၸွင်ႇဝႃႈလႆႈၸိူင်ႉၼၼ်တႄႉ"ယူႇႁိုဝ် ?

ဢမ်ႇၼၼ်ၵေႃႈတေဝႃႈ ၶဝ်ယူႇမိူင်းႁဝ်း

လႄႈ ဢီႈသင်ၵေႃႈယဝ်ႉ ၶဝ်တေလႆႈ

လၢတ်ႈၵႂၢမ်းႁဝ်း ၶဝ်တေလႆႈၸႂ်ႉတိုဝ်းလိၵ်ႈႁဝ်း

ၵွပ်ႈၼႆႉပဵၼ်မိူင်းႁဝ်းၼႆ တေဢၢၼ်းႁဵတ်း

ၸိူင်ႉၼႆတႄႉ"လႆႈယူႇႁႃႉ ?

တီႈယူႇတီႈသဝ်းႁဝ်း

သုၼ်ႇလႆႈသုၼ်ႇပဵၼ်ႁဝ်းၼႆႉ ပေႃးတၢၼ်ႇ 

ၸႂ်ႉလိၵ်ႈတႆးၵႂၢမ်းတႆးသေ ၵႅတ်ႇၶႄ

ႁႄႉၵင်ႈလႆႈ လူဝ်ႇၸႂ်ႉတိုဝ်းလိၵ်ႈတႆး

ၵႂၢမ်းတႆးသေႁႄႉၵင်ႈ၊

ပေႃးမွၵ်ႈ ၸႂ်ႉလိၵ်ႈမၢၼ်ႈၵႂၢမ်းမၢၼ်ႈသေ

ၵႅတ်ႇၶႄႁႄႉၵင်ႈလႆႈ လူဝ်ႇလႆႈဢဝ်

လိၵ်ႈၵႂၢမ်းမၢၼ်ႈသေၵႅတ်ႇၵင်ႈ၊

ပေႃးပဵၼ် လိၵ်ႈၶႄႇၵႂၢမ်းၶႄႇ

ၸင်ႇတေၵႅတ်ႇၶႄႁႄႉၵင်ႈလႆႈ

လူဝ်ႇၸႂ်ႉလိၵ်ႈၶႄႇၵႂၢမ်းၶႄႇသေႁႄႉၵင်ႈ၊

ပေႃးဝႃႈထိုင်ၸၼ်ႉ လူဝ်ႇဢဝ်လိၵ်ႈၵမ်ႇၾႃႇ

သေၵႅတ်ႇၶႄႁႄႉၵင်ႈၸင်ႇလႆႈၼႆၵေႃႈ

လူဝ်ႇၸႂ်ႉတိုဝ်းလိၵ်ႈၵႂၢမ်းၵၢမ်ႇၽႃႇသေ

ၵႅတ်ႇၶႄႁႄႉၵင်ႈႁႂ်ႈလႆႈ။

ၼႆႉမၼ်းၼႄလွင်ႈၼမ်ႉၵတ်ႉႁဝ်း

လွင်ႈလူင်ႉလႅၼ်ႇႁတ်းႁၢၼ်ႁဝ်း

လွင်ႈၼမ်ႉၸႂ်ႁၵ်ႉၶိူဝ်းႁဝ်း

လွင်ႈမေႃၵႅတ်ႇၶႄတီႈယူႇတီႈသၢင်ႈႁဝ်း။

ၵူၺ်းၵႃႈလိၵ်ႈၵႂၢမ်းၸိူဝ်းၼႆႉ

ပေႃးဢမ်ႇသွၼ်ဝႆႉမေႃဝႆႉ တေႁဵတ်းႁိုဝ်

လၢတ်ႈ တေႁဵတ်းႁိုဝ်တွပ်ႇ၊

ပိူၼ်ႈႁိုတ်းၽၢႆႇမၢၼ်ႈမႃး

ပိူၼ်ႈလၢတ်ႈတင်းၶႄႇမႃး

ပိူၼ်ႈတၢၼ်ႈဢင်းၵိတ်းမႃး

ဢၢႆႈႁႃးဢဝ်ၵႂၢမ်းတႆးသေတွပ်ႇ

ဢၢႆႈႁႃးတႅမ်ႈလိၵ်ႈတႆးသေထဵင်

ၸွင်ႇတေၸွႆႈထႅမ်ပၼ်သူ

ႁႂ်ႈပဵၼ်ၽၢႆႇပေႉပုၼ်ႈလႆႈယူႇႁိုဝ် ?

ၸွင်ႇတေၵႅတ်ႇၶႄပၼ်သုၼ်ႇလႆႈသူလႆႈႁိုဝ် ?

လိၵ်ႈႁဝ်းၵႂၢမ်းႁဝ်းပဵၼ်ထႅၼ်ႈၼိုင်ႈၼႆၼၼ်ႉ

မၢၼ်ႇမႅၼ်ႈၸိုဝ်ႈၸႂ်ႈယူႇ။

ယွမ်းႁပ်ႉယူႇ။

ၵူၺ်းၵႃႈ ဢမ်ႇတၢပ်ႈမေႃၵႂၢမ်းပိူၼ်ႈ

ဢမ်ႇတၢပ်ႈၸႂ်ႉတိုဝ်းလိၵ်ႈပိူၼ်ႈဢၼ်ဝႃႈၼၼ်ႉ

ပဵၼ်တၢင်းႁၼ်ဢၼ်ၵႅပ်ႈ ပဵၼ်ပၢႆးႁူႉဢၼ်တိုၼ်ႈ

ပဵၼ်လွၵ်းလၢႆးဢၼ်ပိၵ်ႉႁူပိၵ်ႉတႃတူဝ်ၵဝ်ႇ

ပဵၼ်လၢႆးတေႃႇသူႈတဝ်ႇဢၼ်ၶူတ်းယူႇၼႂ်းၵွၵ်း

ၽႂ်တွၵ်းၵေႃႈၵူၺ်းႁူႉၵူဝ်သေၶၢမ်ႇ ၵူၺ်းႁူႉမေႃ

ၼႄးဝူတ်ႈၼႄးၵၢမ်ႇ ပိူင်လဵဝ်ၼၼ်ႉၵူၺ်း။

တေလၢတ်ႈသိုဝ်ႈ"ႁေ

ဝၼ်းမိူဝ်ႈၼႆႉဢၼ်ႁဝ်းတိုၵ်ႉတူၵ်းတႅမ်ႇ

ဢၼ်ပၢႆးဝူၼ်ႉႁဝ်းတိုၵ်ႉၶုၺ်ႈ

ဢၼ်ႁဝ်းတိုၵ်ႉလႆႈပၢႆႈလႆႈယၢၼ်

ဢၼ်ႁဝ်းတိုၵ်ႉတူၵ်းယၢၵ်ႈတူၵ်းၽၢၼ်

ဢၼ်ႁဝ်းတိုၵ်ႉပႆႇလၢတ်ႈပႆႇသင်ႇၵၼ်လႆႈ

ဢၼ်ႁဝ်းတိုၵ်ႉၶႂ်ႈတင်ႈၶုၼ်ၵဝ်ၶုၼ်မၼ်း

ဢၼ်ႁဝ်းတိုၵ်ႉပႆႇတၼ်းၽွမ်ႉႁူမ်ႈၵၼ်လႆႈၼၼ်ႉ

ပဵၼ်ၵွပ်ႈပိူဝ်ႈႁဝ်းဢမ်ႇမေႃလိၵ်ႈပိူၼ်ႈၵႂၢမ်းပိူၼ်ႈ

ၼၼ်ႉၵေႃႈပႃးယဝ်ႉ၊

ပေႃးဢမ်ႇမေႃလိၵ်ႈၵႂၢမ်းပိူၼ်ႈ

ဢမ်ႇၸင်ႈလဵပ်ႈႁဵၼ်းလွင်ႈပိူၼ်ႈ

ဢမ်ႇၸင်ႈႁဵတ်းဢူၺ်းလီၸူးပိူၼ်ႈ

ဢမ်ႇၸင်ႈဢဝ်ပၢႆးႁူႉတီႈပိူၼ်ႈသေမႃးၸႂ်ႉတိုဝ်း

ဢမ်ႇၸင်ႈဢဝ်တၢင်းႁူႉတီႈပိူၼ်ႈသေ

မႃးသင်ႇသွၼ်ပူၵ်းပွင်ပၼ်ၵၼ်။

ဢမ်ႇမေႃလိၵ်ႈမၢၼ်ႈ ဢမ်ႇၸင်ႈႁူႉလွင်ႈမၢၼ်ႈ

ဢမ်ႇၸင်ႈႁူႉလွင်ႈဢၼ်မၢၼ်ႈတႅမ်ႈလွင်ႈတႆး၊

ဢမ်ႇမေႃလိၵ်ႈၶႄႇ ဢမ်ႇၸင်ႈၼပ်ႉၸၢင်ႈ

ယိူင်းဢၢၼ်းၶႄႇ ဢမ်ႇၸင်ႈႁူႉလႆႈပိုၼ်းတႆး

ဢၼ်ၶႄႇတႅမ်ႈ၊

ဢမ်ႇမေႃလိၵ်ႈဢင်းၵိတ်း

ဢမ်ႇၸင်ႈႁဵတ်းၵေႃႉဢင်းၵိတ်း

ဢမ်ႇၸင်ႈလဵပ်ႈႁဵၼ်းလႆႈတၢင်းႁူႉၵမ်ႇၾႃႇ

ဢမ်ႇၸင်ႈယွၼ်းတၢင်းၵမ်ႉၸွႆႈတီႈၵမ်ႇၽႃႇ

ဢမ်ႇၸင်ႈႁဵတ်းႁႂ်ႈၵမ်ႇၽႃႇႁူႉၸၵ်းႁဝ်း

ၸိူဝ်းၼႆႉ ၸိူဝ်းၼႆႉ ပဵၼ်ၵွပ်ႈပိူဝ်ႈဢမ်ႇမေႃ

လိၵ်ႈပိူၼ်ႈၵႂၢမ်းပိူၼ်ႈၼၼ်ႉဢမ်ႇၸႂ်ႈႁိုဝ်?

ယႃႇပေၵူဝ်ႁေ တႃႇဢမ်ႇမေႃၵူဝ်

လူဝ်ႇမေႃႁူႉပွင်ႇ တႃႇတေႁူႉပွင်ႇ

လူဝ်ႇလႆႈႁဵၼ်းသွၼ် တႃႇတေႁဵၼ်းသွၼ်

လူဝ်ႇလႆႈၸႂ်ႁၢၼ် ႁတ်းႁဵတ်းႁတ်းလၢတ်ႈ

ႁတ်းၵႂႃႇႁတ်းပႆတင်းပိူၼ်ႈတင်းႁဝ်း

ယႃႇပေၵုမ်ႇႁၢႆႉတီႈႁဝ်းလွင်ႈလဵဝ်၊

ယႃႇၵုမ်းၶၢင်တူဝ်ၵဝ်ႇ ယႃႇပိၵ်ႉႁူပိၵ်ႉတႃ

တူဝ်ၵဝ်ႇ ယႃႇမီးတၢင်းႁၼ်ၵႅပ်ႈၼိူဝ်

လိၵ်ႈလၢႆးၵႂၢမ်းလၢတ်ႈၼႆ ၶႂ်ႈသင်ႇလၢတ်ႈ

ထိုင်ဢၢႆႈႁၢႆႉလူင်ၶဝ် ၼႂ်းဝၢၼ်ႈၸိူဝ်းၼၼ်ႉ

ၸိူင်ႉၼင်ႇၼႆ....။

>>>>>> ဢၢႆႈၶုၼ်ၽုင်းၶမ်း